വ്യാവസായിക ഉൽപ്പാദന സൂചികയ്ക്ക് സമാനമായി, സേവന മേഖലയിലെ വളർച്ച കൃത്യമായി വിലയിരുത്തുന്നതിനായി ഇന്ത്യ അടുത്ത മാസം ‘ഇൻഡക്സ് ഓഫ് സർവീസ് പ്രൊഡക്ഷൻ’ (ISP) എന്ന പുതിയ പ്രതിമാസ സൂചിക പുറത്തിറക്കും. ഇന്ത്യൻ സമ്പദ്വ്യവസ്ഥയുടെ നട്ടെല്ലായ സേവന മേഖലയുടെ വളർച്ച കൃത്യമായി നിരീക്ഷിക്കുകയാണ് ഈ പദ്ധതിയുടെ പ്രധാന ലക്ഷ്യം. പ്രാരംഭ ഘട്ടത്തിൽ വ്യാപാരം, ഗതാഗതം, ധനകാര്യം തുടങ്ങിയ പ്രധാന മേഖലകളെയാണ് ഈ സൂചികയിൽ ഉൾപ്പെടുത്തുക. ആരോഗ്യ, വിദ്യാഭ്യാസ മേഖലകളെ ഇതിന്റെ അടുത്ത ഘട്ടങ്ങളിൽ ഉൾപ്പെടുത്തും.
ഇന്ത്യയുടെ ജിഡിപിയിൽ ഏറ്റവും വലിയ പങ്ക് വഹിക്കുന്ന സേവന മേഖലയുടെ വളർച്ച കൃത്യമായി അളക്കാനും, ത്രൈമാസ ജിഡിപി കണക്കുകൾ കൂടുതൽ സുതാര്യമാക്കാനും ഇൻഡക്സ് ഓഫ് സർവീസ് പ്രൊഡക്ഷൻ സഹായിക്കും. മുൻകാലങ്ങളെ അപേക്ഷിച്ച് വ്യാവസായിക ഉത്പാദന സൂചിക വഴി നിർമ്മാണ മേഖല എളുപ്പത്തിൽ ട്രാക്ക് ചെയ്യാനാകുമായിരുന്നെങ്കിലും സേവന മേഖലയ്ക്ക് അത്തരം കൃത്യമായ പ്രതിമാസ അളവുകോലുകൾ ഉണ്ടായിരുന്നില്ല.
സേവന മേഖലയിൽ നിന്നുള്ള വരുമാനവും വിറ്റുവരവും ജിഎസ്ടി കണക്കുകളുടെ അടിസ്ഥാനത്തിൽ വിശകലനം ചെയ്താണ് ഇൻഡക്സ് ഓഫ് സർവീസ് പ്രൊഡക്ഷൻ തയ്യാറാക്കുന്നത്. ഇത് ഔദ്യോഗിക ജിഡിപി കണക്കുകൾ തയ്യാറാക്കുമ്പോൾ ഊഹങ്ങളെക്കാൾ യഥാർത്ഥ വിവരങ്ങൾ ഉപയോഗിക്കാൻ സഹായിക്കുന്നു. സൂചികയുടെ സഹായത്തോടെ വാർഷിക ജിഡിപി ലക്ഷ്യങ്ങളും വളർച്ചാ പ്രവണതകളും മുൻകൂട്ടി കൃത്യമായി കണക്കാക്കാൻ സാമ്പത്തിക വിദഗ്ധർക്ക് സാധിക്കും. കൃത്യമായ ഇടവേളകളിൽ സേവന മേഖലയുടെ ഉത്പാദനത്തിലെ ഏറ്റക്കുറച്ചിലുകൾ മനസ്സിലാക്കാനും, അതിനനുസരിച്ച് റിസർവ് ബാങ്കിനും സർക്കാരിനും ഉചിതമായ സാമ്പത്തിക-വായ്പാ നയങ്ങൾ രൂപീകരിക്കാനും ഇത് സഹായകമാകും.
