കൊച്ചി: ദേശീയ ഗ്യാസ് ഗ്രിഡിൽ സുപ്രധാന സ്ഥാനത്തേക്ക് ഉയരാനുള്ള കൊച്ചിയുടെ കാത്തിരിപ്പ് അവസാനഘട്ടത്തിലേക്ക്. 2024 നവംബർ മാസത്തോടെ കൊച്ചി – ബെംഗളൂരു ദ്രവീകൃത പ്രകൃതി വാതക (എൽഎൻജി) പൈപ്പ്‍ലൈൻ പൂർത്തിയാകുമ്പോൾ കൊച്ചിയുടെ പ്രധാന്യം ദേശീയ തലത്തിൽ വർധിക്കുകയും നിർണായക സാന്നിധ്യവുമായി മാറും. ഇതൊക്കെ മുൻകൂട്ടി കണ്ടുകൊണ്ട് കൊച്ചി എൽഎൻജി ടെർമിനലിൽ 600 കോടിയുടെ രണ്ടാംഘട്ട വികസനത്തിനായുള്ള വിവിധ പദ്ധതികളും തയ്യാറായി വരുന്നു.
എന്തുകൊണ്ട് പ്രാധാന്യമേറും?
കൊച്ചി എൽഎൻജി ടെർമിനലിൽ നിന്നും രാജ്യത്തെ പ്രധാന വാണിജ്യ, വ്യവസായ നഗരങ്ങളിലൊന്നായ കോയമ്പത്തൂർ വഴി ഇന്ത്യയുടെ ഐടി തലസ്ഥാനമായ ബെംഗളൂരുവിലേക്ക് കടന്നെത്തുന്നത്.
ഇതിന്റെ നിർമാണം പൂർത്തിയാകുന്നതോടെ രാജ്യത്ത് എവിടെയും പൈപ്പ്‍ലൈൻ മുഖേന പ്രകൃതി വാതകം എത്തിക്കാൻ കൊച്ചി എൽഎൻജി ടെർമിനലിന് സാധിക്കും. ഇതോടെ കർണാടകത്തിലേയും തമിഴ്നട്ടിലേയും കേരളത്തിലേയും വ്യവസായ ശാലകൾക്ക് കുറഞ്ഞ നിരക്കിൽ പ്രക‍ൃതിവാതകം എത്തിക്കാനാകും.
കേരളത്തിലെ ഏറ്റവും വലിയ വ്യവസായശാലയായ കൊച്ചി റിഫൈനറി, ബിപിസിഎൽ, ഫാക്ട് തുടങ്ങിയവയ്ക്കും നേട്ടമാകും. ഊർജ ഉപഭോഗത്തിനായുള്ള ചെലവിനത്തിൽ കോടികൾ ലാഭിക്കാം.
ഇതിനുപുറമെ സിറ്റി ഗ്യാസ് പദ്ധതി, വാഹനങ്ങൾക്കുള്ള സിഎൻജി എന്നിവയുടെ വിതരണവും കൊച്ചി എൽഎൻജി ടെർമിനലിൽ നിന്നാണ്. ചുരുക്കത്തിൽ ദക്ഷിണേന്ത്യയുടെ പ്രകൃതി വാതക ഹബ്ബായി കൊച്ചി വളരും. ഇതോടെ നാഷണൽ ഗ്യാസ് ഗ്രിഡിൽ കൊച്ചിയുടെ സ്ഥാനവും നിർണായമാകും.
ശേഷി പൂർണമായും വിനിയോഗിക്കാം
ഇതിനുപുറമെ, കൊച്ചി എൽഎൻജി ടെർമിനലിന് ശേഷി പൂർണമായും വിനിയോഗിക്കാൻ കഴിയുമെന്നതും നേട്ടമാണ്. 4,000 കോടിയിലധികം രൂപ മുതൽമുടക്കിൽ പത്ത് വർഷം മുൻപ് കമ്മീഷൻ ചെയ്ത എറണാകുളം പുതുവൈപ്പിനിലെ എൽഎൻജി ടെർമിനൽ ഇപ്പോഴും ശേഷിയുടെ 20 ശതമാനത്തോളം മാത്രമാണ് വിനിയോഗിക്കുന്നത്.
നിലവിൽ രണ്ട് പടുകൂറ്റൻ സ്റ്റോറേജ് ടാങ്കുകളിലായി 50 ലക്ഷം ടണ്ണാണ് കൊച്ചി ടെർമിനലിന്റെ വാർഷിക ശേഷിയുള്ളത്.
കൊച്ചിയിൽ നിന്നും ബെംഗളൂരുവിലേക്കുള്ള ഗ്യാസ് പൈപ്പ്‍ലൈൻ തയ്യാറാകുന്നതോടെ പുതുവൈപ്പിൻ ടെർമിനലനിന്റെ ശേഷിവിനിയോഗം 100 ശതമാനത്തിലെത്തുമെന്ന്, പെട്രോനെറ്റ് എൽഎൻജി കമ്പനിയുടെ മേധാവി അക്ഷയ് കുമാർ സിങ് വ്യക്തമാക്കി.
അടുത്ത വർഷം നവംബറോടെ ഈ വാതക പൈപ്പ്‍ലൈൻ നിർമാണം പൂർത്തിയാക്കുമെന്ന് ഒഎൻജിസി ഉറപ്പു നൽകിയിട്ടുണ്ടെന്നും അദ്ദേഹം വ്യക്തമാക്കി.
