മുംബൈ: ഐഒസിയുടെ വരാനിരിക്കുന്ന പദ്ധതികളുടെ വൈദ്യുതി ആവശ്യങ്ങൾ നിറവേറ്റുന്നതിനായി ഒരു സംയുക്ത സംരംഭ സ്ഥാപനം രൂപീകരിക്കാൻ സർക്കാർ ഉടമസ്ഥതയിലുള്ള പവർ ഭീമനായ എൻടിപിസിയും ഇന്ത്യൻ ഓയിലും ഒരു കരാറിൽ ഒപ്പുവച്ചു. ഇന്ത്യൻ ഓയിൽ റിഫൈനറികളുടെ വരാനിരിക്കുന്ന പ്രോജക്ടുകളുടെ വൈദ്യുതി ആവശ്യങ്ങൾ നിറവേറ്റുന്നതിനായി എൻടിപിസിയും ഇന്ത്യൻ ഓയിലും 2022 ജൂലൈ 18ന് ന്യൂഡൽഹിയിൽ വച്ച് ഒരു സംയുക്ത സംരംഭ കമ്പനി രൂപീകരിക്കുന്നതിനുള്ള കരാറിൽ ഒപ്പുവെച്ചതായി സ്ഥാപനം പ്രസ്താവനയിൽ പറഞ്ഞു. രാജ്യത്തെ പുനരുപയോഗ ഊർജ സ്രോതസ്സുകളുടെ ഉപയോഗവും ശേഷിയും വർധിപ്പിക്കുക എന്ന ലക്ഷ്യത്തോടെയാണ് ഈ സംരംഭം രൂപീകരിക്കുന്നതെന്ന് കമ്പനികൾ സംയുക്ത പ്രസ്താവനയിൽ അറിയിച്ചു.
രാജ്യത്തെ രണ്ട് ഫോസിൽ ഇന്ധന ഭീമൻമാരായ ഇന്ത്യൻ ഓയിലും എൻടിപിസിയും ഗ്രീൻ എനർജിയിലേക്കുള്ള തങ്ങളുടെ പാത മാറ്റുന്നതിന് കൈകോർക്കുമ്പോൾ ഇത് ശക്തമായ സന്ദേശമാണ് നൽകുന്നതെന്ന് ഇന്ത്യൻ ഓയിൽ ചെയർമാൻ ശ്രീകാന്ത് മാധവ് വൈദ്യ പറഞ്ഞു. മുന്നോട്ട് പോകുമ്പോൾ, എൻടിപിസിയുടെ പൂർണ ഉടമസ്ഥതയിലുള്ള ഉപസ്ഥാപനമായ എൻടിപിസി ഗ്രീൻ എനർജി ലിമിറ്റഡ് (എൻജിഇഎൽ) ഇന്ത്യൻ ഓയിലിന് ആർഇ-ആർടിസി വൈദ്യുതി വിതരണം ചെയ്യുന്നതിനായി സംയുക്ത കമ്പനി രൂപീകരിക്കും. എൻടിപിസിയുടെ മൊത്തം പുനരുപയോഗ ഊർജ ബിസിനസുകൾ ഏകീകരിക്കുന്നതിനുള്ള ഒരു കമ്പനിയായിരിക്കും എൻജിഇഎൽ.
അതേസമയം, 2024 ഡിസംബറോടെ 650 മെഗാവാട്ട് വരെ പുനരുപയോഗിക്കാവുന്ന ഊർജം ഉപയോഗിച്ച് തങ്ങളുടെ റിഫൈനറികളുടെ അധിക വൈദ്യുതി ആവശ്യകത നിറവേറ്റാൻ പദ്ധതിയിടുന്നതായി ഇന്ത്യൻ ഓയിൽ അറിയിച്ചു.
