ചൈന- യുഎസ് നികുതി യുദ്ധം തകൃതിയായി നടക്കുന്ന കാര്യം നിങ്ങള്‍ക്ക് അറിയാമല്ലോ? ഇത് ഇരു രാജ്യങ്ങളിലേയും ചില ബിസിനസുകളെ സാരമായി ബാധിക്കുന്നുണ്ട്.
ചൈനീസ് ഇലക്ട്രിക് കാര്‍ നിര്‍മ്മാതാക്കളായ BYD യില്‍ നിന്നുള്ള മത്സരം ലോക കോടീശ്വരന്‍ ഇലോണ്‍ മസ്‌കിനെ വലിയ സമ്മര്‍ദത്തിലാക്കുന്നുവെന്നാണ് വിവരം. വിലകുറഞ്ഞ ബിവൈഡി മോഡലുകള്‍ വിപണികള്‍ കീഴടക്കുമ്പോള്‍ ടെസ്ല തുടര്‍ച്ചയായി വില്‍പ്പന ഇടിവ് രേഖപ്പെടുത്തുന്നു.
ചൈനയ്ക്കു മേല്‍ മസ്‌ക് നടത്തുന്ന ആക്രമണങ്ങളും ടെസ്ലയ്ക്ക് വെല്ലുവിളിയാണ്. ഈ പ്രശ്‌നം നേരിടാന്‍ ടെസ്ല ഇന്ത്യന്‍ കമ്പനികളുടെ സഹായം തേടിയെന്നാണ് വിവരം.
ഇന്ത്യന്‍ ചിപ്പ് നിര്‍മ്മാണ കമ്പനികളുമായി ചര്‍ച്ചകള്‍ നടത്തിവരികയാണ് നിലവില്‍ ലോക കോടീശ്വരന്‍. ആഗോള വിപണിയിലേക്കുള്ള വിതരണ ശൃംഖലയിലെ ആവശ്യം നിറവേറ്റാനും, ഉല്‍പാദനം വര്‍ദ്ധിപ്പിക്കാനുമാണ് ചര്‍ച്ചകള്‍.
യൂറോപ്പ് പോലുള്ള പ്രധാന ഇവി വിപണികളില്‍ ചൈനീസ് നിര്‍മ്മാതാക്കളായ BYD ടെസ്ലയ്ക്ക് കടുത്ത മത്സരം നല്‍കുന്നുണ്ട്. ലോകത്തിലെ ഏറ്റവും വലിയ ഇലക്ട്രിക് വാഹന കമ്പനിയായി BYD മാറിയിട്ടുണ്ട്.
കഴിഞ്ഞ വര്‍ഷം 170 ബില്യണ്‍ ഡോളറാണ് കമ്പനിയുടെ വരുമാനം. അതേസമയം ടെസ്ലയുടെ വരുമാനം 155.5 ബില്യണ്‍ ഡോളറായിരു്‌നു. ടെസ്ലയുടെ 97.7 ബില്യണ്‍ ഡോളറുമായി താരതമ്യപ്പെടുത്തുമ്പോള്‍ BYD യുടെ വിപണി മൂല്യം 100 ബില്യണ്‍ ഡോളറാണ്.
ചൈനീസ് കമ്പനി സൃഷ്ടിച്ച വെല്ലുവിളി നേരിടാന്‍ ടെസ്ല ഇന്ത്യന്‍ ചിപ്പ് നിര്‍മ്മാതാക്കളെയാണ് ലക്ഷ്യംവയ്ക്കുന്നത്. ഇവി ഉല്‍പാദനത്തിന് ആവശ്യമായ സെമികണ്ടക്ടറുകളുടെ വിതരണം നിലനിര്‍ത്തുകയാണ് ലക്ഷ്യം.
ഇന്ത്യയിലെ ഗുജറാത്തില്‍ നിര്‍മ്മാണ സൗകര്യങ്ങളുള്ള അമേരിക്കന്‍ മെമ്മറി ചിപ്പ് നിര്‍മ്മാതാവായ മൈക്രോണ്‍, മുരുഗപ്പ ഗ്രൂപ്പിന്റെ മുംബൈ ആസ്ഥാനമായി പ്രവര്‍ത്തിക്കുന്ന സിജി സെമി, ടാറ്റ ഇലക്ട്രോണിക്സ് എന്നിവരുമായി മസ്‌ക് ചര്‍ച്ച നടത്തിവരുന്നുവെന്നാണ് വിവരം.
ആറ് ആഴ്ച മുമ്പ് ടെസ്ല പ്രതിനിധികള്‍ ഈ കമ്പനികളുമായി ചര്‍ച്ചകള്‍ നടത്തിയിരുന്നു. 28-65 എന്‍ന്‍എം നോഡ് സെമികണ്ടക്ടറുകളാണ് പ്രധാനം. ആഭ്യന്തര, അന്തര്‍ദേശീയ ആവശ്യങ്ങള്‍ നിറവേറ്റുന്നതിനായി മൈക്രോണ്‍ അസംബ്ലിങ്ങിലും പരിശോധനാ പ്രക്രിയകളില്‍ സഹായിക്കുമെന്നാണ് വിവരം.
സെമികണ്ടക്ടര്‍ ഉല്‍പ്പാദനത്തിനായുള്ള OSAT സേവനങ്ങളില്‍ സിജി സെമി ശ്രദ്ധ കേന്ദ്രീകരിക്കും. ടെസ്ലയുടെ ആഗോള നിര്‍മ്മാണ ആവാസവ്യവസ്ഥയില്‍ ടാറ്റ ഇലക്ട്രോണിക്സ് പ്രധാന പങ്ക് വഹിക്കും.
