തിരുവനന്തപുരം: സുസ്ഥിര സാങ്കേതിക വിദ്യകളെ കുറിച്ചുള്ള അന്താരാഷ്ട്ര സമ്മേളനത്തിന് എൽബിഎസ് പൂജപ്പുര വനിതാ എഞ്ചിനീയറിംഗ് കോളേജിൽ തുടക്കമായി. പരിസ്ഥിതി ആഘാതം കുറയ്ക്കുന്നതിനും വിഭവ കാര്യക്ഷമത പ്രോത്സാഹിപ്പിക്കുന്നതിനും ദീർഘകാല സാമ്പത്തിക സാമൂഹിക ക്ഷേമം വളർത്തുന്നതിനും സഹായിക്കുന്ന നൂതന ആശയങ്ങളും അതിനുള്ള സാങ്കേതികവിദ്യയും വ്യാഴം,വെളളി,ശനി ദിവസങ്ങളിലായി നടക്കുന്ന സമ്മേളനത്തിൽ അവതരിപ്പിക്കും. വിദ്യാഭാസ വിദഗ്ദ്ധർ, ഗവേഷകർ, പ്രാക്ടിസിംഗ് എൻജിനീയർമാർ, വിദ്യാർഥികൾ എന്നിവർ സമ്മേളനത്തിൽ പങ്കെടുക്കുന്നു.
ഇരുന്നൂറിൽപരം പ്രബന്ധങ്ങളാണ് മൂന്ന് ദിവസങ്ങളായി നടക്കുന്ന സമ്മേളനത്തിൽ അവതരിപ്പിക്കുന്നത്. പൂജപ്പുര കാംപസിൽ നടന്ന ഉദ്ഘാടന ചടങ്ങിൽ നബാർഡ് കേരളം ചീഫ് ജനറൽ മാനേജർ നാഗേഷ്കുമാർ അനുമല മുഖ്യാതിഥിയായി. എൽബിഎസ് സെന്റർ ഡയറക്ടർ ഡോ. എം അബ്ദുൽ റഹ്മാൻ അധ്യക്ഷത വഹിച്ചു. ഇന്സ്ടിട്യൂഷൻ ഓഫ് എഞ്ചിനീയർസ് കേരള ചെയർമാൻ ഉദയകുമാർ, എൽബിഎസ് ജോയിന്റ് ഡയറക്ടർ ഡോ. ജെ ജയമോഹൻ, ഇന്സ്ടിട്യൂഷൻ ഓഫ് എഞ്ചിനീയർസ് കേരളം സെക്രട്ടറി ജഗദീശ്ശ ചന്ദ്ര പിഷാരടി, ബാലകൃഷ്ണൻ നായർ, പ്രിസിപ്പൽ ഡോ. എംബി സ്മിതമോൾ, ഡോ. ഇ. എൻ. അനിൽകുമാർ, കോളേജ് യൂണിയൻ ചെയർപേഴ്സൺ കീർത്തന മനോജ് എന്നിവർ പ്രസംഗിച്ചു.
