മുംബൈ: 1,668.50 കോടി രൂപയുടെ നിർമ്മാണ പദ്ധതിക്കായി കമ്പനിക്ക് എൻഎച്ച്എഐയിൽ നിന്ന് അംഗീകാരപത്രം (എൽഒഎ) ലഭിച്ചതായി അശോക ബിൽഡ്കോൺ റെഗുലേറ്ററി ഫയലിംഗിൽ അറിയിച്ചു.
നാഷണൽ ഹൈവേ അതോറിറ്റി ഓഫ് ഇന്ത്യ (എൻഎച്ച്എഐ) നടത്തിയ ലേലത്തിലൂടെയാണ് കമ്പനി ഈ പദ്ധതി സ്വന്തമാക്കിയത്. ഇതിന്റെ ലേല മൂല്യം 1,668.50 കോടി രൂപയാണ്. ഇപിസി അടിസ്ഥാനത്തിൽ ഭാരത്‌മാല പരിയോജനയുടെ കീഴിൽ കേരളത്തിലെ എൻഎച്ച് – 66 ന്റെ അരൂർ മുതൽ തുറവൂർ വരെയുള്ള (ദൈർഘ്യം 12.752 കി.മീ.) നിലവിലുള്ള 4 വരി പാത വികസിപ്പിക്കുന്നതിനൊപ്പം 6 വരി എലിവേറ്റഡ് കോറിഡോർ നിർമ്മിക്കുന്നതാണ്‌ നിർദിഷ്ട പദ്ധതി.
എഞ്ചിനീയറിംഗ്, പ്രൊക്യുർമെന്റ്, കൺസ്ട്രക്ഷൻ അടിസ്ഥാനത്തിലുള്ള (ഇപിസി) ഇൻഫ്രാസ്ട്രക്ചർ സൗകര്യങ്ങളുടെ നിർമ്മാണത്തിലും റെഡി മിക്‌സ് കോൺക്രീറ്റിന്റെ ബിഒടി അടിസ്ഥാനത്തിലുള്ള വിൽപ്പനയിലും ഏർപ്പെട്ടിരിക്കുന്ന പ്രമുഖ കമ്പനിയാണ് അശോക ബിൽഡ്കോൺ. കഴിഞ്ഞ പാദത്തിൽ കമ്പനിയുടെ ഏകീകൃത അറ്റാദായം 20.4% ഇടിഞ്ഞ് 63.66 കോടി രൂപയായി കുറഞ്ഞിരുന്നു.