600 കോടിയുടെ വികസനം
കൊച്ചി – ബെംഗളൂരു പൈപ്പ്‍ലൈൻ പൂർത്തിയാകുന്നതോടെ പുതുവൈപ്പിനിലെ എൽഎൻജി ടെർമിനലിന്റെ ശേഷി പൂർണമായും വിനിയോഗിക്കപ്പെടുമെന്നാണ് പ്രതീക്ഷ. ഈയൊരു പശ്ചാത്തലത്തിലാണ് കൊച്ചി ടെർമിനലിന്റെ ഭാഗമായി മൂന്നാമതൊരു സ്റ്റോറേജ് ടാങ്ക് കൂടി നിർമിക്കാനുള്ള പദ്ധതി ആവിഷ്കരിക്കുന്നത്.
ഇതിന്റെ ഭാഗമായി 600 കോടി രൂപയുടെ വികസന പദ്ധതികളാണ് ഇവിടെ ആസൂത്രണം ചെയ്യുന്നത്. അതേസമയം പെട്രോനെറ്റ് എൽഎൻജി കമ്പനിയുടെ രാജ്യത്തെ രണ്ടാമത്തെ എൽഎൻജി ടെർമിനലാണ് കൊച്ചിയിലുള്ളത്. ആദ്യത്തേത് ഗുജറാത്തിലെ ദഹേജിലാകുന്നു.
എൽഎൻജിയുടെ നേട്ടം
കൊച്ചി എൽഎൻജി ടെർമിനലും ഗ്യാസ് പൈപ്പ്‍ലൈനുകളും പൂർണതോതിൽ പ്രവാർത്തികമാകുന്നതോടെ, 24 മണിക്കൂറും കുറഞ്ഞ ചെലവിൽ പരിസ്ഥിതി മലിനീകരണമില്ലാത്തതുമായ ഹരിത ഇന്ധനം ലഭ്യമാകുന്നു എന്നതാണ് പ്രധാന നേട്ടം.
ഇതു വ്യവസായിക, ഗാർഹിക മേഖലകൾക്ക് ഒരുപോലെ ഗുണകരമാകുന്നു. എൽപിജിയെ അപേക്ഷിച്ച് കൂടുതൽ സുരക്ഷിതമാണെന്നതും സിറ്റി ഗ്യാസ് പദ്ധതിയിലൂടെ നേരിട്ട് വീട്ടിലേക്ക് എത്തുമെന്നതും ഗാർഹിക തലത്തിൽ എൽഎൻജിയുടെ അനുകൂല ഘടകങ്ങളാണ്.
അതുപോലെ അസംസ്കൃത വസ്തുവായും ഇന്ധനമായും ഉപയോഗിക്കാമെന്നത് വ്യവസായിക മേഖലയ്ക്ക് എൽഎൻജിയെ പ്രിയങ്കരമാക്കുന്നത്. ഇന്ധന ആവശ്യത്തിനായി എൽപിജി ഉപയോഗിക്കുന്ന ഒു ഫാക്ടറി എൽഎൻജിയിലേക്ക് മാറിയാൽ ഒരു കിലോഗ്രാമിന് 16 രൂപയിലധികം ലാഭമുണ്ടാകുമെന്നാണ് വിലയിരുത്തൽ.
ദിവസവും 10,000 കിലോ എൽപിജി ഉപയോഗിക്കുന്ന ഒരു വ്യവസായ സ്ഥാപനത്തിന് ഇതിലൂടെ പ്രതിദിനം 16 ലക്ഷത്തിലധികം രൂപയുടെ ലാഭം നേടാമെന്ന് സാരം.
ഒരു രാജ്യം, ഒരു ഗ്യാസ് ഗ്രിഡ്
ഇന്ത്യയുടെ വർധിച്ചുവരുന്ന ഊർജ ആവശ്യങ്ങളെ നിറവേറ്റുന്നതിനും പരിസ്ഥിതി സൗഹൃദമാകാനും ഊർജ സ്രോതസ്സുകളുടെ വൈവിധ്യവത്കരണത്തിനും രാജ്യം മുഴുവനും ഒരു വാതക പൈപ്പ്‍ലൈനിലൂടെ ബന്ധിപ്പിക്കാനും താങ്ങാവുന്ന നിരക്കിൽ ജനങ്ങൾക്കും വ്യവസായങ്ങൾക്കും ഇന്ധനം ലഭ്യമാക്കുന്നതിനും ലക്ഷ്യമിട്ടാണ് കേന്ദ്രസർക്കാർ ഗ്യാസ് ഗ്രിഡ് പദ്ധതി ആവിഷ്കരിച്ചത്.
2030ഓടെ രാജ്യത്തിന്റെ ഊർജ ഉപഭോഗത്തിന്റെ 15 ശതമാനം പ്രകൃതി വാതകമാക്കാനുളള ലക്ഷ്യം നിറവേറ്റാനും ഈ പദ്ധതി അത്യന്താപേക്ഷിതമാണ്.
അതായത്, രാജ്യം സ്വാശ്രയത്വം കൈവരിക്കുന്നതിനുള്ള (ആത്മനിർഭർ ഭാരത്) പരിശ്രമങ്ങളിലെ നിർണായക ചുവടുവെപ്പാണ് ഗ്യാസ് ഗ്രിഡ് എന്ന് ചുരുക്കം.
