മുംബൈ: ഫിൻലാൻഡ് ആസ്ഥാനമായുള്ള പ്രമുഖ മൾട്ടിനാഷണൽ സ്റ്റെയിൻലെസ് സ്റ്റീൽ നിർമ്മാതാക്കളായ ഔട്ടോകുമ്പുവിൽ നിന്ന് 5 വർഷത്തെ കരാർ സ്വന്തമാക്കി ഐടി പ്രമുഖരായ വിപ്രോ. ഈ അഞ്ച് വർഷത്തെ കരാർ വിപ്രോയുടെയും ഔട്ട്കുമ്പുവിന്റെയും നിലവിലുള്ള എട്ട് വർഷത്തെ പങ്കാളിത്തത്തെ ശക്തിപ്പെടുത്തുന്നു.
ആപ്ലിക്കേഷനുകൾക്കായുള്ള കമ്പനിയുടെ ക്ലൗഡ് പരിവർത്തനം ത്വരിതപ്പെടുത്തുന്നതിന് വിപ്രോയുമായി ഒരു തന്ത്രപരമായ കരാർ പ്രഖ്യാപിച്ച് ഔട്ടോകുമ്പു. അടുത്ത തലമുറ ആപ്ലിക്കേഷനുകൾ വിതരണം ചെയ്യുന്നതിലൂടെയും കമ്പനിയുടെ കോർപ്പറേറ്റ്, ഫാക്ടറി ആപ്ലിക്കേഷനുകൾക്കായി മൈക്രോസോഫ്റ്റ് അസൂർ പവർഡ് പ്ലാറ്റ്ഫോം നിർമ്മിക്കുന്നതിലൂടെയും ഡാറ്റാധിഷ്ഠിതവും സുസ്ഥിരത കേന്ദ്രീകൃതവുമായ സ്ഥാപനമായി മാറുക എന്ന ലക്ഷ്യത്തിലെത്താൻ ഈ കരാർ ഔട്ടോകുമ്പുവിനെ സഹായിക്കും.
കൂടാതെ, വിപ്രോയുടെ ഓൺ-ഡിമാൻഡ് പ്ലാറ്റ്ഫോം വൈദ്യുതി ഉപഭോഗം കുറയ്ക്കുകയും ഔട്ട്കുമ്പുവിന്റെ ഐടി ഇൻഫ്രാസ്ട്രക്ചറുമായി ബന്ധപ്പെട്ട കാർബൺ കാൽപ്പാടുകൾ കുറയ്ക്കുകയും ചെയ്യും.
ക്ലയന്റുകളുടെ ഏറ്റവും സങ്കീർണ്ണമായ ഡിജിറ്റൽ പരിവർത്തന ആവശ്യങ്ങൾ പരിഹരിക്കുന്ന നൂതന പരിഹാരങ്ങൾ നിർമ്മിക്കുന്നതിൽ ശ്രദ്ധ കേന്ദ്രീകരിക്കുന്ന ഒരു പ്രമുഖ സാങ്കേതിക സേവന കൺസൾട്ടിംഗ് കമ്പനിയാണ് വിപ്രോ. വിപ്രോയുടെ ഓഹരികൾ 1.61 ശതമാനം ഉയർന്ന് 381.05 രൂപയിലെത്തി.
