ന്യൂഡൽഹി: ഇന്ത്യയുടെ സ്റ്റീല് ആവശ്യകത ശക്തമായി തുടരുന്നതിനാല്, ഉത്പാദന ശേഷി ഉയര്ന്നു തന്നെ തുടരുമെന്ന് കൊട്ടക് ഇന്സ്റ്റിറ്റിയൂഷണല് ഇക്വിറ്റീസ്. ഉത്പാദന ശേഷി അടുത്ത വര്ഷങ്ങളിലും 90 ശതമാനത്തിന് മുകളില് തുടരുമെന്നാണ് റിപ്പോര്ട്ട്.
2026 മെയ് മാസത്തില് രാജ്യത്തെ സ്റ്റീല് ആവശ്യകത കഴിഞ്ഞ വര്ഷത്തെ അപേക്ഷിച്ച് 9% ഉയര്ന്നു. 2026 സാമ്പത്തിക വര്ഷത്തിന്റെ തുടക്കം മുതല് ആവശ്യകതയില് 8.7 ശതമാനം വളര്ച്ച രേഖപ്പെടുത്തിയിട്ടുണ്ട്. ഇതിന് മുമ്പ് 2026 സാമ്പത്തിക വര്ഷത്തില് സ്റ്റീല് ആവശ്യകത 7.6 ശതമാനം വര്ധിച്ചിരുന്നു.
അതിന് മുന്പുള്ള നാല് വര്ഷങ്ങളില് ഇരട്ട അക്ക വളര്ച്ചയാണ് സ്റ്റീല് മേഖല കൈവരിച്ചിരുന്നത്. മെയ് മാസത്തില് സ്റ്റീല് കയറ്റുമതി 30 ശതമാനം ഉയര്ന്ന് 0.5 ദശലക്ഷം ടണ്ണായി. എന്നാല് ഇറക്കുമതി 0.7 ദശലക്ഷം ടണ് ആയതിനാല് കയറ്റുമതിയെ മറികടന്നു.
റീബാര് വിലയില് ഇടിവ്
2026 ഏപ്രിലിലെ ഉയര്ന്ന നിലവാരത്തില് നിന്ന് പ്രൈമറി റീബാര് വിലകള് ടണ്ണിന് ഏകദേശം 7,000 രൂപ അഥവാ 11 ശതമാനം കുറഞ്ഞു. അതേസമയം, ആഭ്യന്തര ഹോട്ട്-റോള്ഡ് കോയില് വിലകള് താരതമ്യേന സ്ഥിരത പുലര്ത്തി. സീസണല് ദൗര്ബല്യത്തിനിടയിലും ഹോട്ട് റോള്ഡ് കോയില് വില ടണ്ണിന് ഏകദേശം 1,600 രൂപ മാത്രമാണ് കുറഞ്ഞത്. ഇത് 23 ശതമാനം ഇടിവാണ്.
ചൈനയിലെ സാഹചര്യങ്ങള് ഇന്ത്യക്ക് അനുകൂലമായി
ചൈനയിലെ സ്റ്റീല് ഉത്പാദന ചെലവ് ഉയര്ന്നതിനെ തുടര്ന്ന് സ്റ്റീല് മാര്ജിനുകള് സമ്മര്ദത്തിലായിരിക്കുകയാണ്. ഇത് വരും മാസങ്ങളില് ഏഷ്യന് മേഖലയിലെ സ്റ്റീല് വില ഉയരാന് സഹായകമാകുമെന്നാണ് വിലയിരുത്തല്. നിലവില് ഇന്ത്യന് ഹോട്ട്-റോള്ഡ് കോയില് വില ചൈനയുടെ ഇറക്കുമതി വിലയേക്കാള് ഏകദേശം 7 ശതമാനം താഴെയായതിനാല് കൂടുതല് വലിയ വില ഇടിവിന് സാധ്യത കുറവാണെന്നും റിപ്പോര്ട്ട് ചൂണ്ടിക്കാട്ടുന്നു.
വരും വര്ഷങ്ങളില് വളര്ച്ച തുടരും
2026 സാമ്പത്തിക വര്ഷം മുതല് 2029 സാമ്പത്തിക വര്ഷം വരെ സ്റ്റീല് ആവശ്യകത വാര്ഷിക ശരാശരി 7 ശതമാനം വളര്ച്ച (CAGR) കൈവരിക്കുമെന്നാണ് റിപ്പോര്ട്ട് പ്രവചിക്കുന്നത്. ഈ വളര്ച്ച പുതിയ ഉത്പാദന ശേഷി വര്ധനയെക്കാള് വേഗത്തിലായിരിക്കുമെന്നതിനാല് വ്യവസായത്തിന്റെ ശേഷി ഉപയോഗം 90 ശതമാനത്തിന് മുകളില് നിലനില്ക്കുമെന്ന് വിലയിരുത്തുന്നു.
കമ്പനികളുടെ ലാഭ മാര്ജിന് മെച്ചപ്പെടും
2026 സാമ്പത്തിക വര്ഷം നാലാം പാദത്തില് സ്റ്റീല് വിലയില് ഉണ്ടായ 14 മുതല് 21 ശതമാനം വരെ വര്ധനയുടെ നേട്ടം 2027 ന്റെ ആദ്യ പാദത്തില് കൂടുതല് പ്രതിഫലിക്കുമെന്നാണ് റിപ്പോര്ട്ട് പറയുന്നത്.
കല്ക്കരിയുടെയും ഇരുമ്പയിരിന്റെയും വില വര്ധന ഉണ്ടായാലും, സ്റ്റീല് വിലയിലെ ഉയര്ച്ച അതിനെ മറികടക്കുന്നതിനാല് കമ്പനികളുടെ ലാഭമാര്ജിന് മെച്ചപ്പെടാന് സാധ്യതയുണ്ടെന്നും റിപ്പോര്ട്ട് ചൂണ്ടിക്കാട്ടുന്നു.
