മുംബൈ: സിംഗപ്പൂരിലെ പരമാധികാര വെല്‍ത്ത് ഫണ്ടായ ടെമാസെക് ഹോള്‍ഡിംഗ്‌സ് പ്രൈവറ്റ് ലിമിറ്റഡ് മഹീന്ദ്ര & മഹീന്ദ്രയുടെ ഇലക്ട്രിക് വാഹന ബിസിനസില്‍ 1200 കോടി രൂപ നിക്ഷേപിക്കുന്നു. കമ്പനി എക്‌സ്‌ചേഞ്ച് ഫയലിംഗില്‍ അറിയിച്ചതാണിത്.നിക്ഷേപത്തിനുശേഷം, മീലില്‍ (മഹീന്ദ്ര ഇലക്ട്രിക് ഓട്ടോമൊബൈല്‍ ലിമിറ്റഡ്) ടെമാസെക്കിന് 1.49-2.97 ശതമാനം വരെ ഓഹരി പങ്കാളിത്തമുണ്ടാകും.
287 ബില്യണ്‍ ഡോളര്‍ അറ്റ പോര്‍ട്ട്‌ഫോളിയോ മൂല്യമുള്ള ആഗോള നിക്ഷേപ കമ്പനിയാണ് ടെമാസെക് ഹോള്‍ഡിംഗ്‌സ്. ഈ നിക്ഷേപത്തോടെ, മഹീന്ദ്രയുടെ ഇവി അനുബന്ധ സ്ഥാപനത്തിന്റെ മൂല്യം 15 ശതമാനം ഉയര്‍ന്ന് 80,580 കോടി രൂപയാകും.
‘ഈ നിക്ഷേപകരുടെ ആഗോള അനുഭവത്തിന്റെ വിശാലത മീലിന് വിലപ്പെട്ടതായിരിക്കും. നിക്ഷേപിച്ച തുക മഹീന്ദ്ര ഗ്രൂപ്പിന്റെ പദ്ധതിയുമായി പൊരുത്തപ്പെടുന്നു, ‘ കമ്പനി പ്രസ്താവനയില്‍ പറഞ്ഞു.
അതേസമയം മഹീന്ദ്ര ആന്റ് മഹീന്ദ്ര ഓഹരി, വ്യാഴാഴ്ച 1 ശതമാനത്തിലേറെ താഴ്ന്ന് 1469.15 രൂപയിലെത്തി. അടുത്ത മൂന്ന് വര്‍ഷത്തിനുള്ളില്‍ ഇന്ത്യയില്‍ 10 ബില്യണ്‍ ഡോളര്‍ വരെ നിക്ഷേപിക്കാന്‍ പദ്ധതിയിടുന്നതായി ടെമാസക്ക് ഈയിടെ വെളിപ്പെടുത്തിയിരുന്നു.
