ഇന്ത്യയിൽ കൂടുതൽ റീട്ടെയിൽ സ്റ്റോറുകളുമായി ആപ്പിൾ. ഈ റീട്ടെയ്ൽ സ്റ്റോറുകളിലേക്ക് കൂടുതൽ തൊഴിലാളികളെ നിയമിക്കാൻ ഒരുങ്ങുകയാണ് കമ്പനി. ഇന്ത്യയിൽ രണ്ട് പ്രീമിയം റീട്ടെയിൽ സ്റ്റോറുകൾ ആണ് ഈ വർഷം കമ്പനി ആരംഭിക്കുന്നത്.
ഇന്ത്യയിൽ ബിസിനസ് കൂടുതൽ മെച്ചപ്പെടുത്തുകയാണ് ലക്ഷ്യം. ഏപ്രിലോടെ മുംബൈയിലും തുടർന്ന് ഡൽഹിയിലും രണ്ട് റീട്ടെയിൽ സ്റ്റോറുകൾ ആരംഭിക്കുമെന്നാണ് സൂചന. കൊവിഡ് പ്രതിസന്ധിയാണ് ഇന്ത്യയിൽ റീട്ടെയ്ൽ സ്റ്റോറുകൾ ആരംഭിക്കാനുള്ള ആപ്പിളിൻെറ പദ്ധതിക്ക് കാലതാമസം നേരിടാൻ കാരണം.
രണ്ട് ആഴ്ചകൾക്കുള്ളിൽ രാജ്യത്ത് വൻകിട വിദേശ കമ്പനി ഒന്നിലധികം ഔട്ട്ലെറ്റുകൾ തുറക്കുന്നു എന്നത് ശ്രദ്ധേയമാണ്.
ആദ്യ സ്റ്റോർ മുംബൈയിലെ ബാന്ദ്ര കുർള കോംപ്ലക്സ് ബിസിനസ് ഡിസ്ട്രിക്റ്റിൽ വരുമെന്നാണ് റിപ്പോർട്ടുകൾ. ഏതാനും ആഴ്ചകൾക്കുള്ളിൽ ഡൽഹിയിലെ സാകേതിൽ അടുത്ത സ്റ്റോർ ആരംഭിക്കും. വൻകിട ടെക് കമ്പനി വിവിധ തസ്തികകളിലേക്ക് നിയമനം ആരംഭിച്ചു.
ഫ്രാഞ്ചൈസിക്ക് താൽപ്പര്യമില്ലെന്നും ആപ്പിൾ നേരിട്ട് രാജ്യത്ത് ഔട്ട്ലെറ്റുകൾ തുടങ്ങുമെന്നും 2020-ൽ ആപ്പിളിന്റെ വാർഷിക ഷെയർഹോൾഡർ മീറ്റിംഗിൽ കമ്പനി സിഇഒ ടിം കുക്ക് വ്യക്തമാക്കിയിരുന്നു. എന്നാൽ 2021-ൽ റീട്ടെയ്ൽ സ്റ്റോർ തുറക്കാനുള്ള ആപ്പിളിന്റെ പദ്ധതികൾ കൊവിഡ് കാരണം താളം തെറ്റുകയായിരുന്നു.
ഇന്ത്യ 10 വർഷത്തിലേറെയായി ആപ്പിളിന്റെ വിപണികളിൽ ഒന്നാണ്. ആപ്പിൾ ഉൽപ്പന്നങ്ങൾ നേരിട്ടു വാങ്ങാൻ ഇന്ത്യക്കാർ ദുബായിലോ സിംഗപ്പൂരിലേോ എത്തുന്നതായിരുന്നു ഇതുവരെയുള്ള അവസ്ഥ എങ്കിൽ ഇനി നേരിട്ട് പ്രീമിയം ഉൽപ്പന്നങ്ങൾ വാങ്ങാനാകും.
കമ്പനിയുടെ വിതരണ ശൃംഖല ശക്തിപ്പെടുത്തുന്നതിനായി ആപ്പിൾ ഇന്ത്യയിലേക്കും വിയറ്റ്നാമിലേക്കും ബിസിനസ് വ്യാപിപ്പിക്കുന്നുണ്ട്. കൂടുതൽ ഔട്ട്ലെറ്റുകൾ വ്യാപിപ്പിക്കുന്നതും ഇന്ത്യയിൽ ഫാക്ടറി ആരംഭിക്കുന്നതും ചൈനക്ക് തിരിച്ചടിയാണ്.
ആപ്പിളഇൻെറ പ്രധാന വിതരണക്കാരായ ചൈനയ്ക്ക് ഇതോടെ മുൻനിര ഐഫോൺ നിർമ്മാതാക്കളെന്ന ഖ്യാതി നഷ്ടപ്പെട്ടേക്കാം.
ഏറ്റവും വലിയ ആപ്പിൾ വിതരണ കമ്പനിയായ ഫോക്സ്കോൺ ആപ്പിൾ ഐപാഡ്, മാക്ബുക്ക് ഉൽപ്പാദനം വിയറ്റ്നാമിലേക്ക് മാറ്റാനുള്ള ” പദ്ധതികൾ തയ്യാറാക്കുന്നതായി റിപ്പോർട്ടുകൾ ഉണ്ട്.
കോവിഡ് ഡിമാൻഡ് ദുർബലമാക്കുമെന്നും വിതരണം തടസപ്പെടുത്തുമെന്നും ചൂണ്ടിക്കാട്ടി ആപ്പിൾ ചൈനയിൽ നിന്നുള്ള ഓർഡറുകൾ വെട്ടിക്കുറച്ചതായി സൂചനയുണ്ട്.
കമ്പനിയുടെ ലാഭം കുറഞ്ഞതിനാൽ തനിക്ക് ലഭിക്കുന്ന വളരെ ഉയർന്ന ശമ്പളം കുറച്ചുകൊള്ളാൻ കമ്പനിയോട് അഭ്യർത്ഥിച്ച് ആപ്പിൾ സിഇഒ ടിം കുക്ക് കഴിഞ്ഞയാഴ്ച വാർത്തകളിൽ നിറഞ്ഞിരുന്നു. ടിം കുക്കിൻെറ ശമ്പളം പകുതിയായി കുറച്ചത്.
അടിസ്ഥാന ശമ്പളവും ബോണസും ഒക്കെയുൾപ്പെടെ 398 കോടി രൂപയാണ് ടിം കുക്കിൻെറ പുതുക്കിയ വാർഷിക പാക്കേജ്.
