Alt Image
സമ്പദ്‌വ്യവസ്ഥയുടെ വളർച്ചയിൽ നേരിയ ഇടിവുണ്ടാകുമെന്ന് ഐസിആർഎ; രണ്ടാം പാദത്തിൽ 7.5% മാത്രം, കാർഷിക മേഖലയിൽ വലിയ തിരിച്ചടി ◆ രത്ന, ആഭരണ കയറ്റുമതിയിൽ 34 ശതമാനം കുതിപ്പ് ◆ രാജ്യത്തെ സ്വർണപ്പണയ വിപണിയിൽ ആഗോള ഭീമന്മാരുടെ മത്സരം ◆ ഇന്ത്യയിൽ കല്യാണ സീസണ്‍ തുടങ്ങുന്നു: 45 ദിവസത്തിനിടെ ആറരലക്ഷം കോടിയുടെ ബിസിനസ്! ◆ വിമാനക്ഷാമം പരിഹരിക്കാൻ പുതിയ നീക്കവുമായി ഇന്ത്യ; 1,000 വിമാനങ്ങൾ കൂടി ഓർഡർ ചെയ്യാൻ തയ്യാറാണെന്ന് പീയുഷ് ഗോയൽ ◆

യുഎസ് ഫെഡറൽ റിസർവ് വായ്പാനയം ഡിസംബർ ഒമ്പതിന്

കൊച്ചി: ആഗോള സാമ്പത്തിക വിപണിയിലെ ചലനങ്ങൾക്കൊപ്പം സ്വർണവിലയിലും വലിയ മാറ്റങ്ങളാണ് രേഖപ്പെടുത്തിക്കൊണ്ടിരിക്കുന്നത്. അമേരിക്കൻ കേന്ദ്ര ബാങ്കായ യുഎസ് ഫെഡറൽ റിസർവിന്റെ വായ്പാനയ തീരുമാനങ്ങളാണ് നിലവിൽ സ്വർണവിപണിയുടെ ഗതി നിർണയിക്കുന്ന പ്രധാനഘടകം.

ഫെഡറൽ റിസർവിന്റെ അടുത്ത നിർണായക യോഗം 2026 ഡിസംബർ എട്ട്, ഒമ്പത് തീയതികളിലാണ് ചേരുന്നത്. ഡിസംബർ ഒമ്പതിന് പ്രഖ്യാപിക്കുന്ന വായ്പാനയത്തിനായി ആകാംക്ഷയോടെ കാത്തിരിക്കുകയാണ് ആഗോള നിക്ഷേപകർ.

സാധാരണഗതിയിൽ യുഎസ് ഫെഡറൽ റിസർവ് പലിശനിരക്ക് കുറയ്ക്കുമ്പോൾ സ്വർണവില ഉയരുകയും, പലിശനിരക്ക് ഉയർത്തുമ്പോൾ സ്വർണവില കുറയുകയുമാണ് ചെയ്യാറുള്ളത്. സ്വർണം നിക്ഷേപകർക്ക് നേരിട്ട് പലിശ നൽകാത്ത ആസ്തിയായതിനാൽ, അമേരിക്കൻ പലിശനിരക്കും ട്രഷറി ബോണ്ട് യീൽഡും ഉയരുമ്പോൾ നിക്ഷേപകർ സ്വർണത്തിൽ നിന്ന് പണം പിൻവലിച്ച് ബോണ്ടുകളിലേക്കും ഡോളറിലേക്കും മാറുന്നു. ഇതോടെ ഡോളർ ശക്തിപ്പെടുകയും അന്താരാഷ്ട്ര വിപണിയിൽ സ്വർണവില താഴേക്ക് പതിക്കുകയും ചെയ്യും.

2026 ജനുവരിയിൽ ഔൺസിന് 5,595 ഡോളർ എന്ന സർവകാല റെക്കോർഡ് നിരക്കിലേക്ക് എത്തിയ സ്വർണവില പിന്നീട് വലിയ തിരുത്തലുകൾക്ക് വിധേയമായിരുന്നു. പശ്ചിമേഷ്യൻ സംഘർഷങ്ങളെ തുടർന്ന് അസംസ്‌കൃത എണ്ണവില ബാരലിന് 120 ഡോളറിലേക്ക് കുതിച്ചതും തുടർന്നുണ്ടായ പണപ്പെരുപ്പ ഭീഷണിയുമാണ് ഫെഡറൽ റിസർവിനെ വീണ്ടും കർശന നിലപാടിലേക്ക് നയിച്ചത്.

സെപ്റ്റംബറിൽ പലിശനിരക്ക് 25 ബേസിസ് പോയിന്റ് ഉയർത്തി 3.75% – നാല് ശതമാനം പരിധിയിൽ എത്തിച്ച ഫെഡ്, ഒക്ടോബർ യോഗത്തിൽ നിരക്കുകളിൽ മാറ്റം വരുത്തിയിരുന്നില്ല. എന്നാൽ ഡിസംബറിലെ യോഗത്തിൽ വീണ്ടും 25 ബേസിസ് പോയിന്റ് നിരക്ക് വർധനവുണ്ടാകുമെന്നാണ് വിപണി വിലയിരുത്തുന്നത്.

വില ഇനിയും കുറയുമോ എന്ന ചോദ്യത്തിന് ഹ്രസ്വകാലയളവിൽ സ്വർണവിലയിൽ സമ്മർദം തുടരുമെന്നാണ് പ്രമുഖ ധനകാര്യ സ്ഥാപനങ്ങളുടെ വിലയിരുത്തൽ. നിലവിൽ സ്വർണത്തിന്റെ ഏറ്റവും വലിയ ശത്രു പശ്ചിമേഷ്യൻ വാർത്തകളല്ല, മറിച്ച് ഉയർന്ന ട്രഷറി യീൽഡും ഫെഡറൽ റിസർവിന്റെ പലിശ വർധനവ് സംബന്ധിച്ച പ്രതീക്ഷകളുമാണെന്ന് പ്രമുഖ സാമ്പത്തിക മാധ്യമമായ ഇൻവെസ്റ്റിങ് ലൈവ് റിപ്പോർട്ട് ചെയ്യുന്നു.

ഫെഡ് പലിശനിരക്ക് ഉയർത്തുന്നത് തുടരുന്നിടത്തോളം കാലം സ്വർണത്തിന് വിപണിയിൽ പുതിയ വാങ്ങലുകാരെ കണ്ടെത്താൻ പ്രയാസമായിരിക്കുമെന്നും റിപ്പോർട്ടിൽ ചൂണ്ടിക്കാട്ടുന്നു.

പ്രമുഖ ആഗോള ബാങ്കിങ് ഭീമനായ എഎൻസെഡ് അനലിസ്റ്റുകളുടെ അഭിപ്രായത്തിൽ, ഡിസംബർ, ജനുവരി, മാർച്ച് മാസങ്ങളിൽ 25 ബേസിസ് പോയിന്റ് വീതം പലിശ വർധനവുണ്ടാകാനാണ് സാധ്യത. കൂടുതൽ നിരക്ക് വർധനവുകൾ ഹ്രസ്വകാലയളവിൽ സ്വർണവിലയിലെ തിരുത്തലിന് ആഴം കൂട്ടിയേക്കാം, വില ഔൺസിന് 3,600 ഡോളർ വരെ താഴാൻ സാധ്യതയുണ്ടെന്ന് എഎൻസെഡ് വിദഗ്ധർ മുന്നറിയിപ്പ് നൽകുന്നു.

എങ്കിലും ഇടത്തരം മുതൽ ദീർഘകാലയളവിലേക്ക് സ്വർണവിപണിയിൽ ശുഭാപ്തിവിശ്വാസം നിലനിൽക്കുന്നതായും 2027-ഓടെ വില 4,800 ഡോളറിലേക്ക് തിരിച്ചെത്തുമെന്നും ഇവർ പ്രവചിക്കുന്നു.

മറ്റൊരു പ്രമുഖ നിക്ഷേപ ബാങ്കായ ഗോൾഡ്മാൻ സാക്‌സ് 2026 അവസാനത്തേക്കുള്ള സ്വർണവില 4,650 ഡോളറിൽ നിന്ന് 4,150 ഡോളറായി വെട്ടിക്കുറച്ചിട്ടുണ്ട്. ഫെഡറൽ റിസർവിന്റെ കർശനമായ പണനയം പലിശനിരക്ക് കുറയുമ്പോൾ സ്വർണത്തിന് സാധാരണ ലഭിക്കാറുള്ള പിന്തുണയെ തടയുകയാണെന്ന് ഗോൾഡ്മാൻ സാക്‌സ് അനലിസ്റ്റുകളായ ലിന തോമസ്, ഡാൻ സ്ട്രുവെൻ എന്നിവർ വ്യക്തമാക്കുന്നു. 2027 അവസാനത്തോടെ ഫെഡ് വീണ്ടും പലിശനിരക്ക് കുറച്ചു തുടങ്ങുന്നതോടെ മാത്രമേ സ്വർണം വീണ്ടും വലിയ മുന്നേറ്റത്തിലേക്ക് കടക്കുകയുള്ളൂ എന്നും ഇവർ നിരീക്ഷിക്കുന്നു.

ഡോളർ സൂചിക ശക്തി പ്രാപിക്കുന്നതും സ്വർണവില കുറയാൻ കാരണമാകുന്നുണ്ടെന്ന് ആക്‌സിസ് സെക്യൂരിറ്റീസ് ചൂണ്ടിക്കാട്ടുന്നു. ഡോളർ സൂചികയിൽ അടുത്തിടെയുണ്ടായ നാല് ശതമാനത്തോളം വർധന സ്വർണവിലയിൽ സമ്മർദം ചെലുത്തുന്നുണ്ട്. കൂടാതെ, റെക്കോഡ് ഉയരത്തിലെത്തിയ ശേഷം നിക്ഷേപകർ ലാഭമെടുപ്പ് നടത്തുന്നതും വിപണിയിൽ വിലയിടിവിന് ആക്കം കൂട്ടിയതായി ഫോർച്യൂൺ ഇന്ത്യ റിപ്പോർട്ട് ചെയ്യുന്നു.

ചുരുക്കത്തിൽ, ഡിസംബർ എട്ട്, ഒമ്പത് തീയതികളിൽ നടക്കുന്ന ഫെഡറൽ റിസർവ് യോഗത്തിലെ തീരുമാനങ്ങളും തുടർന്നുള്ള പണപ്പെരുപ്പ കണക്കുകളുമായിരിക്കും വരും ആഴ്ചകളിലെ സ്വർണവില നിർണയിക്കുക.

പലിശനിരക്ക് വർധനവ് തുടരുകയാണെങ്കിൽ ഹ്രസ്വകാലയളവിൽ സ്വർണവിലയിൽ ഇനിയും ഇടിവുണ്ടാകാൻ സാധ്യതയുണ്ട്. എന്നാൽ വിവിധ രാജ്യങ്ങളിലെ കേന്ദ്ര ബാങ്കുകൾ കരുതൽ ശേഖരത്തിലേക്ക് സ്വർണം വാങ്ങിക്കൂട്ടുന്നത് തുടരുന്നതിനാൽ, വിലയിൽ വലിയൊരു തകർച്ചയ്ക്ക് സാധ്യതയില്ലെന്നും ദീർഘകാല നിക്ഷേപകർക്ക് വിലക്കുറവ് മികച്ച അവസരമാണെന്നുമാണ് വിപണി വിദഗ്ധരുടെ പൊതുവായ വിലയിരുത്തൽ.

X
Top