Alt Image
രാജ്യത്തെ സ്വർണപ്പണയ വിപണിയിൽ ആഗോള ഭീമന്മാരുടെ മത്സരം ◆ ഇന്ത്യയിൽ കല്യാണ സീസണ്‍ തുടങ്ങുന്നു: 45 ദിവസത്തിനിടെ ആറരലക്ഷം കോടിയുടെ ബിസിനസ്! ◆ വിമാനക്ഷാമം പരിഹരിക്കാൻ പുതിയ നീക്കവുമായി ഇന്ത്യ; 1,000 വിമാനങ്ങൾ കൂടി ഓർഡർ ചെയ്യാൻ തയ്യാറാണെന്ന് പീയുഷ് ഗോയൽ ◆ ഇന്ത്യയിൽ നിന്നുള്ള സ്റ്റീൽ ഇറക്കുമതിക്ക് 9.5% അധിക തീരുവയുമായി യൂറോപ്യൻ യൂണിയൻ ◆ ചരിത്രം രചിച്ച് യുപിഐ ഇടപാടുകൾ; ആദ്യമായി 30 ലക്ഷം കോടിയിലേക്ക് ◆

സ്റ്റാർലിങ്കിന് കടുത്ത വെല്ലുവിളിയുമായി റിലയൻസ് ജിയോ; 1,600 ഉപഗ്രഹങ്ങൾ വിക്ഷേപിക്കാൻ പദ്ധതി

ഇലോൺ മസ്‌കിന്റെ സ്റ്റാർലിങ്കിന് കടുത്ത മത്സരം നൽകാനായി 1,600 ഉപഗ്രഹങ്ങൾ ഉൾപ്പെടുന്ന കൂറ്റൻ ബഹിരാകാശ ഇന്റർനെറ്റ് ശൃംഖല നിർമ്മിക്കാനുള്ള മാസ്റ്റർ പ്ലാനുമായി കമ്പനി മുന്നോട്ട്
ഇന്ത്യയുടെ സാറ്റലൈറ്റ് ഇന്റർനെറ്റ് വിപണിയിൽ വൻ മുന്നേറ്റത്തിന് തയ്യാറെടുത്ത് റിലയൻസ് ജിയോ.

ഇലോൺ മസ്‌കിന്റെ സ്റ്റാർലിങ്കിന് കടുത്ത മത്സരം നൽകാനായി 1,600 ഉപഗ്രഹങ്ങൾ ഉൾപ്പെടുന്ന കൂറ്റൻ ബഹിരാകാശ ഇന്റർനെറ്റ് ശൃംഖല നിർമ്മിക്കാനുള്ള മാസ്റ്റർ പ്ലാനുമായി കമ്പനി മുന്നോട്ട്. ബ്ലൂംബെർഗ് റിപ്പോർട്ട് പ്രകാരമുള്ള ഈ പദ്ധതിക്കായി ഇന്ത്യൻ നിർമ്മാണ കമ്പനികളെയും പ്രമുഖ ടെക്നോളജി സ്റ്റാർട്ടപ്പുകളെയും തന്ത്രപരമായ പങ്കാളികളാക്കാനുള്ള നീക്കത്തിലാണ് റിലയൻസ്.

രാജ്യത്ത് ഉപഗ്രഹ നിർമ്മാണ ശേഷി വൻതോതിൽ വർധിപ്പിക്കാനാണ് റിലയൻസിന്റെ ലക്ഷ്യം. നിലവിൽ ഇന്ത്യയിൽ പ്രതിവർഷം നിർമ്മിക്കപ്പെടുന്ന ഉപഗ്രഹങ്ങളുടെ എണ്ണം 15-ൽ താഴെയാണെന്നിരിക്കെ, പുതിയ പദ്ധതിക്കായി പ്രതിവർഷം ഏകദേശം 200 ഉപഗ്രഹങ്ങൾ നിർമ്മിക്കേണ്ടതുണ്ട്.

ഇതിനായി ആവശ്യമായ ഫാക്ടറികളും അടിസ്ഥാന സൗകര്യങ്ങളും വികസിപ്പിക്കുന്ന കമ്പനികൾക്ക് സാമ്പത്തിക പിന്തുണ നൽകാനും റിലയൻസ് തയ്യാറെടുക്കുന്നുണ്ട്. എങ്കിലും മുഴുവൻ ഉപഗ്രഹങ്ങളും ഇന്ത്യയിൽ മാത്രം നിർമ്മിക്കാതെ, അമേരിക്കയിൽ നിന്ന് 400 എണ്ണം വാങ്ങുന്നതുൾപ്പെടെയുള്ള വിദേശ പങ്കാളിത്തങ്ങളും കമ്പനി പരിശോധിക്കുന്നുണ്ട്.

2027 സെപ്റ്റംബറിൽ ആദ്യ പരീക്ഷണ വിക്ഷേപണം നടത്താനും, തുടർന്ന് 2028 ആദ്യം മുതൽ ഉപഗ്രഹങ്ങളുടെ വിപുലമായ വിന്യാസം ആരംഭിക്കാനുമാണ് ലക്ഷ്യമിടുന്നത്. ഔദ്യോഗിക കണക്കുകൾ പ്രകാരം 2035-ഓടെ 1,600 ഉപഗ്രഹങ്ങൾ അടങ്ങിയ ശൃംഖല പൂർത്തിയാക്കാനാണ് പദ്ധതി.

ഫൈബർ കണക്ഷനുകളോ മൊബൈൽ ടവറുകളോ എത്തിക്കാൻ പ്രയാസമുള്ള വിദൂര ഗ്രാമങ്ങളിലും അതിർത്തി മേഖലകളിലും അതിവേഗ സാറ്റലൈറ്റ് ഇന്റർനെറ്റ് എത്തിക്കാൻ ഈ നീക്കം ഏറെ സഹായിക്കും.

ഉപഗ്രഹങ്ങളുടെ നിർമ്മാണം, വിക്ഷേപണം, ചെലവ് എന്നിവയിലെ വെല്ലുവിളികൾ തരണം ചെയ്ത് ജിയോയ്ക്ക് ഈ രംഗത്ത് എത്രത്തോളം മുന്നേറാൻ കഴിയുമെന്നാണ് ഇപ്പോൾ ടെക് ലോകം ഉറ്റുനോക്കുന്നത്.

ഈ പദ്ധതി വിജയം കാണുകയാണെങ്കിൽ ഇന്ത്യയുടെ ബഹിരാകാശ വ്യവസായ രംഗത്തും വലിയ തൊഴിലവസരങ്ങൾക്കും പുതിയൊരു കുതിച്ചുചാട്ടമാകും അത് സമ്മാനിക്കുക.

X
Top