ഹൈദരാബാദ്: ലോകമെമ്പാടുമുള്ളവരുടെ മനം കവര്ന്ന് ഇന്ത്യന് മാമ്പഴം വാണിജ്യ വിസ്മയം തീര്ക്കുന്നു. സീസണ് അവസാനിക്കാന് ഒരു മാസം കൂടി മാത്രം ബാക്കിനില്ക്കെ, അമേരിക്കയിലേക്കുള്ള കയറ്റുമതി കഴിഞ്ഞ വര്ഷത്തെ മൊത്തം കണക്കുകളെയും മറികടന്നു കഴിഞ്ഞു.
ഏറ്റവും വലിയ മാമ്പഴ ഇറക്കുമതിക്കാരായ യുഎസില് മാത്രം ഇത്തവണ 30 ശതമാനത്തിലധികം വളര്ച്ചയാണ് പ്രതീക്ഷിക്കുന്നത്. കാര്ഷിക, ഭക്ഷ്യ ഉല്പ്പന്ന കയറ്റുമതി അതോറിറ്റിയായ അപെഡ ചെയര്മാന് അഭിഷേക് ദേവ് പങ്കുവെച്ച ഈ സന്തോഷവാര്ത്ത, ഇന്ത്യന് കാര്ഷിക മേഖലയുടെ കുതിപ്പിന് സാക്ഷ്യം വഹിക്കുന്നു.
അമേരിക്കന് നഗരങ്ങളായ സിയാറ്റില്, ലോസ് ഏഞ്ചല്സ്, വാഷിംഗ്ടണ്, ന്യൂയോര്ക്ക്, അറ്റ്ലാന്റ എന്നിവിടങ്ങളില് അപെഡ സംഘടിപ്പിച്ച പ്രമോഷന് കാമ്പെയ്നുകള് ഇന്ത്യന് മാമ്പഴത്തിന് വലിയ സ്വീകാര്യതയാണ് നേടിക്കൊടുത്തത്.
യുഎസിന് പുറമെ ചെക്ക് റിപ്പബ്ലിക്, മലേഷ്യ, സ്പെയിന്, യുഎഇ, ഒമാന് തുടങ്ങി 20-ഓളം രാജ്യങ്ങളില് നടന്ന വിപുലമായ പ്രചാരണ പരിപാടികള് മാമ്പഴത്തിന്റെ ആഗോള സാന്നിധ്യം ശക്തമാക്കി. ഈ ആക്കം നിലനിര്ത്തുന്നതിലൂടെ, വരും ഒന്നോ രണ്ടോ വര്ഷത്തിനുള്ളില് രാജ്യത്തിന്റെ മൊത്തം മാമ്പഴ കയറ്റുമതി ഇരട്ടിയാകുമെന്ന പ്രതീക്ഷയിലാണ് അധികൃതര്.
മാമ്പഴത്തിന്റെ ഈ മിന്നുന്ന വിജയം ഇന്ത്യയുടെ കാര്ഷിക കയറ്റുമതിയിലെ സമഗ്രമായ മുന്നേറ്റത്തിന്റെ ഭാഗം കൂടിയാണ്. കടുത്ത ആഗോള മത്സരങ്ങള്ക്കിടയിലും കഴിഞ്ഞ സാമ്പത്തിക വര്ഷം 53 ബില്യണ് ഡോളറിന്റെ കയറ്റുമതി നേട്ടം കൈവരിച്ച ഇന്ത്യ, ലോകത്തെ മികച്ച 10 കാര്ഷിക കയറ്റുമതി രാജ്യങ്ങളുടെ പട്ടികയില് സ്ഥാനം ഉറപ്പിച്ചു.
ഒരു ദശാബ്ദം മുമ്പ് 280 ഉല്പ്പന്നങ്ങള് മാത്രമുണ്ടായിരുന്ന കയറ്റുമതി ബാസ്കറ്റ് ഇന്ന് 500-ലേക്ക് ഉയര്ന്നു എന്നത് ഇന്ത്യയുടെ വിപണി വൈവിധ്യവല്ക്കരണത്തിന്റെ വിജയഗാഥയാണ്.
പുതിയ വിപണികളിലേക്കുള്ള പ്രവേശനവും ഇന്ത്യന് ഉല്പ്പന്നങ്ങള്ക്ക് വലിയ വാതിലുകളാണ് തുറന്നിരിക്കുന്നത്.
റഷ്യയിലേക്ക് ഉരുളക്കിഴങ്ങും മാതളനാരങ്ങയും, വിയറ്റ്നാമിലേക്ക് മുന്തിരിയും, ഓസ്ട്രേലിയയിലേക്ക് മാതളനാരങ്ങയും എത്തിയതോടെ ഇന്ത്യന് കാര്ഷിക ഉല്പ്പന്നങ്ങള് ലോകമെമ്പാടുമുള്ള വിപണികളില് സ്ഥാനം പിടിച്ചു.
ഗള്ഫുഡ്, ബയോഫാച്ച് പോലുള്ള അന്താരാഷ്ട്ര മേളകളില് ഇന്ത്യയുടെ സാന്നിധ്യം കരുത്താര്ജിക്കുകയാണ്. ലോകത്തിന്റെ വിഭവസമൃദ്ധമായ മേശകളിലെ ഒഴിച്ചുകൂടാനാവാത്ത സാന്നിധ്യമായി ഇന്ത്യന് കാര്ഷികോല്പ്പന്നങ്ങള് മാറിക്കഴിഞ്ഞു.
