മുംബൈ: 2008ലെ സബ്‌പ്രൈം പ്രതിസന്ധി കാലത്തെ നിലവാരത്തിലേക്ക്‌ ഐടി ഓഹരികളുടെ മൂല്യം ഇടിഞ്ഞു. തുടര്‍ച്ചയായ ഇടിവിനെ തുടര്‍ന്നാണ്‌ ഐടി ഓഹരികളില്‍ മൂല്യചോര്‍ച്ചയുണ്ടായത്‌.
ടിസിഎസ്‌, ഇന്‍ഫോസിസ്‌, എച്ച്‌സിഎല്‍ ടെക്‌നോളജീസ്‌, വിപ്രോ എന്നീ ഐടി ഓഹരികളുടെ വിലയും പ്രതി ഓഹരി വരുമാനവും തമ്മിലുള്ള അനുപാതം (പ്രൈസ്‌ ടു ഏര്‍ണിംഗ്‌ റേഷ്യോ അഥവാ പി/ഇ) 15നും 18നും ഇടയിലാണ്‌.
നാല്‌ വര്‍ഷം മുമ്പത്തെ മൂല്യത്തിന്റെ പകുതിയാണ്‌ ഇപ്പോള്‍ ഐടി ഓഹരികള്‍ക്കുള്ളത്‌. 2026ല്‍ ഈ ഓഹരികള്‍ 30 ശതമാനത്തോളം ഇടിവാണ്‌ നേരിട്ടത്‌.
ആര്‍ട്ടിഫിഷ്യല്‍ ഇന്റലിജന്‍സ്‌ (എഐ) ടൂളുകള്‍ ഐടി കമ്പനികളുടെ ബിസിനസിന്‌ ഭീഷണിയാകുമെന്ന ആശങ്കയാണ്‌ ഓഹരികളുടെ ഇടിവിന്‌ വഴിവെച്ചത്‌. കഴിഞ്ഞ ഒരു മാസത്തിനിടെ നിഫ്‌റ്റി ഐടി സൂചിക 10.75 ശതമാനം ഇടിഞ്ഞു.
കോഡിംഗ്‌, ടെസ്റ്റിംഗ്‌, ഡിബഗ്ഗിംഗ്‌ തുടങ്ങിയവ ചെയ്യുന്നതിനുള്ള എഐയുടെ കാര്യക്ഷമത വര്‍ധിച്ചത്‌ ഐടി കമ്പനികളുടെ വരുമാനക്ഷമതയെ പ്രതികൂലമായി ബാധിക്കാവുന്നതാണ്‌. 52 ആഴ്‌ചത്തെ താഴ്‌ന്ന വിലയോട്‌ അടുത്തായാണ്‌ പല ഐടി ഓഹരികളും ഇപ്പോള്‍ വ്യാപാരം ചെയ്യുന്നത്‌.
