കൊച്ചി: സംസ്ഥാനത്ത് മുദ്രപ്പത്രക്ഷാമം രൂക്ഷമാണ്. കുറഞ്ഞ മൂല്യങ്ങളിലെ മുദ്രപ്പത്രങ്ങൾ കിട്ടാനില്ലാത്തതാണ്(stamp paper shortage) പ്രധാന പ്രതിസന്ധി. 50 രൂപയുടെയും 100 രൂപയുടെയുമൊന്നും സ്റ്റാംപ് പേപ്പർ കിട്ടാനില്ല. 500 രൂപയുടെ മുദ്രപ്പത്രവും വിരളമാണ്.
1,000 രൂപ നൽകി എല്ലാവരും മുദ്രപ്പത്രം വാങ്ങേണ്ട അവസ്ഥയാണിപ്പോൾ. കുറഞ്ഞ മൂല്യങ്ങളിലെ മുദ്രപ്പത്രങ്ങൾ കിട്ടാനില്ല എന്ന് കാണിച്ച് അഭിഭാഷകനായ ജ്യോതിഷ് പി. ഹൈക്കോടതിയിൽ പൊതുതാൽപ്പര്യ ഹർജി നൽകിയിരുന്നു.
ഇതിൽ കേരള ഹൈക്കോടതി ഡിവിഷൻ ബെഞ്ച് തിങ്കളാഴ്ച സംസ്ഥാന സർക്കാരിൻ്റെ പ്രതികരണം തേടി. ആറു മാസമായി സംസ്ഥാനത്തെ മുദ്രപ്പത്രക്ഷാമം തുടരുകയാണ്.
എല്ലാ മൂല്യത്തിലെയും മുദ്രപ്പത്രങ്ങൾ ഉറപ്പാക്കണമെന്നാണ് ഹർജിക്കാരൻ്റെ ആവശ്യം.
സ്റ്റാമ്പ് പേപ്പർ ക്ഷാമം പരിഹരിക്കണമെന്നും ഓൺലൈൻ ഇ-സ്റ്റാമ്പ് സൗകര്യം വേഗത്തിൽ നടപ്പാക്കണമെന്നും ആവശ്യപ്പെട്ടിട്ടുണ്ട്. കേരള ഹൈക്കോടതിയിൽ സമർപ്പിച്ച ഹർജിയിൽ ഹൈക്കോടതി സംസ്ഥാന സർക്കാരിന് നോട്ടീസ് അയച്ചു. രണ്ടാഴ്ചക്കകം മറുപടി നൽകണമെന്നാണ് ആവശ്യപ്പെട്ടിരിക്കുന്നത്.
എറണാകുളം ജില്ലയിൽ പ്രതിസന്ധി രൂക്ഷം
സംസ്ഥാനത്തുടനീളം 1000 രൂപയിൽ താഴെയുള്ള സ്റ്റാമ്പ് പേപ്പറുകൾക്ക് ക്ഷാമമുണ്ട്. കഴിഞ്ഞ അഞ്ചോ ആറോ മാസമായി എറണാകുളം പോലുള്ള ജില്ലകളിൽ ഈ പ്രശ്നം രൂക്ഷമാണെന്ന് ഓൾ കേരള ഡോക്യുമെൻ്റ് റൈറ്റേഴ്‌സ് ആൻഡ് സ്‌ക്രൈബ്‌സ് അസോസിയേഷൻ സംസ്ഥാന പ്രസിഡൻ്റ് കെ ജി ഇന്ദുകലാധരൻ കഴിഞ്ഞ ദിവസങ്ങളിൽ വ്യക്തമാക്കിയിരുന്നു.
100 രൂപ മൂല്യമുള്ള സ്റ്റാമ്പ് പേപ്പർ മാത്രം ആവശ്യമുള്ള അഫിഡവിറ്റിനും 1000 രൂപയുടെ മുദ്രപ്പത്രം വാങ്ങേണ്ട സ്ഥിതി.
ഓഗസ്റ്റ് ഒന്നു മുതൽ ഇ-സ്റ്റാമ്പ് പദ്ധതി നടപ്പാക്കും എന്ന് പ്രഖ്യാപിച്ചിരുന്നെങ്കിലും ഇതിന് കഴിയാതിരുന്നതാണ് പ്രതിസന്ധിക്ക് കാരണം.
ജനന സർട്ടിഫിക്കറ്റുകൾ, സർക്കാർ ഓഫീസുകളിൽ സമർപ്പിക്കുന്ന മറ്റ് രേഖകൾ, വാടക, വ്യാപാര കരാറുകൾ, ബോണ്ടുകൾ തുടങ്ങിയവയുടെ അഫിഡവിറ്റ് തയ്യാറാക്കുന്നതിന് 50 രൂപ 100 രൂപ മൂല്യങ്ങളിലുള്ള സ്റ്റാമ്പ് പേപ്പറുകൾ ആണ് വേണ്ടത്. ഇത് ലഭ്യമല്ലാതായതോടെ ഇടപാടുകാ‍ർ വലയുകയാണ്.
നാസിക്കിലെ പ്രസിലാണ് മുദ്രപ്പത്രങ്ങൾ അച്ചടിക്കുന്നത്. സംസ്ഥാനത്ത് ഇ-സ്റ്റാംപ് സർവീസ് തുടങ്ങാൻ പദ്ധതിയിട്ടിരുന്നതിനാൽ സർക്കാർ മുദ്രപ്പത്രത്തിന് ഓർഡർ നൽകാത്തതാണ് പ്രതിസന്ധിക്ക് പിന്നിൽ എന്നാണ് സൂചന.
