ഇവി മേഖലയിൽ വൻ നിക്ഷേപത്തിനു ലക്ഷ്യമിട്ട് ടാറ്റ ഗ്രൂപ്പ് കമ്പനി. ഇലക്ട്രിക് വാഹന മേഖലയിൽ സ്വയം പര്യാപ്തത നേടുകയെന്ന് ലക്ഷ്യത്തോടാണ് പുതിയ നിക്ഷേപത്തോടെ ടാറ്റ അടുക്കുന്നതെന്നു വിദഗ്ധർ പറഞ്ഞു.
ടാറ്റയുടെ പൂർണ ഉടമസ്ഥതയിൽ പ്രവർത്തിക്കുന്ന അഗ്രതാസ് ആണ് പദ്ധതിക്കു ചുക്കാൻ പിടിക്കുന്നത്. 4 ബില്യൺ പൗണ്ട് (40,000 കോടിയിലധികം രൂപ) മുതൽമുടക്കിൽ തെക്ക്- പടിഞ്ഞാറൻ ഇംഗ്ലണ്ടിലെ സോമർസെറ്റിൽ ഇവി ബാറ്ററി ഫാക്ടറി നിർ്മ്മിക്കാനാണ് തീരുമാനമെന്നു റിപ്പോർട്ടുകൾ വ്യക്തമാക്കുന്നു.
യുകെയിലെ ഏറ്റവും വലിയ ബാറ്ററി ഫാക്ടറി നിർമ്മിച്ച് യുകെ ഇവി മേഖലയെ ഗണ്യമായി ഉയർത്തുകയെന്ന ലക്ഷ്യവും കമ്പനിക്കുണ്ട്. ഇതോടെ ആഗോള വിപണികളിൽ ഇവി മേഖലയിൽ വൻ മുന്നേറ്റം കാഴ്ചവയ്ക്കാൻ ടാറ്റയ്ക്കാകും.
കഴിഞ്ഞ വർഷം പ്രഖ്യാപിച്ച ഗിഗാഫാക്ടറി, സോമർസെറ്റിലെ ബ്രിഡ്ജ്വാട്ടറിന് സമീപമുള്ള ഗ്രാവിറ്റി സ്മാർട്ട് കാമ്പസിലാകും നിർമ്മിക്കുക. പദ്ധതിയെക്കുറിച്ച് കൂടുതലറിയാനും, പഠിക്കാനും, ഭാഗമാകാനും പ്രദേശവാസികളെ കൂടി ഉൾപ്പെടുത്തി കമ്മ്യൂണിറ്റി ആദ്യ സമീപനത്തോടെയാകും നിർമ്മാണം.
2030 ഓടെ യുകെ ഓട്ടോമോട്ടീവ് മേഖലയ്ക്ക് ആവശ്യമായ ബാറ്ററി നിർമ്മാണ ശേഷിയുടെ പകുതിയോളം സംഭാവന ചെയ്യുകതാണ് കമ്പനിയുടെ ലക്ഷ്യം. 40 ജിഗാവാട്ട് ശേഷിയുള്ള ഫാക്ടറിക്ക് ഇതു സാധ്യമാകുമെന്നു മാനേജ്‌മെന്റ് ഉറച്ചു വിശ്വസിക്കുന്നു.
ഫാ്കടിക്കായുള്ള മൾട്ടി ബില്യൺ പൗണ്ട് നിക്ഷേപം സോമർസെറ്റിലേക്ക് അത്യാധുനിക സാങ്കേതികവിദ്യ കൊണ്ടുവരും. ഇതുവഴി ആയിരക്കണക്കിന് തൊഴിലവസരങ്ങൾ സൃഷ്ടിക്കപ്പെടും.
ബ്രിട്ടന്റെ ഇലക്ട്രിക് മൊബിലിറ്റിയിലേക്കുള്ള പരിവർത്തനത്തെ സൂപ്പർചാർജ് ചെയ്യാൻ പദ്ധതി സഹായിക്കുമെന്ന് അഗ്രതാസിന്റെ സിഇഒ ടോം ഫ്‌ലാക്ക് പറഞ്ഞു.
ഫാക്ടറിയുടെ നിർമ്മാണ തീരുമാനം ടാറ്റ ഗ്രൂപ്പും സ്ഥിരീകരിച്ചിട്ടുണ്ട്. ഇന്ത്യൻ കമ്പനിയായ ടാറ്റ 4 ബില്യൺ പൗണ്ട് ബാറ്ററി ഫാക്ടറിക്കായി നിക്ഷേപിക്കുമെന്നും, ടാറ്റയുടെ ബാറ്ററി വിഭാഗമായ അഗ്രതാസ്, പട്ടണത്തിന് പുറത്ത് സ്ഥിതി ചെയ്യുന്ന M5-ൽ നിന്ന് ഗ്രാവിറ്റി സ്മാർട്ട് കാമ്പസിൽ സ്ഥലം വാങ്ങിയതായും റിപ്പോർട്ട് ഉറപ്പിക്കുന്നു.
ഏകദേശം 500 മില്യൺ പൗണ്ട് സർക്കാർ സബ്സിഡിയായി നേടിയ ശേഷം യുകെയിൽ അടുത്ത ജിഗാഫാക്ടറി നിർമ്മിക്കുമെന്ന് ടാറ്റ ജൂലൈയിൽ പ്രഖ്യാപിച്ചിരുന്നു.
പുതിയ ഇവി ഫാക്ടറി ടാറ്റയ്ക്കു വാഹന മേഖലയിൽ വലിയ മുൻതൂക്കം നൽകും. കമ്പനിയുടെ ഓട്ടോ വിഭാഗമായി ടാറ്റ മോട്ടോഴ്‌സ് ഇതോടകം ഇവി മേഖലയിൽ വലിയ മുന്നേറ്റം കാഴ്ചവയ്ക്കുന്നു.
കമ്പനിയുടെ പുതിയ മോഡലുകളെല്ലാം തന്നെ ഇലക്ട്രിക് ആണ്. ജാഗ്വർ, ലാൻഡ് റോവർ തുടങ്ങിയ വിദേശ ഓട്ടോ ബ്രാൻഡുകളും കമ്പനിക്കു സ്വന്തമാണ്.
സ്വന്തമായി ഇവി ബാറ്ററി നിർമ്മിക്കുന്നതോടെ കമ്പനിക്ക് ലാഭം വർധിപ്പിക്കാൻ സാധിക്കുമെന്നു വിലയിരുത്തപ്പെടുന്നു.
