കൊച്ചി: തുടർച്ചയായ ആറാം വാരത്തിലും ഇന്ത്യയുടെ വിദേശ നാണയ ശേഖരം റെക്കാഡ് പുതുക്കി കുതിച്ചു. മാർച്ച് 29ന് അവസാനിച്ച വാരത്തിൽ വിദേശ നാണയ ശേഖരം 64,558 കോടി ഡോളറായാണ് ഉയർന്നത്.
അവലോകന കാലയളവിൽ മൊത്തം ശേഖരത്തിൽ 295 കോടി ഡോളറിന്റെ വർദ്ധനയുണ്ടായി. രൂപയുടെ മൂല്യത്തിലെ ചാഞ്ചാട്ടം നിയന്ത്രിക്കാൻ റിസർവ് ബാങ്ക് വിപണിയിൽ ഇടപെട്ടതാണ് ഡോളർ ശേഖരം കൂടാൻ ഇടയാക്കിയത്. സ്വർണ വിലയിലുണ്ടായ വർദ്ധനയും വിദേശ നാണയ ശേഖരം കൂടാൻ കാരണമായി.
ഇന്ത്യയുടെ ഓഹരി, കടപ്പത്ര വിപണികളിലേക്കുള്ള വിദേശ നിക്ഷേപ ഒഴുക്കിലെ വർദ്ധന കണക്കിലെടുത്ത് രൂപയുടെ മൂല്യവർദ്ധന പിടിച്ചുനിറുത്താൻ റിസർവ് ബാങ്ക് വിപണിയിൽ നിന്ന് വൻതോതിൽ ഡോളർ വാങ്ങികൂട്ടുകയാണെന്ന് ധനകാര്യ വിദഗ്ദ്ധർ പറയുന്നു.
