ആഗോള സ്മാര്ട്ട്ഫോണ് വിപണി കടുത്ത പ്രതിസന്ധിയിലേക്ക്. കൗണ്ടര്പോയിന്റ് റിസര്ച്ചിന്റെ ഏറ്റവും പുതിയ റിപ്പോര്ട്ടനുസരിച്ച്, 2026-ലെ രണ്ടാം പാദത്തില് ആഗോളതലത്തില് സ്മാര്ട്ട്ഫോണ് കയറ്റുമതിയില് 11 ശതമാനത്തിന്റെ ഇടിവാണ് രേഖപ്പെടുത്തിയത്. 2013-ലെ അവസ്ഥയ്ക്ക് സമാനമായ, കഴിഞ്ഞ 13 വര്ഷത്തിനിടയിലെ ഏറ്റവും താഴ്ന്ന നിരക്കിലേക്കാണ് കയറ്റുമതി കൂപ്പുകുത്തിയത്.
മെമ്മറി ചിപ്പുകളുടെ ലഭ്യതക്കുറവും വിലവര്ദ്ധനവും സ്മാര്ട്ട്ഫോണ് നിര്മ്മാണത്തെയും വിപണിയെയും ഗുരുതരമായി ബാധിച്ചിരിക്കുകയാണ്. എഐ ഡാറ്റാ സെന്ററുകള്ക്ക് മുന്ഗണന നല്കുന്നതിനാലാണ് സ്മാര്ട്ട്ഫോണ് നിര്മ്മാതാക്കള് മെമ്മറി പ്രതിസന്ധി നേരിടുന്നതെന്ന് റിപ്പോര്ട്ട് വ്യക്തമാക്കുന്നു.
സാംസങ് മുന്നില്, ആപ്പിളിന് തിരിച്ചടി
വിപണിയിലെ പ്രതികൂല സാഹചര്യങ്ങള്ക്കിടയിലും ആപ്പിളിനെ പിന്നിലാക്കി സാംസങ് ഒന്നാം സ്ഥാനം തിരിച്ചുപിടിച്ചു. 24 ശതമാനം വിപണി വിഹിതം സ്വന്തമാക്കിയാണ് സാംസങ് കുതിപ്പ് നടത്തിയത്. ഇന്ത്യയിലും മിഡില് ഈസ്റ്റിലും മികച്ച പ്രകടനം കാഴ്ചവെച്ച കമ്പനി, ഗാലക്സി എസ് 26 സീരീസിനുള്ള ശക്തമായ ഡിമാന്ഡിലൂടെയാണ് മുന്നേറിയത്.
അതേസമയം, ആപ്പിള് രണ്ടാം സ്ഥാനത്തേക്ക് പിന്തള്ളപ്പെട്ടെങ്കിലും, 20 ശതമാനം വിപണി വിഹിതവുമായി നേരിയ വളര്ച്ച കൈവരിക്കാന് കഴിഞ്ഞു. വിലവര്ദ്ധനവ് ഉപഭോക്താക്കളിലേക്ക് കൈമാറാത്ത ഒരേയൊരു പ്രമുഖ കമ്പനിയാണ് ആപ്പിള് എന്നതാണ് ശ്രദ്ധേയം. എന്നാല് ചൈനീസ് വിപണിയില് കമ്പനിക്ക് തിരിച്ചടി നേരിട്ടു.
പ്രതിസന്ധിക്ക് പിന്നില് മെമ്മറിക്ഷാമം
മെമ്മറി ചിപ്പുകളുടെ വിലക്കയറ്റം എന്ട്രി-ലെവല്, മിഡ്-റേഞ്ച് സ്മാര്ട്ട്ഫോണുകളുടെ ഉല്പ്പാദനച്ചെലവിനെ വലിയ രീതിയില് ബാധിച്ചു. ഇത് ഫോണുകളുടെ വില വര്ദ്ധിപ്പിക്കാനും, തല്ഫലമായി ആവശ്യക്കാര് കുറയാനും കാരണമായി. മെമ്മറി പ്രതിസന്ധിക്ക് പുറമെ, പശ്ചിമേഷ്യയിലെ സംഘര്ഷങ്ങളും ആഗോള വിപണിക്ക് വെല്ലുവിളിയാണ്.
എണ്ണവിലയിലും ഷിപ്പിംഗ് ചെലവിലും വന്ന വര്ദ്ധനവ് സ്മാര്ട്ട്ഫോണ് വ്യവസായത്തെ ആകെ പ്രതിസന്ധിയിലാക്കി. ഈ സാഹചര്യത്തില് ഉപഭോക്താക്കള് പുതിയ ഫോണുകള് വാങ്ങുന്നത് മാറ്റിവെക്കുകയോ പഴയ മോഡലുകളില് തുടരാന് തീരുമാനിക്കുകയോ ചെയ്യുന്നതാണ് കയറ്റുമതി കുറയാന് മറ്റൊരു പ്രധാന കാരണം.
പ്രതിസന്ധി 2027 വരെ തുടരും
2026 വര്ഷം മുഴുവന് വിപണിക്ക് കഠിനമായിരിക്കുമെന്നും കയറ്റുമതിയില് 14 ശതമാനത്തോളം കുറവ് സംഭവിക്കാമെന്നുമാണ് റിപ്പോര്ട്ടിന്റെ പ്രവചനം. മെമ്മറി ക്ഷാമം 2027 വരെ നീണ്ടുനില്ക്കുമെന്നതിനാല്, വിപണിയിലെ ഈ മാന്ദ്യം തുടരാനാണ് സാധ്യത.
ഇതിനെ അതിജീവിക്കാന് ഫോണ് നിര്മ്മാതാക്കള് പുതിയ തന്ത്രങ്ങള് ആവിഷ്കരിക്കുകയാണ്. കുറഞ്ഞ ലാഭമുള്ള മോഡലുകള് വെട്ടിക്കുറച്ചും, പഴയ മോഡലുകള്ക്ക് മുന്ഗണന നല്കിയും, വോളിയത്തേക്കാള് ഉപരിയായി മൂല്യത്തിന് മുന്ഗണന നല്കാനാണ് കമ്പനികള് ഇപ്പോള് ശ്രമിക്കുന്നത്.
എങ്കിലും, പ്രീമിയം ഫോണുകളുടെ വിപണിയില് മികച്ച വളര്ച്ച തുടരുമെന്ന് വിദഗ്ധര് വിലയിരുത്തുന്നു.
