മുംബൈ: തുടക്കത്തിലുള്ള നേട്ടം നിലനിര്ത്തി മുന്നേറുകയാണ് ഇന്ത്യന് ബെഞ്ച് മാര്ക്ക് സൂചികകള്. സെന്സെക്സ് 421.62 പോയിന്റ് ഉയര്ന്ന് (0.71ശതമാനം) 59884.40 ത്തിലും നിഫ്റ്റി 122.60 പോയിന്റ് (0.69 ശതമാനം) നേട്ടത്തില് 17820.80 ത്തിലുമാണുള്ളത്. നിഫ്റ്റി നിര്ണ്ണായക 17800 ഭേദിച്ചത് ശ്രദ്ധേയമായി.
മൊത്തം 1814 ഓഹരികള് മുന്നേറുമ്പോള് 1147 ഓഹരികള് തിരിച്ചടി നേരിടുന്നു. 160 ഓഹരി വിലകളില് മാറ്റമില്ല. വാഹനം, റിയാലിറ്റി, ഉപഭോക്തൃ ഉത്പന്നങ്ങള് എന്നിവയുടെ 1 ശതമാനം നേട്ടമാണ് വിപണിയെ ഉയര്ത്തുന്നത്.
അവധി കാരണം വെട്ടിചുരുക്കപ്പെട്ട ആഴ്ചയില് വിപണി, സാമ്പത്തിക കണക്കുകളോട് പ്രതികരിക്കുകയാണെന്ന് റെലിഗാറിയിലെ അജിത് മിശ്ര നിരീക്ഷിച്ചു. ചൊവ്വാഴ്ച പുറത്തുവിട്ട വ്യാവസായിക ഉത്പാദന, ചെറുകിട പണപ്പെരുപ്പ കണക്കുകളാണ് വിപണിയെ ചലനാത്മകമാക്കുന്നത്. അതേസമയം ആഗോള സൂചികകള് ഇന്ന് മികച്ച പ്രകടനമാണ് കാഴ്ചവയ്ക്കുന്നത്.
ജപ്പാനീസ് നിക്കൈ, ഹോങ്കോങ് ഹാങ് സെങ് ഒഴികെയുള്ള ഏഷ്യന്, യൂറോപ്യന് വിപണികള് നേട്ടത്തിലായി. വാള് സ്ട്രീറ്റ് സൂചികകള് ഇന്നലെ ഉയര്ച്ച കൈവരിച്ചിരുന്നു.
