ഡൽഹി: നികുതി വെട്ടിപ്പ് ആരോപിച്ച് എംബസി ഗ്രൂപ്പ് സ്ഥാപനത്തിൽ ബുധനാഴ്ച ആദായ നികുതി വകുപ്പ് തിരച്ചിൽ നടത്തി. മുംബൈയിലെ ബാന്ദ്ര-കുർള കോംപ്ലക്‌സിൽ (ബികെസി) സ്ഥിതി ചെയ്യുന്ന സ്ഥാപനത്തിൽ ഐടി വകുപ്പ് തിരച്ചിൽ നടത്തിയെന്ന് അടുത്ത വൃത്തങ്ങളാണ് മാധ്യമങ്ങളെ അറിയിച്ചത്. കൂടാതെ മുംബൈയ്ക്ക് പുറമെ, എംബസി ഗ്രൂപ്പുമായി ബന്ധപ്പെട്ട് ബെംഗളൂരുവിലും ഗുരുഗ്രാമിലും ആദായ നികുതി വകുപ്പ് തിരച്ചിൽ നടത്തിയതായും വിവരമുണ്ട്.
ഈ വാർത്തകൾ പുറത്ത് വന്നതോടെ എംബസി ഓഫീസ് പാർക്‌സിന്റെ ഓഹരികൾ 1 .15 ശതമാനം ഇടിഞ്ഞ് 389 രൂപയിലെത്തി. 1993-ൽ സ്ഥാപിതമായ ഒരു സ്വകാര്യ റിയൽ എസ്റ്റേറ്റ് ഡെവലപ്പറാണ് എംബസി ഗ്രൂപ്പ്. വാണിജ്യം, പാർപ്പിടം, ഹോസ്പിറ്റാലിറ്റി, വ്യാവസായിക വെയർഹൗസ് സ്ഥലങ്ങൾ, റീട്ടെയിൽ തുടങ്ങിയ മേഖലകളിൽ പ്രവർത്തന സാന്നിധ്യമുള്ള കമ്പനിയാണ് എംബസി ഗ്രൂപ്പ് . ബെംഗളൂരു, ചെന്നൈ, ഹൈദരാബാദ്, പൂനെ, കോയമ്പത്തൂർ, തിരുവനന്തപുരം തുടങ്ങി നിരവധി ഇന്ത്യൻ നഗരങ്ങളിൽ കമ്പനി പ്രോജക്ടുകൾ വികസിപ്പിച്ചെടുത്തിട്ടുണ്ട്.
