ന്യൂഡൽഹി: ആധുനിക യുദ്ധതന്ത്രങ്ങളിൽ ഡ്രോണുകളുടെ പ്രാധാന്യം വർദ്ധിച്ചുവരുന്ന പശ്ചാത്തലത്തിൽ, ചരിത്രത്തിലെ ഏറ്റവും വലിയ സൈനിക ഡ്രോൺ വിപണനത്തിനൊരുങ്ങി ഇന്ത്യ. പ്രതിരോധ മേഖല ശക്തിപ്പെടുത്തുന്നതിനായി 2 ബില്യൺ യുഎസ് ഡോളർ (ഏകദേശം 20,000 കോടി രൂപ) മൂല്യം വരുന്ന ഡ്രോണുകൾ വാങ്ങാനാണ് രാജ്യം ലക്ഷ്യമിടുന്നത്. വരും മാസങ്ങളിൽ നടപ്പിലാക്കാൻ പോകുന്ന ഈ പദ്ധതി ആഭ്യന്തര പ്രതിരോധ ഉത്പാദന മേഖലയ്ക്ക് വലിയ കുതിച്ചുചാട്ടമേകും.
അടുത്തിടെ റഷ്യൻ നഗരങ്ങൾക്ക് നേരെയുണ്ടായ ഡ്രോൺ ആക്രമണങ്ങൾ കുറഞ്ഞ ചെലവിലുള്ള ഇത്തരം ആയുധങ്ങൾ യുദ്ധമുഖത്തെ നിയമങ്ങളെ എങ്ങനെ മാറ്റിയെഴുതുന്നു എന്ന് ലോകത്തിന് കാണിച്ചുതന്നിരുന്നു. ഇന്ത്യയുടെ ‘ഓപ്പറേഷൻ സിന്ദൂർ’ ഉൾപ്പെടെയുള്ള മുൻകാല സൈനിക നീക്കങ്ങളിലും ഡ്രോണുകളുടെ പങ്ക് നിർണ്ണായകമായിരുന്നു. ഈ സാഹചര്യത്തിലാണ് അതിർത്തി സുരക്ഷയും നിരീക്ഷണവും ശക്തമാക്കാൻ വലിയ തോതിലുള്ള ഡ്രോൺ ശേഖരം സ്വന്തമാക്കാൻ രാജ്യം അടിയന്തര നടപടികളിലേക്ക് കടക്കുന്നത്.
ഈ ഭീമൻ കരാർ ലക്ഷ്യമിട്ട് രാജ്യത്തെ അറുന്നൂറിലധികം ഡ്രോൺ കമ്പനികളാണ് നിലവിൽ സജീവമായി രംഗത്തുള്ളത്. ഇതിൽ നൂറിലധികം കമ്പനികൾ പ്രതിരോധ ആവശ്യങ്ങൾക്കായുള്ള ഡ്രോൺ നിർമ്മാണത്തിൽ മാത്രം ശ്രദ്ധ കേന്ദ്രീകരിക്കുന്നവയാണ്. ടാറ്റ അഡ്വാൻസ്ഡ് സിസ്റ്റംസ്, അദാനി ഡിഫൻസ്, ഐഡിയഫോർജ് ടെക്നോളജി തുടങ്ങിയ പ്രമുഖ വൻകിട കമ്പനികളും ന്യൂസ്പേസ് റിസർച്ച്, റാഫേ എംഫിബർ തുടങ്ങിയ നിരവധി സ്റ്റാർട്ടപ്പുകളും ഈ വിപണിയിലെ തങ്ങളുടെ സ്വാധീനം ഉറപ്പിക്കാൻ മത്സരിക്കുന്നുണ്ട്.
കേവലം ഡ്രോണുകൾ വാങ്ങുന്നതിൽ മാത്രമല്ല, ഡ്രോൺ അധിഷ്ഠിത യുദ്ധമുറകളിലെ മുഴുവൻ സംവിധാനങ്ങളും വികസിപ്പിക്കാനാണ് ഇന്ത്യ ശ്രമിക്കുന്നത്. സെൻസറുകൾ, കമ്മ്യൂണിക്കേഷൻ സംവിധാനങ്ങൾ, കൃത്രിമബുദ്ധി, ഡ്രോൺ വിരുദ്ധ ആയുധങ്ങൾ എന്നിവ ഇതിൽ ഉൾപ്പെടുന്നു. സെപ്റ്റംബറിൽ പൊഖ്റാനിൽ നടന്ന വ്യോമസേനയുടെ ‘ഡ്രോണത്തോൺ’ പരീക്ഷണങ്ങളിൽ ഇത്തരം തദ്ദേശീയ സാങ്കേതികവിദ്യകൾ വിജയകരമായി പ്രദർശിപ്പിച്ചിരുന്നു. കൂടാതെ ഡിആർഡിഒ വികസിപ്പിക്കുന്ന ലേസർ അധിഷ്ഠിത കൗണ്ടർ-ഡ്രോൺ സംവിധാനങ്ങളും ഉത്പാദന ഘട്ടത്തിലേക്ക് കടക്കുകയാണ്.
വിപണി ഗവേഷണ കണക്കുകൾ പ്രകാരം ഇന്ത്യയിലെ സൈനിക ഡ്രോൺ വിപണി 2026-ൽ 811.4 മില്യൺ ഡോളറിൽ നിന്നും 2031 ആകുമ്പോഴേക്ക് 2.23 ബില്യൺ ഡോളറായി വളരുമെന്നാണ് പ്രതീക്ഷിക്കുന്നത്. അതായത് പ്രതിവർഷം 22.4 ശതമാനത്തിന്റെ മികച്ച വളർച്ചാ നിരക്കാണ് ഈ മേഖലയിൽ പ്രവചിക്കപ്പെടുന്നത്.
