ഇന്ത്യൻ ഓഹരിവിപണിയിൽ അദാനി ഓഹരികൾക്ക് ആശ്വാസം. അദാനി ഗ്രൂപ്പിലെ ഓഹരികൾ, അവയുടെ 52 ആഴ്ചയിലെ താഴ്ന്ന നിലവാരത്തിൽ നിന്ന് ഏകദേശം 95% വരെ തിരിച്ചു കയറി.
ആഗോള നിക്ഷേപ സ്ഥാപനമായ ജിക്യുജി പാർട്ണേഴ്സ്, നാല് അദാനി ഓഹരികളിൽ നടത്തിയ നിക്ഷേപമാണ് വില വർധിക്കാൻ പ്രധാന കാരണമായതെന്നാണ് വിലയിരുത്തൽ.
അദാനി പോർട്സ് & സ്പെഷ്യൽ ഇക്കണോമിക് സോൺ, അദാനി ഗ്രീൻ എനർജി, അദാനി എന്റർപ്രൈസസ്, അദാനി ട്രാൻസ്മിഷൻ എന്നീ ഓഹരികളിലാണ് നിക്ഷേപം.
52 ആഴ്ചയിലെ താഴ്ന്ന നിലവാരത്തിൽ നിന്ന് 95% ഉയർന്ന അദാനി എന്റർപ്രൈസസ് ആണ് ഏറ്റവും കൂടുതൽ ലാഭമുണ്ടാക്കിയത്. അദാനി പോർട്സ് ആണ് പിന്നീട് നേട്ടമുണ്ടാക്കിയ ഓഹരി. 52 ആഴ്ചയിലെ താഴ്ന്ന നിലവാരമായ 394.95 രൂപയിൽ നിന്ന് 75% വില വർധിച്ച് 690.50 രൂപയിലെത്തി.
അദാനി ഗ്രീൻ എനർജി, അദാനി വിൽമർ, അദാനി ടോട്ടൽ ഗ്യാസ്, അദാനി ട്രാൻസ്മിഷൻ, എസിസി എന്നീ ഓഹരികളും നേട്ടമുണ്ടാക്കി. ഈ ഓഹരികളുടെ 52 ആഴ്ചയിലെ താഴ്ന്ന നിലവാരത്തിൽ നിന്ന് 12 മുതൽ 34 ശതമാനം വരെ നേട്ടമാണുണ്ടായത്.
ജിക്യുജി പാർട്ണേഴ്സ് നടത്തിയ നിക്ഷേപം അദാനി ഓഹരികളുടെ വില ഉയരാൻ പ്രധാന കാരണമായെന്ന് വെൽത്ത് മിൽസ് ഇക്വിറ്റി സ്ട്രാറ്റജിസ്റ്റായ ക്രാന്തി ബതീനി പറഞ്ഞു. ഇതു കൂടാതെ അദാനി മാനേജ്മെന്റ് നിരവധി ഇൻസ്റ്റിസ്റ്റ്യൂഷണൽ ഇൻവെസ്റ്റേഴ്സിനെ നേരിട്ടു കാണാൻ ഒരുങ്ങുകയാണ്.
വിവിധ രാജ്യങ്ങളിലും, വിപണികളിലുമുള്ള നിക്ഷേപകരുമായി ചർച്ചകൾ നടത്തുന്നത് പോസിറ്റീവായ വാർത്തകൾ സൃഷ്ടിക്കുന്നതിന് കാരണമാവുമെന്നും അവർ അഭിപ്രായപ്പെട്ടു.
അദാനി എന്റർപ്രൈസ് ഓഹരികൾ 2,000 രൂപ നിലവാരത്തിലെത്താൻ എല്ലാ സാധ്യതയുമുണ്ടെന്ന് വെഞ്ച്വുറ സെക്യൂരിറ്റീസ് റിസർച്ച് ഹെഡായ വിനിത് ബോളിഞ്ച്കർ പറഞ്ഞു. അടുത്ത രണ്ട് വർഷങ്ങളിൽ അദാിനി പോർട്സ് ഓഹരികൾ 100% വരെ ഉയരാൻ സാധ്യതയുണ്ട്.
നിലവിലെ വാല്യുവേഷൻ അടിസ്ഥാനപ്പെടുത്തിയുള്ള കണക്കാണിത്. കൂടാതെ ഇന്ത്യയുടെ കയറ്റുമതിയും, ഇറക്കുമതിയും വർധിക്കാിൻ സാധ്യതയുള്ളതും ഇതിന് കാരണമാണെന്ന് അദ്ദേഹം ചൂണ്ടിക്കാട്ടി.
