ഡൽഹി: മികച്ച വിൽപ്പനയിലൂടെ ജൂണിൽ അവസാനിച്ച പാദത്തിൽ 39 ശതമാനം വർദ്ധനവോടെ 469.56 കോടി രൂപയുടെ ഏകീകൃത അറ്റാദായം രേഖപ്പെടുത്തി റിയൽറ്റി പ്രമുഖരായ ഡിഎൽഎഫ് ലിമിറ്റഡ്. മുൻ വർഷം ഇതേ കാലയളവിൽ 337.16 കോടി രൂപയായിരുന്നു കമ്പനിയുടെ അറ്റാദായം. ഈ സാമ്പത്തിക വർഷത്തിന്റെ ആദ്യ പാദത്തിൽ മൊത്ത വരുമാനം 1,242.27 കോടിയിൽ നിന്ന് 1,516.28 കോടി രൂപയായി ഉയർന്നതായി കമ്പനിയുടെ റെഗുലേറ്ററി ഫയലിംഗ് വ്യക്തമാക്കുന്നു.
കൂടാതെ മുൻവർഷത്തെ അപേക്ഷിച്ച് ഈ സാമ്പത്തിക വർഷത്തെ ഏപ്രിൽ-ജൂൺ കാലയളവിൽ വിൽപ്പന ബുക്കിംഗ് ഇരട്ടിയായി വർധിച്ച് 2,040 കോടി രൂപയിലെത്തിയെന്ന് ഡിഎൽഎഫ് പ്രസ്താവനയിൽ പറഞ്ഞു. പാർപ്പിട ആവശ്യകതകൾ സുസ്ഥിരമായ ആക്കം പ്രകടമാക്കുന്നത് തുടരുന്നതായും, ആഡംബര വീടുകൾക്കുള്ള ഉയർന്ന ഡിമാൻഡ് തുടരുമെന്ന് പ്രതീക്ഷിക്കുന്നതായും കമ്പനി പറഞ്ഞു.
തങ്ങളുടെ ആഡംബര പദ്ധതിയായ ‘ദി കാമെലിയാസ്’ ഈ പാദത്തിലെ വിൽപ്പന ബുക്കിംഗിൽ 352 കോടി രൂപയുടെ സംഭാവന ചെയ്തതായി ഡിഎൽഎഫ് എടുത്തുപറഞ്ഞു. പലിശനിരക്ക് ഉയരുന്നത് ചില വെല്ലുവിളികൾ സൃഷ്ടിച്ചേക്കാം, എന്നാൽ റസിഡൻഷ്യൽ വിഭാഗത്തിൽ ഈ ഘടനാപരമായ വീണ്ടെടുക്കൽ തുടരുമെന്ന് തങ്ങൾ പ്രതീക്ഷിക്കുന്നതായി ഡിഎൽഎഫ് പറഞ്ഞു.
ഒന്നിലധികം സെഗ്മെന്റുകളിലും ഭൂമിശാസ്ത്രത്തിലും കമ്പനി പുതിയ ഓഫറുകൾ കൊണ്ടുവരുന്നത് തുടരും. തങ്ങൾ ഈ പാദത്തിൽ 421 കോടി രൂപ മിച്ച പണം സൃഷ്ടിച്ചതായും തൽഫലമായി തങ്ങളുടെ അറ്റ കടം 2,259 കോടി രൂപയായി കുറഞ്ഞതായും കമ്പനി പറഞ്ഞു. വിപണി മൂലധനത്തിന്റെ കാര്യത്തിൽ ഏറ്റവും വലിയ റിയൽ എസ്റ്റേറ്റ് കമ്പനിയാണ് ഡിഎൽഎഫ്. കമ്പനി ഇതുവരെ 330 ദശലക്ഷം ചതുരശ്ര അടി വിസ്തീർണ്ണമുള്ള 153-ലധികം റിയൽ എസ്റ്റേറ്റ് പ്രോജക്ടുകൾ വികസിപ്പിച്ചെടുത്തിട്ടുണ്ട്.
