ബ്രോഡ്ബാൻഡ് സേവനങ്ങൾക്കായി ഉപഗ്രഹ ശൃംഖല വികസിപ്പിക്കാൻ റിലയൻസ് ജിയോ. 1,650ഓളം ഉപഗ്രഹങ്ങൾ ഉൾപ്പെടുന്ന ലോ എർത്ത് ഓർബിറ്റ് (LEO) ശൃംഖലയാണ് ഇതിനായി തയ്യാറാക്കുക. മൂന്നു വർഷത്തിനുള്ളിൽ പദ്ധതി യാഥാർഥ്യമാക്കാനാണ് ലക്ഷ്യമിടുന്നത്. തന്ത്രപ്രധാനമായ ബഹിരാകാശ മേഖലയിൽ ഇന്ത്യൻ കമ്പനിയുടെ വരവ് ദേശീയ സുരക്ഷാ മുൻഗണനകൾക്കും സ്വയംപര്യാപ്തതയ്ക്കും വലിയ പ്രാധാന്യം നൽകുന്നുണ്ട്. 1.41 ലക്ഷം കോടി രൂപ(15 ബില്യൺ ഡോളർ)യാണ് പ്രതീക്ഷിക്കുന്ന പദ്ധതി ചെലവ്.
വിശദാംശങ്ങൾ
ഉപഗ്രഹങ്ങളുടെ എണ്ണം: 1,650
ഭ്രമണപഥം: ഭൂമിയിൽ നിന്ന് 650 കിലോമീറ്റർ ഉയരത്തിലുള്ള ലോ എർത്ത് ഓർബിറ്റ് (LEO).
സമയപരിധി: മൂന്നു വർഷത്തിനുള്ളിൽ വിക്ഷേപണവും പ്രവർത്തനവും ആരംഭിക്കാൻ ലക്ഷ്യമിടുന്നു.
സേവനങ്ങൾ: അതിവേഗ ബ്രോഡ്ബാൻഡ് ഇന്റർനെറ്റ്, മൊബൈൽ ഉപകരണങ്ങളിലേക്ക് നേരിട്ടുള്ള കണക്റ്റിവിറ്റി (Direct-to-device). ഉപയോഗിക്കുന്ന ഉപഗ്രഹങ്ങളുടെ ശേഷി അനുസരിച്ച്, ടെറാബിറ്റ് ഡാറ്റാ ശേഷി സൃഷ്ടിക്കാൻ ഈ ശൃംഖലയ്ക്ക് സാധിക്കും.
വിദേശ കമ്പനികളെ ഒഴിവാക്കാം
വിദേശ ഉപഗ്രഹ സേവനദാതാക്കളെ ആശ്രയിക്കുന്നത് കുറയ്ക്കുക എന്ന ലക്ഷ്യത്തോടെയാണ് ജിയോയുടെ നീക്കം.
ദേശീയ സുരക്ഷ: വിദേശ സാറ്റലൈറ്റ് കമ്പനികളെ അമിതമായി ആശ്രയിക്കുന്നത് ദേശീയ സുരക്ഷാ ആശങ്കകൾക്ക് കാരണമാകുന്നുണ്ട്. രാജ്യത്തെതന്നെ കമ്പനി മേഖലയിൽ സജീവമാകുന്നത് ഈ ആശങ്ക പരിഹരിക്കാൻ സഹായിക്കും.
സർക്കാർ പിന്തുണ: ഇന്ത്യൻ ബഹിരാകാശ റെഗുലേറ്ററായ ഇൻ-സ്പേസ് (IN-SPACe) നിലവിൽ ജിയോയുടെ നിർദേശങ്ങൾ വിലയിരുത്തി വരികയാണ്. ഭ്രമണപഥത്തിലെ സ്ലോട്ടുകൾ സുരക്ഷിതമാക്കുന്നതിന് ഇന്റർനാഷണൽ ടെലികമ്മ്യൂണിക്കേഷൻ യൂണിയനിൽ (ITU) ഫയൽ ചെയ്യുന്നതിനായി സർക്കാർ ജിയോയെ പിന്തുണയ്ക്കും.
