ഫ്യൂച്ചേഴ്സ്, ഓപ്ഷൻസ് കോൺട്രാക്ടുകളുടെ (F&O) എക്സ്പയറി ദിനങ്ങളിൽ വ്യാപാരം നടത്തുന്ന ട്രേഡർമാർക്കായി ക്ലോസിംഗ് ഓക്ഷൻ സെഷനിൽ (CAS) സുപ്രധാന മാറ്റങ്ങൾ നിർദ്ദേശിച്ച്, രാജ്യത്തെ മൂലധന വിപണിയുടെ നിയന്ത്രകരായ സെബി (SEBI). ഡെറിവേറ്റീവ്സ് കോൺട്രാക്ടുകളുടെ (F&O) എക്സ്പയറി ദിനത്തിൽ (കോൺട്രാക്ട് കാലാവധി അവസാനിക്കുന്ന ദിവസം) സെറ്റിൽമെന്റ് നടത്തുന്നതിനായുള്ള രണ്ട് ബദൽ രീതികൾ, കുറഞ്ഞ ട്രാൻസിഷൻ കാലാവധി, പരിഷ്കരിച്ച ട്രേഡിംഗ് സമയം എന്നിങ്ങനെ ഉൾപ്പെടെയുള്ള നിർദേശങ്ങളാണ് സി.എ.എസ് ഭേദഗതിക്കായി സെബി ഇപ്പോൾ മുന്നോട്ടുവച്ചിട്ടുള്ളത്.
ഇത് നടപ്പിലായാൽ വിപണി ക്ലോസ് ചെയ്യുമ്പോൾ നിങ്ങളുടെ ഡെറിവേറ്റീവ്സ് കോൺട്രാക്ടുകളുടെ പൊസിഷനുകളുടെ മൂല്യം നിർൺയിക്കുന്ന രീതിയിൽ മാറ്റങ്ങൾ വരുമെന്ന് സാരം.
എക്സ്പയറി സെറ്റിൽമെന്റ് വില നിശ്ചയിക്കുന്ന രീതികൾ
എക്സ്പയറി ദിനങ്ങളിൽ സ്റ്റോക്ക്, ഇൻഡക്സ് ഡെറിവേറ്റീവുകളുടെ അവസാന സെറ്റിൽമെന്റ് പ്രൈസ് നിശ്ചയിക്കാൻ രണ്ട് പ്രധാന രീതികളാണ് സെബി പരിശോധിക്കുന്നത്:
ആദ്യ രീതി (Blended Formula): അവസാന 30 മിനിറ്റിലെ റെഗുലർ ട്രേഡിംഗിന്റെ വി.ഡബ്ല്യു.എ.പി (VWAP) വിലയും, 10 മിനിറ്റ് നീളുന്ന സി.എ.എസ് ഓക്ഷനിലെ വിലയും സമന്വയിപ്പിച്ച് സെറ്റിൽമെന്റ് പ്രൈസ് നിശ്ചയിക്കുക.
രണ്ടാമത്തെ രീതി (Simple VWAP): അവസാന 30 മിനിറ്റിലെ റെഗുലർ ട്രേഡിംഗിന്റെ വി.ഡബ്ല്യു.എ.പി മാത്രം കണക്കിലെടുക്കുക. ഈ രീതിയിൽ സി.എ.എസ് ഓക്ഷൻ വില സെറ്റിൽമെന്റിനെ നേരിട്ട് സ്വാധീനിക്കില്ല.
ഇൻ-ദി-മണി (ITM) ഓപ്ഷനുകളുടെ പേ-ഔട്ട് തീരുമാനിക്കുന്നത് ഈ സെറ്റിൽമെന്റ് വിലയായതിനാൽ നിക്ഷേപകർക്ക് ഈ മാറ്റം നിർണായകമാണ്.
ഇൻഡിക്കേറ്റീവ് ഇൻഡെക്സ് വാല്യൂ ഇനി ഉണ്ടാകില്ല
വിപണി അവസാനിക്കുന്നതിന് മുൻപുള്ള മിനിറ്റുകളിൽ നിഫ്റ്റിയുടെയോ ബാങ്ക് നിഫ്റ്റിയുടെയോ ട്രെൻഡ് അറിയാൻ സഹായിച്ചിരുന്ന ഇൻഡിക്കേറ്റീവ് ഇൻഡെക്സ് വാല്യൂ (IIV) ഇനി ലഭ്യമാകില്ല.
