സാമ്പത്തിക വർഷത്തിന്റെ ആദ്യ പാദത്തിൽ യുഎസ് സമ്പദ്വ്യവസ്ഥ പ്രതീക്ഷിച്ചതിലും ശക്തമായി 2.1 ശതമാനം വാർഷിക നിരക്കിൽ വളർച്ച കൈവരിച്ചതായി യുഎസ് കൊമേഴ്സ് ഡിപ്പാർട്ട്മെന്റ്. 2025-ലെ അവസാന മൂന്ന് മാസങ്ങളിൽ രേഖപ്പെടുത്തിയ 0.5 ശതമാനം വളർച്ചയിൽ നിന്നുള്ള ശ്രദ്ധേയമായ ഒരു തിരിച്ചുവരവാണ് ഈ നേട്ടം. മുൻപ് പുറത്തുവിട്ട 1.6 ശതമാനം വളർച്ചാ നിരക്കിൽ നിന്നാണ് ഇപ്പോൾ ജിഡിപി വളർച്ച 2.1 ശതമാനമായി ഉയർന്നതായി സർക്കാർ വ്യക്തമാക്കുന്നത്. നിർമ്മിത ബുദ്ധി മേഖലയിലുണ്ടായ വൻ നിക്ഷേപങ്ങളും ബിസിനസ്സ് രംഗത്തെ മുന്നേറ്റങ്ങളുമാണ് ഈ വളർച്ചയ്ക്ക് പ്രധാനമായും കരുത്തുപകർന്നത്.
ഇറാൻ ഊർജ്ജ പ്രതിസന്ധി സൃഷ്ടിച്ച അനിശ്ചിതത്വങ്ങൾക്കിടയിലും ലോകത്തിലെ ഏറ്റവും വലിയ സമ്പദ്വ്യവസ്ഥയായ യുഎസിന്റെ സാമ്പത്തിക രംഗം തളർച്ചയില്ലാതെ മുന്നോട്ട് കുതിക്കുന്നതായാണ് വ്യക്തമാകുന്നത്. അമേരിക്കൻ തൊഴിൽ വിപണിയും ഇക്കാലയളവിൽ മികച്ച പ്രകടനമാണ് കാഴ്ചവെച്ചത്. വ്യാപാര, കുടിയേറ്റ നയങ്ങളിലെ ട്രംപ് ഭരണകൂടത്തിന്റെ അനിശ്ചിതത്വങ്ങൾ കാരണം 2025-ൽ പ്രതിമാസം പതിനായിരത്തിൽ താഴെ തൊഴിലവസരങ്ങൾ മാത്രമാണ് സൃഷ്ടിക്കപ്പെട്ടിരുന്നത്. എന്നാൽ ഇതിൽ നിന്നും ശക്തമായ തിരിച്ചുവരവ് നടത്തിക്കൊണ്ട്, മാർച്ച് മുതൽ മെയ് വരെയുള്ള മാസങ്ങളിൽ തൊഴിലുടമകൾ പ്രതിമാസം ശരാശരി 1,88,000 പുതിയ തൊഴിലവസരങ്ങൾ വീതം വിപണിയിൽ കൂട്ടിച്ചേർത്തു.