തന്ത്രപ്രധാന മേഖല: ഉപഗ്രഹ ആശയവിനിമയ രംഗത്തെ തന്ത്രപ്രധാനമായ ലിയോ (LEO) വിഭാഗത്തിലേക്ക് പ്രവേശിക്കുന്ന ആദ്യ ഇന്ത്യൻ സ്ഥാപനമായി ഇതോടെ റിലയൻസ് മാറും.
മുതൽ മുടക്കാൻ കോടികൾ
നിക്ഷേപം: 1.40 ലക്ഷം കോടി രൂപയുടെ നിക്ഷേപമാണ് പ്രതീക്ഷിക്കുന്നത്.
കോർപ്പറേറ്റ് ഘടന: ജിയോയുടെ മറ്റ് ഡിജിറ്റൽ ആസ്തികളെപ്പോലെ സാറ്റ്കോം (satcom) യൂണിറ്റും ജിയോ പ്ലാറ്റ്ഫോംസിന്റെ കീഴിലായിരിക്കും പ്രവർത്തിക്കുക.
ഐപിഒ: വരും ദിവസങ്ങളിൽ ജിയോ പ്ലാറ്റ്ഫോംസ് പ്രാഥമിക ഓഹരി വില്പനയ്ക്ക് തയ്യാറെടുക്കുന്നതായും റിപ്പോർട്ടുകളുണ്ട്. ഇതിലുടെയുള്ള പണസമാഹരണവും പദ്ധതിക്കായി വിനിയോഗിച്ചേക്കും.
ആഗോള കമ്പനികൾ
കമ്പനി – ഉപഗ്രഹ പദ്ധതി
സ്റ്റാർലിങ്ക് – ഇലോൺ മസ്കിന്റെ ഉടമസ്ഥതയിലുള്ള കമ്പനിക്ക് നിലവിൽ ഏകദേശം 10,000 ഉപഗ്രഹങ്ങളുണ്ട്.
ആമസോൺ എൽഇഒ – ഏകദേശം 3,200 ഉപഗ്രഹങ്ങൾ വിക്ഷേപിക്കാൻ പദ്ധതിയിടുന്നു (300 എണ്ണം ഇതിനകം വിക്ഷേപിച്ചു).
യൂട്ടൽസാറ്റ് വൺവെബ് – സുനിൽ മിത്തലിന്റെ ഭാരതി ഗ്രൂപ്പിന് പങ്കാളിത്തമുള്ള കമ്പനിക്ക് 654 ഉപഗ്രഹങ്ങളുണ്ട്.
എസ്ഇഎസ് – ജിയോയുമായി സംയുക്ത സംരംഭമുള്ള കമ്പനിക്ക് ജിയോസ്റ്റേഷനറി, മീഡിയം എർത്ത് ഓർബിറ്റുകളിൽ ഉപഗ്രഹങ്ങളുണ്ടെങ്കിലും എൽഇഒയിൽ ഇല്ല.
ആഗോളതലത്തിൽ ആർട്ടിഫിഷ്യൽ ഇന്റലിജൻസ് ഉൾപ്പെടെയുള്ള സാങ്കേതിക വിദ്യകൾക്ക് മേൽ നിയന്ത്രണങ്ങൾ കൊണ്ടുവരുന്ന സാഹചര്യത്തിൽ ഉപഗ്രഹ ശൃംഖല നിർമിക്കാനുള്ള ജിയോയുടെ നീക്കം നിർണായകമാണ്. ബ്രോഡ്ബാൻഡ് സേവനങ്ങൾക്ക് പുറമെ നേരിട്ട് മൊബൈൽ ഫോണുകളിലേക്ക് ഇന്റർനെറ്റ് എത്തിക്കാനുള്ള ജിയോയുടെ ശ്രമം ടെലികോം രംഗത്ത് വൻ മാറ്റം വരുത്തിയേക്കും.
