ഹൈദരാബാദ്: ഇന്ത്യയിലെ ഐടി ചെലവുകള്‍ വരും വര്‍ഷങ്ങളില്‍ 9.9 ശതമാനം വാര്‍ഷിക വളര്‍ച്ചാ നിരക്കില്‍ വര്‍ധിച്ച് 2027-ഓടെ 59 ബില്യണ്‍ ഡോളര്‍ മറികടക്കുമെന്ന് ഇന്റര്‍നാഷണല്‍ ഡാറ്റ കോര്‍പ്പറേഷന്‍ (ഐഡിസി) റിപ്പോർട്ട്. സോഫ്റ്റ്വെയര്‍ വിപണി തുടര്‍ച്ചയായി ഇരട്ട അക്ക വളര്‍ച്ചയാണ് കാണിക്കുന്നത്.
മാര്‍ക്കറ്റ് റിസര്‍ച്ച് ആന്‍ഡ് അനാലിസിസ് സ്ഥാപനമായ ഐഡിസിയുടെ കണക്കനുസരിച്ച്, 2024-ലെ ഇന്ത്യയിലെ ഐടി ചെലവ് വര്‍ഷം തോറും 11 ശതമാനം വര്‍ധിച്ച് 2024-ല്‍ 44 ബില്യണ്‍ യുഎസ് ഡോളറിലെത്തുമെന്ന് പ്രതീക്ഷിക്കുന്നു.
2024-ല്‍ സാമ്പത്തിക പ്രതിസന്ധിയും അനിശ്ചിതത്വവും ഉണ്ടായാല്‍ പോലും, ഡിജിറ്റല്‍ നവീകരണത്തിന്റെ ഒരു പുതിയ യുഗത്തിലേക്ക് പ്രവേശിക്കുമ്പോള്‍ ആഗോള ഐസിടി ചെലവ് 6 ശതമാനത്തിലധികം വര്‍ധിക്കുമെന്ന് പ്രതീക്ഷിക്കുന്നതായി ഐഡിസി സംഘടിപ്പിച്ച ഇന്ത്യ സിഐഒ ഉച്ചകോടിയില്‍ സംസാരിക്കവേ, കമ്പനിയുടെ ഡബ്ല്യുഡബ്ല്യു സ്ട്രാറ്റജി മേധാവിയായ സ്റ്റീവന്‍ ജെ ഫ്രാന്സെന്‍ പറഞ്ഞു.
ഐഡിസിയുടെ അഭിപ്രായത്തില്‍, സാമ്പത്തിക പ്രതിസന്ധിയും അനിശ്ചിതത്വവും ഉണ്ടായിരുന്നിട്ടും, 2023-ല്‍ ഇന്ത്യന്‍ സംരംഭങ്ങള്‍ ഡിജിറ്റല്‍ സ്പെയ്സില്‍ നിക്ഷേപം തുടര്‍ന്നു.
പുതിയ ഉല്‍പ്പന്നങ്ങളും സേവനങ്ങളും സമാരംഭിക്കുന്നതിനും വരുമാന വളര്‍ച്ചയും ലാഭവും ഉയര്‍ത്തുന്നതിനും സഹായിച്ചു.
സംരംഭങ്ങള്‍ അവരുടെ ബജറ്റുകള്‍ പ്രധാനമായും സോഫ്റ്റ്വെയര്‍, ആപ്ലിക്കേഷന്‍ ഡെവലപ്മെന്റ്, ക്ലൗഡ് മൈഗ്രേഷന്‍ എന്നിവയ്ക്കായി നീക്കിവച്ചു.