ഈ സൂചകം ഒരു യഥാർത്ഥ ട്രേഡിംഗ് വിലയല്ലെന്നതും, ഇതിനെ അടിസ്ഥാനമാക്കി ട്രേഡർമാർ ധൃതിപിടിച്ച് തീരുമാനങ്ങളെടുക്കുന്നത് ഒഴിവാക്കാനുമാണ് സെബിയുടെ ഈ നീക്കം. എന്നാൽ ഓഹരികളുടെ ഇൻഡിക്കേറ്റീവ് വാല്യൂ തുടർന്നും കാണാം.
സമയക്രമത്തിലും ഓർഡറുകളിലും വരുന്ന മാറ്റങ്ങൾ
ട്രേഡിംഗ് അവസാനിക്കാറാകുന്ന വേളയിൽ നേരിടുന്ന മാറ്റങ്ങളിൽ ട്രേഡർമാർക്ക് പെട്ടെന്ന് തീരുമാനമെടുക്കാനുള്ള സമയം കുറയ്ക്കും:
കുറഞ്ഞ ട്രാൻസിഷൻ സമയം: റെഗുലർ ട്രേഡിംഗും സി.എ.എസ് ഓക്ഷനും തമ്മിലുള്ള സമയം 5 മിനിറ്റിൽ നിന്ന് 1 മിനിറ്റായി ചുരുങ്ങും.
ഡെറിവേറ്റീവ് സമയം: ക്യാഷ് മാർക്കറ്റ് അവസാനിച്ചതിന് ശേഷമുള്ള ഡെറിവേറ്റീവ് ട്രേഡിംഗ് സമയം 10 മിനിറ്റിൽ നിന്ന് 5 മിനിറ്റായി കുറയ്ക്കും.
ഓർഡർ റദ്ദാക്കൽ: സി.എ.എസ് ഓക്ഷൻ സമയത്ത് റഫറൻസ് വിലയേക്കാൾ 1 ശതമാനത്തിൽ കൂടുതൽ വ്യതിയാനമുള്ള ഓർഡറുകൾ റദ്ദാക്കാൻ സാധിക്കില്ല. വില മെച്ചപ്പെടുത്താനുള്ള മാറ്റങ്ങൾ (Modify) മാത്രമേ സാധ്യമാകൂ.
വൈകുന്നേരം 3:30 വരെയുള്ള ട്രേഡിംഗ് സമയക്രമം നിലനിർത്തി ഓക്ഷൻ നടത്തണോ, അതോ നിലവിലെ രീതി തുടരണോ എന്നതിൽ സെബി അഭിപ്രായം തേടുന്നുണ്ട്.
നിക്ഷേപകർ ശ്രദ്ധിക്കേണ്ട കാര്യങ്ങൾ
ഈ നിർദ്ദേശങ്ങളിൽ 2026 ഒക്ടോബർ 3 വരെ പൊതുജനങ്ങൾക്ക് അഭിപ്രായം അറിയിക്കാം. അതുകൊണ്ട് തന്നെ സെബിയുടെ നിർദേശങ്ങൾ അന്തിമമാക്കിയിട്ടില്ല. പൊതു അഭിപ്രായ പ്രകാരം ഇനിയും മാറ്റങ്ങൾ വരുത്താനുള്ള സാധ്യതയും നിലനിൽക്കുന്നു.
എന്തായാലും എക്സ്പയറി ദിനങ്ങളിൽ ട്രേഡ് നടത്തുന്നവർ തത്സമയ സൂചന എന്ന നിലയിൽ ഇൻഡിക്കേറ്റീവ് ഇൻഡക്സ് വാല്യൂവിനെ (IIV) ആശ്രയിക്കുന്നതിന് പകരം സ്റ്റോക്ക്-ലെവൽ സൂചകങ്ങൾ ശ്രദ്ധിക്കുന്നതായിരിക്കും ഉചിതം. വിപണി ക്ലോസ് ചെയ്യുന്ന സമയത്തുള്ള കുറഞ്ഞ സാവകാശം കണക്കിലെടുത്ത് ഓർഡറുകൾ മുൻകൂട്ടി പ്ലാൻ ചെയ്യണമെന്നും വിപണി വിദഗ്ധർ സൂചിപ്പിച്ചു.
