ബെംഗളൂരു: ലീല ഹോട്ടൽസ്(Leela Hotels) ചെയിൻ ഉടമകൾ ഐപിഒക്ക്(IPO) ഒരുങ്ങുന്നു. ഹോട്ടൽ മേഖലയിലെ(Hotel Segments) ഏറ്റവും വലിയ പ്രാഥമിക ഓഹരി വിൽപ്പന വന്നേക്കും എന്ന് സൂചന. ഓഹരി വിൽപ്പനയിലൂടെ 5,000 കോടി രൂപയാണ് ബ്രൂക്ക് ഫീൽഡ് അസറ്റ് മാനേജ്മൻ്റ് വലിയ നിക്ഷേപം നടത്തിയിരിക്കുന്ന സ്ക്ലോസ് ബംഗ്ലൂർ സമാഹരിക്കുന്നത്.
ലീല ഹോട്ടൽസ് നടത്തിപ്പുകാരായ സ്ക്ലോസ് ബാംഗ്ലൂർ 3000 കോടി രൂപ പുതിയ ഓഹരികൾ വിറ്റഴിച്ചും 2000 കോടി രൂപ ഓഫർ ഫോർ സെയിലിലൂടെയുമാണ് സമാഹരിക്കുന്നത്.
അടുത്തിടെ ഹോസ്പിറ്റാലിറ്റി രംഗത്ത് നടക്കുന്ന ഏറ്റവും വലിയ ഐപിഒയ്ക്ക് തയ്യാറെടുക്കുകയാണ് പ്രമോട്ടർമാർ.ബ്രൂക്ക് ഫീൽഡാണ് ലീലയിലെ ഏറ്റവും വലിയ നിക്ഷേപകർ.
മാർച്ചിൽ ലീല ഗ്രൂപ്പിൻ്റെ ഉടമസ്ഥതയിലുള്ള നാല് പ്രോപ്പ‍‍ർട്ടികളിൽ കൂടെ ബ്രൂക്ക് ഫീൽഡ് അസറ്റ് മാനേജ്മൻ്റ് കമ്പനി നിക്ഷേപം നടത്തിയിരുന്നു.
ലീല ഗ്രൂപ്പിൻ്റെ കൈവശമുള്ള ഡൽഹി, ബാംഗ്ലൂർ, ചെന്നൈ, ഉദയ്പുർ എന്നിവിടങ്ങളിലെ പ്രോപ്പ‍ർട്ടികളാണ് ബ്രൂക്ക് ഫീൽഡ് നിക്ഷേപം നടത്തിയത്.
ലീല പാലസ്, ഹോട്ടൽസ് ആൻഡ് റിസോർട്ട്‌സ്, ആഡംബര ഹോസ്പിറ്റാലിറ്റി ശൃംഖലയിലെ ഏറ്റവും വലിയ ബ്രാൻഡുകളിൽ ഒന്നായതിനാൽ ഈ രംഗത്തെ ഏറ്റവും വലിയ ഐപിഒയായിരിക്കും സ്ക്ലോസിൻ്റെത് എന്നാണ് കണക്കാക്കുന്നത്. വളർച്ചാ മൂലധനമായി തന്നെ തുക വിനിയോഗിച്ചേക്കും.
11 ഇൻവെസ്റ്റ്മൻ്റ് ബാങ്കുകളാണ് ഓഹരി വിൽപ്പന നിയന്ത്രിക്കുക. കൊട്ടക് മഹീന്ദ്ര ക്യാപിറ്റൽ, ജെഎം ഫിനാൻഷ്യൽ, ബോഫാ സെക്യൂരിറ്റീസ്, മോർഗൻ സ്റ്റാൻലി, ജെപി മോർഗൻ, ആക്‌സിസ് ക്യാപിറ്റൽ, സിറ്റി, ഐസിഐസിഐ സെക്യൂരിറ്റീസ്, ഐഐഎഫ്എൽ ക്യാപിറ്റൽ, മോത്തിലാൽ ഓസ്വാൾ, എസ്ബിഐ ക്യാപ്‌സ് എന്നിവ ഇതിൽ ഉൾപ്പെടുന്നു. ബ്രൂക്ക്ഫീൽഡ് അസറ്റ് മാനേജ്‌മെൻ്റ് പ്രതികരിച്ചിട്ടില്ല.
2019 മാർച്ചിൽ ആണ് കാനഡയിലെ ടൊറൻ്റോ ആസ്ഥാനമായ ബ്രൂക്ക്ഫീൽഡ് അസറ്റ് മാനേജ്മന്റ് ലീലയുടെ ഡൽഹി, ബാംഗ്ലൂർ, ഉദയ്പൂർ, ചെന്നൈ പ്രോപ്പർട്ടികൾ ഏറ്റെടുക്കുന്നത്. ജെഎം ഫിനാൻഷ്യൽ അസറ്റ് റീകൺസ്ട്രക്ഷൻ കമ്പനിയിൽ നിന്ന് 3,950 കോടി രൂപയ്ക്കാണ് പ്രോപ്പ‍ർട്ടി സ്വന്തമാക്കിയത്.
ഈ ഐപിഒയിൽ ഹോട്ടൽ ലീലാ വെഞ്ച്വർ ലിമിറ്റഡ് ഉൾപ്പെടുകയില്ല. ലിസ്റ്റഡ് കമ്പനിയാണിത്.
മറ്റൊരു ഐപിഒയും എത്തുന്നു
റിയൽ എസ്റ്റേറ്റ് ഡെവലപ്പർ പഞ്ച്ഷിൽ റിയൽറ്റിയുടെയും നിക്ഷേപ സ്ഥാപനമായ ബ്ലാക്ക്‌സ്റ്റോണിന്റെയും സംയുക്ത സംരംഭമായ വെൻ്റീവ് ഹോസ്പിറ്റാലിയും പ്രാഥമിക ഓഹരി വിൽപ്പനക്ക് ഒരുങ്ങുകയാണ്.
2,000 കോടി രൂപ സമാഹരിക്കാനാണ് ലക്ഷ്യമിടുന്നത്. രേഖകൾ സെബിക്ക് സമർപ്പിച്ചു.
