ന്യൂഡൽഹി: ഇന്ത്യയില്‍ കണ്ടെയ്നര്‍ നിര്‍മാണ മേഖലയ്ക്ക് വന്‍ ഉത്തേജനം നല്‍കാന്‍ കേന്ദ്രസര്‍ക്കാര്‍. 10,000 കോടി രൂപയുടെ കണ്ടെയ്നര്‍ നിര്‍മാണ പ്രോത്സാഹന പദ്ധതിക്ക് കേന്ദ്ര മന്ത്രിസഭ അംഗീകാരം നല്‍കി. രാജ്യത്ത് തന്നെ ഷിപ്പിങ് കണ്ടെയ്നറുകള്‍ നിര്‍മിക്കുന്നത് പ്രോത്സാഹിപ്പിക്കുക, ഇറക്കുമതിയെ ആശ്രയിക്കുന്നത് കുറയ്ക്കുക, തൊഴിലവസരങ്ങള്‍ വര്‍ധിപ്പിക്കുക എന്നിവയാണ് പദ്ധതിയുടെ പ്രധാന ലക്ഷ്യങ്ങള്‍. 2039-40 സാമ്പത്തിക വര്‍ഷം വരെയുള്ള 13 വര്‍ഷക്കാലയളവിലേക്കാണ് പദ്ധതിക്ക് 10,000 കോടി രൂപയുടെ ആകെ വിഹിതം അനുവദിച്ചിരിക്കുന്നത്. ഇതിലൂടെ ഏകദേശം 3,000 നേരിട്ടുള്ള തൊഴിലവസരങ്ങളും 50,000-ത്തിലധികം പരോക്ഷ തൊഴിലവസരങ്ങളും സൃഷ്ടിക്കാനാകുമെന്നാണ് പ്രതീക്ഷ. കണ്ടെയ്നര്‍ നിര്‍മാണവുമായി ബന്ധപ്പെട്ട അനുബന്ധ വ്യവസായങ്ങള്‍ക്കും പദ്ധതി ഗുണകരമാകും.
നിലവില്‍ ഇന്ത്യയുടെ കണ്ടെയ്നര്‍ ആവശ്യകതയുടെ വലിയൊരു ഭാഗം ഇറക്കുമതിയിലൂടെയാണ് നിറവേറ്റുന്നത്. ആഗോള വിപണിയിലെ മാറ്റങ്ങളും ചരക്കുനീക്കത്തിലെ തടസ്സങ്ങളും കണ്ടെയ്നറുകളുടെ ലഭ്യതയെ ബാധിക്കാനുള്ള സാധ്യതയുണ്ട്. ഈ സാഹചര്യത്തില്‍ ആഭ്യന്തര ഉല്‍പ്പാദനശേഷി വര്‍ധിപ്പിച്ച് വിതരണ ശൃംഖല കൂടുതല്‍ ശക്തമാക്കുകയാണ് കേന്ദ്രത്തിന്റെ ലക്ഷ്യം. പുതിയ നിര്‍മാണശാലകള്‍ ആരംഭിക്കുന്നതിനും നിലവിലുള്ള യൂണിറ്റുകളുടെ ശേഷി വര്‍ധിപ്പിക്കുന്നതിനും സാമ്പത്തിക പിന്തുണ നല്‍കും. പദ്ധതിയുടെ ഭാഗമായി വായ്പകളുടെ പലിശയില്‍ ഇളവ്, പരിശോധനയ്ക്കും സര്‍ട്ടിഫിക്കേഷനുമുള്ള സഹായം, ഭൂമി പാട്ടത്തിനെടുക്കുന്നതിനുള്ള പിന്തുണ, പ്രവര്‍ത്തനച്ചെലവിനുള്ള സഹായം എന്നിവയും ലഭ്യമാക്കും.
മൂലധന നിക്ഷേപത്തിനായി എടുക്കുന്ന യോഗ്യമായ ടേം ലോണുകള്‍ക്ക് പ്രതിവര്‍ഷം മൂന്ന് ശതമാനം പലിശയിളവ് നല്‍കുന്നതിനായി 859 കോടി രൂപയാണ് നീക്കിവച്ചിരിക്കുന്നത്. ആഗോള നിലവാരത്തിലുള്ള കണ്ടെയ്നറുകള്‍ നിര്‍മിക്കുന്നതിലൂടെ ഇന്ത്യന്‍ ഉല്‍പ്പന്നങ്ങള്‍ക്ക് രാജ്യാന്തര വിപണിയില്‍ കൂടുതല്‍ മത്സരക്ഷമത കൈവരിക്കാനും ലക്ഷ്യമിടുന്നു. സ്റ്റീല്‍, പെയിന്റ്, തടി ഘടകങ്ങള്‍, കണ്ടെയ്നറുകളുടെ മറ്റ് ഭാഗങ്ങള്‍ എന്നിവ നിര്‍മിക്കുന്ന അനുബന്ധ മേഖലകള്‍ക്കും ഇതിലൂടെ പുതിയ അവസരങ്ങള്‍ തുറക്കും. ആഭ്യന്തര ഉല്‍പ്പാദനം വര്‍ധിക്കുന്നതോടെ ഇറക്കുമതിയെ ആശ്രയിക്കുന്നത് കുറയ്ക്കാനും ചരക്കുനീക്കത്തിനാവശ്യമായ കണ്ടെയ്നറുകളുടെ ലഭ്യത മെച്ചപ്പെടുത്താനും സാധിക്കുമെന്നാണ് കേന്ദ്രസര്‍ക്കാരിന്റെ പ്രതീക്ഷ. ഇന്ത്യയെ ആഗോള കണ്ടെയ്നര്‍ നിര്‍മാണ കേന്ദ്രമാക്കി മാറ്റുന്നതിനും രാജ്യത്തിന്റെ കയറ്റുമതി-ഇറക്കുമതി വ്യാപാരത്തിന് കൂടുതല്‍ കരുത്തുപകരുന്നതിനുമുള്ള നിര്‍ണായക ചുവടുവയ്പ്പായാണ് ഈ പദ്ധതിയെ വിലയിരുത്തുന്നത്.
