ന്യൂഡൽഹി: ആഭ്യന്തര ഉല്‍പ്പാദനത്തിലെ കുറവും വിപണിയിലെ ഉയര്‍ന്ന വിലയും കാരണം ഇന്ത്യയുടെ സോയാബീന്‍ ഇറക്കുമതി കുത്തനെ വര്‍ധിച്ചു. ആഫ്രിക്കന്‍ രാജ്യങ്ങളില്‍ നിന്നാണ് ഇന്ത്യ പ്രധാനമായും ഇറക്കുമതി ചെയ്യുന്നത്. വിപണിയില്‍ ലഭ്യത കുറഞ്ഞതോടെ സോയാബീന്‍ വില മിനിമം താങ്ങുവിലയെക്കാള്‍ ഉയര്‍ന്ന നിലയിലാണ് തുടരുന്നത്. സോയാബീന്‍ പ്രോസസേഴ്സ് അസോസിയേഷന്‍ ഓഫ് ഇന്ത്യയുടെ കണക്കുകള്‍ പ്രകാരം, 2025 ഒക്ടോബര്‍ മുതല്‍ 2026 ഓഗസ്റ്റ് വരെയുള്ള കാലയളവില്‍ ഏകദേശം 9.34 ലക്ഷം ടണ്‍ സോയാബീനാണ് ഇറക്കുമതി ചെയ്തത്. സെപ്റ്റംബര്‍ മാസത്തെ ഇറക്കുമതി കൂടി ഉള്‍പ്പെടുത്തുമ്പോള്‍ ആകെ ഇറക്കുമതി 9.5 ലക്ഷം ടണ്‍ കവിയുമെന്നാണ് കണക്കുകൂട്ടല്‍. ഇതിന് മുമ്പുള്ള വിപണന വര്‍ഷത്തില്‍ ഇറക്കുമതി വെറും 2,000 ടണ്‍ മാത്രമായിരുന്നു. 2022-23 വര്‍ഷത്തില്‍ രേഖപ്പെടുത്തിയ ഏകദേശം 7 ലക്ഷം ടണ്‍ ആയിരുന്നു മുന്‍കാല റെക്കോര്‍ഡ്.
ഇന്ത്യയില്‍ സോയാബീന്‍ ഉല്‍പ്പാദനം കുറഞ്ഞതാണ് ഇറക്കുമതി വര്‍ധിക്കാനുള്ള പ്രധാന കാരണങ്ങളിലൊന്ന്. സോയാബീന്‍ പ്രോസസേഴ്സ് അസോസിയേഷന്‍ ഓഫ് ഇന്ത്യയുടെ കണക്കുകളനുസരിച്ച് പ്രകാരം, 2025-26 വര്‍ഷത്തെ ഉല്‍പ്പാദനം ഏകദേശം 110.26 ലക്ഷം ടണ്ണാണ്. മുന്‍വര്‍ഷത്തെ 128.82 ലക്ഷം ടണ്ണുമായി താരതമ്യം ചെയ്യുമ്പോള്‍ ഇത് ഏകദേശം 14 ശതമാനം കുറവാണ്. കൃഷി സ്ഥലം കുറഞ്ഞതും കാലാവസ്ഥയിലെ വ്യതിയാനങ്ങളും വിളവിനെ പ്രതികൂലമായി ബാധിച്ചു. മഹാരാഷ്ട്ര, കര്‍ണാടക തുടങ്ങിയ പ്രധാന ഉല്‍പ്പാദക സംസ്ഥാനങ്ങളിലെ പലയിടത്തും ആവശ്യത്തിന് മഴ ലഭിക്കാത്തതും വിളയുടെ വലുപ്പത്തെക്കുറിച്ചുള്ള ആശങ്ക വര്‍ധിപ്പിച്ചു.
പ്രധാനമായും ജനിതകമാറ്റം വരുത്താത്ത സോയാബീനാണ് ഇന്ത്യ ഇറക്കുമതി ചെയ്യുന്നത്. ബെനിന്‍, നൈജര്‍, ടോഗോ, നൈജീരിയ തുടങ്ങിയ ആഫ്രിക്കന്‍ രാജ്യങ്ങളാണ് പ്രധാന വിതരണക്കാര്‍. ഇന്ത്യയുടെ ഇറക്കുമതി നയവും ഈ വ്യാപാരത്തില്‍ നിര്‍ണായകമാണ്. ചില ഏറ്റവും കുറഞ്ഞ വികസനനിലയിലുള്ള രാജ്യങ്ങളില്‍ നിന്നുള്ള ഉല്‍പ്പന്നങ്ങള്‍ക്ക് ലഭിക്കുന്ന തീരുവ ആനുകൂല്യങ്ങള്‍ ഇറക്കുമതിയെ സ്വാധീനിക്കുന്നു. അതേസമയം, ആഫ്രിക്കന്‍ രാജ്യങ്ങളില്‍ തന്നെ സോയാബീന്‍ സംസ്‌കരണശേഷി വര്‍ധിക്കുന്നതിനാല്‍ ഭാവിയില്‍ ഇന്ത്യയിലേക്ക് കയറ്റുമതി ചെയ്യാന്‍ ലഭിക്കുന്ന അളവ് കുറഞ്ഞേക്കാം.
