മുംബൈ: പ്രമുഖ വസ്ത്ര നിർമ്മാതാവും കയറ്റുമതിക്കാരനുമായ ഗോകൽദാസ് എക്‌സ്‌പോർട്ട്‌സിന്റെ ഓഹരികൾ സ്വന്തമാക്കി അബുദാബി ഇൻവെസ്റ്റ്‌മെന്റ് അതോറിറ്റി (എഡിഐഎ). ഓപ്പൺ മാർക്കറ്റ് ഇടപാടിലൂടെ കമ്പനിയുടെ 15 ലക്ഷം ഇക്വിറ്റി ഓഹരികളാണ് എഡിഐഎ സ്വന്തമാക്കിയത്.
ഒരു ഓഹരിക്ക് ശരാശരി 349.75 രൂപ എന്ന നിരക്കിലാണ് ഇടപാട് നടന്നതെന്ന് എൻഎസ്ഇയിൽ ലഭ്യമായ ഇടപാട് ