Alt Image
വികസ്വര രാജ്യങ്ങളുടെ വിദേശകടം 9.4 ട്രില്യണ്‍ ഡോളറിലെത്തി ◆ 1.11 ലക്ഷം കോടി ചെലവുള്ള ഇന്ത്യയുടെ രണ്ട് വൻ അന്തർവാഹിനി പദ്ധതികൾക്ക് അന്തിമാനുമതി ഉടൻ ◆ ആഗോള സ്വർണശക്തിയാകാൻ ഇന്ത്യ; പദ്ധതിയുടെ രൂപരേഖ നിതി ആയോഗ് വൈകാതെ അവതരിപ്പിച്ചേക്കും ◆ മൊത്തവില സൂചിക 12.29 ശതമാനമായി ഉയർന്നു ◆ ആഗോള ഡീസൽ ക്ഷാമം: ഇന്ത്യൻ എണ്ണശുദ്ധീകരണ കമ്പനികൾക്ക് നേട്ടമാകുമെന്ന് റിപ്പോർട്ട് ◆

വികസ്വര രാജ്യങ്ങളുടെ വിദേശകടം 9.4 ട്രില്യണ്‍ ഡോളറിലെത്തി

ന്യൂയോർക്ക്: ലോകത്തെ താഴ്ന്ന, ഇടത്തരം വരുമാനമുള്ള രാജ്യങ്ങള്‍ കടുത്ത കടബാധ്യതയിലേക്ക് നീങ്ങുന്നതായി ലോകബാങ്കിന്റെ മുന്നറിയിപ്പ്. 2025ല്‍ ഈ രാജ്യങ്ങളുടെ വിദേശകടം റെക്കോര്‍ഡ് 9.4 ട്രില്യണ്‍ ഡോളറിലെത്തി.

കടമെടുക്കുന്ന തുക വര്‍ധിക്കുന്നതിനൊപ്പം തിരിച്ചടവിനും പലിശയ്ക്കുമായി ചെലവഴിക്കേണ്ട തുകയും ഉയരുകയാണ്. ഏറ്റവും ദരിദ്രമായ രാജ്യങ്ങള്‍ക്കുപോലും കഴിഞ്ഞ നാല് പതിറ്റാണ്ടിനിടയിലെ ഏറ്റവും ഉയര്‍ന്ന പലിശനിരക്കിലാണ് വായ്പ ലഭിക്കുന്നതെന്നതാണ് ആശങ്ക വര്‍ധിപ്പിക്കുന്നത്.

വിദേശകടത്തില്‍ 5.5 ശതമാനം വര്‍ധന
ലോകബാങ്കിന്റെ ഇന്റര്‍നാഷണല്‍ ഡെബ്റ്റ് റിപ്പോര്‍ട്ട് 2026 പ്രകാരം, താഴ്ന്ന, ഇടത്തരം വരുമാനമുള്ള രാജ്യങ്ങളുടെ വിദേശകടം 2024ലെ 8.9 ട്രില്യണ്‍ ഡോളറില്‍നിന്ന് 2025ല്‍ 9.4 ട്രില്യണ്‍ ഡോളറായി ഉയര്‍ന്നു. 5.5 ശതമാനത്തിന്റെ വര്‍ധനയാണ് രേഖപ്പെടുത്തിയത്. 2021ന് ശേഷമുള്ള ഏറ്റവും വലിയ വാര്‍ഷിക വര്‍ധനയാണിത്.

പുതിയ വായ്പകളുടെ വര്‍ധന, സ്വകാര്യ വായ്പാദാതാക്കളുടെ തിരിച്ചുവരവ്, യുഎസ് ഡോളറിന്റെ മൂല്യത്തിലുണ്ടായ ഇടിവ് എന്നിവയാണ് വിദേശകടം ഉയരാന്‍ പ്രധാന കാരണങ്ങളായത്. ഡോളറിന്റെ മൂല്യം കുറഞ്ഞതോടെ മറ്റു കറന്‍സികളിലുള്ള കടങ്ങളുടെ ഡോളര്‍ മൂല്യത്തിലും വര്‍ധനയുണ്ടായി.

തിരിച്ചടവിനായി ചെലവഴിക്കുന്നത് 1.4 ട്രില്യണ്‍ ഡോളര്‍
കടം വര്‍ധിക്കുന്നതിനൊപ്പം തിരിച്ചടവിന്റെ സമ്മര്‍ദവും ശക്തമാകുകയാണ്. 2025ല്‍ ഈ രാജ്യങ്ങള്‍ മുതലും പലിശയും ഉള്‍പ്പെടെ തിരിച്ചടവിനായി ചെലവഴിച്ചത് 1.4 ട്രില്യണ്‍ ഡോളറാണ്. 2024നെ അപേക്ഷിച്ച് 1.9 ശതമാനം വര്‍ധന.

തുടര്‍ച്ചയായ അഞ്ചാം വര്‍ഷമാണ് കടം തിരിച്ചടയ്ക്കാനുള്ള ചെലവ് ഉയരുന്നത്. 2022 മുതല്‍ 2025 വരെയുള്ള കാലയളവില്‍ പുതിയ വായ്പകളിലൂടെ ലഭിച്ചതിനേക്കാള്‍ 436.1 ബില്യണ്‍ ഡോളര്‍ അധികമാണ് ഈ രാജ്യങ്ങള്‍ കടം തിരിച്ചടയ്ക്കുന്നതിനായി ചെലവഴിച്ചത്.

അതായത്, പുതിയ ധനസഹായമായി ലഭിക്കുന്ന തുകയുടെ വലിയൊരു ഭാഗം വികസന പ്രവര്‍ത്തനങ്ങള്‍ക്കുപകരം പഴയ കടങ്ങള്‍ തിരിച്ചടയ്ക്കാനാണ് ഉപയോഗിക്കേണ്ടിവരുന്നത്. ബോണ്ട് ഉടമകള്‍ക്ക് നല്‍കുന്ന തിരിച്ചടവും വര്‍ധിച്ചു. 2025ല്‍ ബോണ്ട് ഉടമകള്‍ക്കുള്ള പേയ്‌മെന്റുകള്‍ 13.7 ശതമാനം ഉയര്‍ന്ന് 363.1 ബില്യണ്‍ ഡോളറിലെത്തി.

വായ്പയുടെ പലിശ നാല് പതിറ്റാണ്ടിലെ ഉയര്‍ന്ന നിലയില്‍
ഏറ്റവും ആശങ്കാജനകമായ സാഹചര്യം വായ്പയുടെ പലിശനിരക്കിലാണ്. ഇന്റര്‍നാഷണല്‍ ഡെവലപ്‌മെന്റ് അസോസിയേഷന്‍ അഥവാ IDA വഴി ധനസഹായം ലഭിക്കുന്ന രാജ്യങ്ങള്‍ 2025ല്‍ പുതിയ വായ്പകള്‍ക്ക് ശരാശരി 8.2 ശതമാനം പലിശ നല്‍കേണ്ടിവന്നു.

1980കളുടെ അവസാനത്തിനു ശേഷമുള്ള ഏറ്റവും ഉയര്‍ന്ന നിരക്കാണിത്. ബോണ്ട് വിപണികളില്‍നിന്ന് വായ്പയെടുക്കുമ്പോള്‍ ശരാശരി പലിശ 9.4 ശതമാനമായി ഉയര്‍ന്നു. അതേസമയം, ഇന്റര്‍നാഷണല്‍ ബാങ്ക് ഫോര്‍ റീകണ്‍സ്ട്രക്ഷന്‍ ആന്‍ഡ് ഡെവലപ്‌മെന്റില്‍നിന്ന് വായ്പയെടുക്കുന്നവര്‍ക്ക് ശരാശരി 5.5 ശതമാനമാണ് പലിശ.

2024ല്‍ ഇത് 5.8 ശതമാനമായിരുന്നു. അതായത്, സാമ്പത്തികമായി ഏറ്റവും പിന്നാക്കം നില്‍ക്കുന്ന രാജ്യങ്ങള്‍ക്കാണ് കൂടുതല്‍ പലിശഭാരം നേരിടേണ്ടിവരുന്നത്. ‘വായ്പയെടുക്കാന്‍ ഏറ്റവും കുറഞ്ഞ ശേഷിയുള്ള രാജ്യങ്ങളാണ് ഏറ്റവും കൂടുതല്‍ പലിശ നല്‍കുന്നത്’ എന്നാണ് ലോകബാങ്കിന്റെ നിരീക്ഷണം.

സ്വകാര്യ നിക്ഷേപകരുടെ തിരിച്ചുവരവും കടം വര്‍ധിപ്പിക്കുന്നു
വികസ്വര രാജ്യങ്ങളിലേക്കുള്ള സ്വകാര്യ വായ്പാദാതാക്കളുടെ തിരിച്ചുവരവും റിപ്പോര്‍ട്ടില്‍ എടുത്തുപറയുന്നുണ്ട്. സ്വകാര്യ വായ്പാദാതാക്കളോടുള്ള ഈ രാജ്യങ്ങളുടെ കടം 5.2 ശതമാനം ഉയര്‍ന്ന് 5 ട്രില്യണ്‍ ഡോളറായി.

2025ല്‍ പൊതുമേഖലാ ബോണ്ട് ഇഷ്യൂവന്‍സുകള്‍ 34.6 ശതമാനം വര്‍ധിച്ച് 250.6 ബില്യണ്‍ ഡോളറിലെത്തി. 2021ന് ശേഷമുള്ള ഏറ്റവും ഉയര്‍ന്ന നിരക്കാണിത്. 2026ലും കടമെടുക്കല്‍ കുറയുന്നതിന്റെ സൂചനകളില്ല. ജനുവരി മുതല്‍ ഓഗസ്റ്റ് വരെയുള്ള പ്രാഥമിക കണക്കുകള്‍ പ്രകാരം ബോണ്ട് വിപണിയിലെ ഇടപാടുകള്‍ ശക്തമായി തുടരുകയാണ്. ചില രാജ്യങ്ങള്‍ 2025ലെ മുഴുവന്‍ വര്‍ഷത്തെ ബോണ്ട് ഇഷ്യൂവന്‍സ് നിലവാരം പോലും മറികടന്നിട്ടുണ്ട്.

വികസന പ്രവര്‍ത്തനങ്ങള്‍ക്കും തിരിച്ചടി
ഉയര്‍ന്ന പലിശയും കടം തിരിച്ചടയ്ക്കാനുള്ള വര്‍ധിച്ച ചെലവും സര്‍ക്കാരുകളുടെ സാമ്പത്തിക പ്രവര്‍ത്തനങ്ങളെ പരിമിതപ്പെടുത്തുമെന്ന് ലോകബാങ്ക് മുന്നറിയിപ്പ് നല്‍കുന്നു. വിദ്യാഭ്യാസം, ആരോഗ്യം, അടിസ്ഥാനസൗകര്യ വികസനം തുടങ്ങിയ മേഖലകള്‍ക്കായി ചെലവഴിക്കാനുള്ള സര്‍ക്കാരുകളുടെ സാമ്പത്തിക ശേഷി ഇതോടെ കുറയാം.

പുതിയ പദ്ധതികള്‍ക്കായി പണം കണ്ടെത്തുന്നതിനുപകരം പഴയ കടങ്ങള്‍ തിരിച്ചടയ്ക്കുന്നതിന് കൂടുതല്‍ തുക മാറ്റിവെക്കേണ്ട സാഹചര്യമാണുള്ളത്. കടം പുതുക്കിയെടുക്കുന്നതിനുള്ള ചെലവും ഉയരുന്നത് രാജ്യങ്ങളുടെ സാമ്പത്തിക അപകടസാധ്യത വര്‍ധിപ്പിക്കുന്നു.

ചുരുക്കത്തില്‍, കടമെടുത്ത് വികസനം മുന്നോട്ടുകൊണ്ടുപോകാന്‍ ശ്രമിക്കുന്ന രാജ്യങ്ങള്‍ ഇപ്പോള്‍ കടത്തിന്റെ തിരിച്ചടവ് തന്നെ വലിയ പ്രതിസന്ധിയായി നേരിടുകയാണ്. ആഗോള സാമ്പത്തിക സാഹചര്യങ്ങളില്‍ മാറ്റമുണ്ടായില്ലെങ്കില്‍ ദരിദ്ര രാജ്യങ്ങളുടെ സാമ്പത്തിക വളര്‍ച്ചയ്ക്കും വികസന ലക്ഷ്യങ്ങള്‍ക്കും ഈ കടക്കെണി വലിയ വെല്ലുവിളിയാകുമെന്നാണ് ലോകബാങ്കിന്റെ മുന്നറിയിപ്പ്.

X
Top