സംസ്‌കരണ മേഖലയിലും പ്രതിഫലനം
സോയാബീനില്‍ നിന്ന് എണ്ണ വേര്‍തിരിച്ചെടുക്കുന്ന പ്രക്രിയയാണ് ക്രഷിങ്. ആഭ്യന്തരമായി ലഭിക്കുന്ന സോയാബീന്‍ കുറഞ്ഞതോടെ ഈ മേഖലയിലെ പ്രവര്‍ത്തനവും ബാധിക്കപ്പെടുന്നു. 2025-26 വര്‍ഷത്തെ സോയാബീന്‍ ക്രഷിങ് ഏകദേശം 104.50 ലക്ഷം ടണ്ണായി കുറയുമെന്നാണ് സൂചന. മുന്‍വര്‍ഷം ഇത് 113.50 ലക്ഷം ടണ്ണായിരുന്നു. ഇതിന്റെ ഫലമായി സോയാബീന്‍ മീല്‍ ഉല്‍പ്പാദനവും കുറഞ്ഞേക്കും. സോയാബീന്‍ മീല്‍ കോഴിത്തീറ്റയിലും കന്നുകാലിത്തീറ്റയിലും ഉപയോഗിക്കുന്ന പ്രധാന പ്രോട്ടീന്‍ ഘടകമാണ്. ഉല്‍പ്പാദനം കുറയുന്നത് തീറ്റവ്യവസായത്തിന്റെ ചെലവുകളെയും വിതരണത്തെയും ബാധിക്കാം.
കയറ്റുമതിയിലും ഇടിവ്
ഇന്ത്യയില്‍ നിന്നുള്ള സോയാബീന്‍ മീല്‍ കയറ്റുമതിയും കുറഞ്ഞു. ഉയര്‍ന്ന ആഭ്യന്തര വില കാരണം അന്താരാഷ്ട്ര വിപണിയില്‍ ഇന്ത്യന്‍ ഉല്‍പ്പന്നങ്ങളുടെ മത്സരക്ഷമത കുറഞ്ഞതാണ് ഇതിന് പ്രധാന കാരണം. 2025-26 വര്‍ഷത്തില്‍ സോയാബീന്‍ മീല്‍ കയറ്റുമതി ഏകദേശം 10 ലക്ഷം ടണ്ണായി കുറയുമെന്നാണ് കണക്ക്. മുന്‍വര്‍ഷത്തെ കയറ്റുമതി 20.23 ലക്ഷം ടണ്ണായിരുന്നു.
2026-27 വര്‍ഷത്തിലും സോയാബീന്‍ ഉല്‍പ്പാദനത്തെക്കുറിച്ച് അനിശ്ചിതത്വമുണ്ട്. കാലവര്‍ഷത്തിലെ ക്രമക്കേടുകള്‍, കൃഷിവിസ്തൃതിയിലെ മാറ്റങ്ങള്‍, പരുത്തി, ചോളം തുടങ്ങിയ മറ്റ് വിളകളിലേക്കുള്ള കര്‍ഷകരുടെ മാറ്റം എന്നിവ ഉല്‍പ്പാദനത്തെ ബാധിക്കാം. മാത്രമല്ല ആഭ്യന്തര ഉല്‍പ്പാദനം വീണ്ടെടുക്കാന്‍ കഴിയാത്ത പക്ഷം ഇന്ത്യ ഇറക്കുമതിയെ ആശ്രയിക്കുന്നത് തുടര്‍ന്നേക്കാം. എന്നാല്‍ ആഫ്രിക്കന്‍ രാജ്യങ്ങളില്‍ ആഭ്യന്തര സംസ്‌കരണം വര്‍ധിക്കുന്നത് ഇന്ത്യക്ക് ലഭിക്കുന്ന വിതരണത്തെ പരിമിതപ്പെടുത്താനും സാധ്യതയുണ്ട്.
