ന്യൂഡൽഹി: മാരുതി സുസുക്കിയുടെ ജനപ്രിയ എസ്യുവിയായ ഫ്രോങ്ക്സ് ഇന്ത്യയിൽ നിന്ന് ഏറ്റവും വേഗത്തിൽ 2 ലക്ഷം യൂണിറ്റ് കയറ്റുമതി എന്ന നേട്ടം സ്വന്തമാക്കി. കയറ്റുമതി ആരംഭിച്ച് 38 മാസത്തിനുള്ളിലാണ് ഫ്രോങ്ക്സ് ഈ നാഴികക്കല്ല് പിന്നിട്ടത്.
2023 ജൂണിൽ കയറ്റുമതി ആരംഭിച്ച ഫ്രോങ്ക്സിന് ആഗോള വിപണിയിൽ മികച്ച സ്വീകാര്യതയാണ്. ആദ്യ ഒരു ലക്ഷം യൂണിറ്റ് കയറ്റുമതി 25 മാസത്തിനുള്ളിൽ പൂർത്തിയാക്കിയപ്പോൾ, രണ്ടാം ഒരു ലക്ഷം യൂണിറ്റ് വെറും 13 മാസത്തിനടുത്ത് സമയത്തിനുള്ളിലാണ് കയറ്റുമതി ചെയ്തത്.
ഗുജറാത്തിലെ മാരുതി സുസുക്കിയുടെ ഹൻസാൽപുർ പ്ലാന്റിൽ നിർമിക്കുന്ന ഫ്രോങ്ക്സ്, ജപ്പാൻ ഉൾപ്പെടെ ഏകദേശം 90 രാജ്യങ്ങളിലേക്കാണ് കയറ്റുമതി ചെയ്യുന്നത്.
നേട്ടത്തെക്കുറിച്ച് പ്രതികരിച്ച മാരുതി സുസുക്കി ഇന്ത്യ ലിമിറ്റഡിന്റെ മാനേജിങ് ഡയറക്ടറും സിഇഒയുമായ ഹിസാഷി ടകേഉച്ചി, മാരുതി സുസുക്കി കയറ്റുമതി ചെയ്യുന്ന ഓരോ വാഹനത്തിലും കമ്പനിയിലെ ജീവനക്കാരുടെ കഠിനാധ്വാനവും അഭിമാനവും അടങ്ങിയിട്ടുണ്ടെന്ന് പറഞ്ഞു. ഈ വാഹനങ്ങളിലൂടെ ഇന്ത്യൻ നിർമാണ മേഖലയിലെ മികവ് ഏകദേശം 120 രാജ്യങ്ങളിലേക്ക് എത്തുകയാണെന്നും അദ്ദേഹം വ്യക്തമാക്കി.
2024-25 സാമ്പത്തിക വർഷം മുതൽ ഇന്ത്യയിൽ നിന്ന് ഏറ്റവും കൂടുതൽ കയറ്റുമതി ചെയ്യുന്ന പാസഞ്ചർ വാഹനമായി ഫ്രോങ്ക്സ് മാറിയിട്ടുണ്ട്. ഇപ്പോൾ ഏകദേശം 90 രാജ്യങ്ങളിലേക്കാണ് ഈ മോഡൽ കയറ്റുമതി ചെയ്യുന്നത്. റെക്കോർഡ് സമയത്തിനുള്ളിൽ ഒരു ലക്ഷം കയറ്റുമതി പിന്നിട്ട ഫ്രോങ്ക്സ്, രണ്ടാം ലക്ഷം അതിലും വേഗത്തിൽ സ്വന്തമാക്കിയത് അന്താരാഷ്ട്ര വിപണികളിൽ വാഹനത്തിനുള്ള വർധിച്ചുവരുന്ന ആവശ്യകതയുടെ തെളിവാണെന്നും ടകേഉച്ചി പറഞ്ഞു.
‘മേക്ക് ഇൻ ഇന്ത്യ, മേക്ക് ഫോർ ദ വേൾഡ്’ എന്ന ലക്ഷ്യത്തിന് അനുസൃതമായി ഇന്ത്യൻ നിർമാണ മേഖലയിലെ കരുത്ത് ലോകത്തിന് മുന്നിൽ അവതരിപ്പിക്കുന്നത് മാരുതി സുസുക്കി തുടരുകയാണെന്നും അദ്ദേഹം പറഞ്ഞു. കയറ്റുമതിയിൽ തുടർച്ചയായി നൽകിയ ശ്രദ്ധയിലൂടെ ഇന്ത്യയിൽ നിന്നുള്ള പാസഞ്ചർ വാഹന കയറ്റുമതിയിൽ ഒന്നാം സ്ഥാനം നേടാനും കമ്പനിക്ക് കഴിഞ്ഞു.
2026-27 സാമ്പത്തിക വർഷത്തിന്റെ ആദ്യ പാദത്തിൽ ഇന്ത്യയിൽ നിന്ന് ഏറ്റവും കൂടുതൽ കയറ്റുമതി ചെയ്ത മൂന്ന് പാസഞ്ചർ വാഹനങ്ങളും മാരുതി സുസുക്കിയുടേതായിരുന്നു.
വർഷംതോറും വർധിക്കുന്ന കയറ്റുമതി കമ്പനിയുടെ വാഹനങ്ങളുടെ വിശ്വാസ്യതയ്ക്കും ആഗോള വിപണികളിലെ സ്വീകാര്യതയ്ക്കും തെളിവാണെന്നും കമ്പനി വ്യക്തമാക്കി.
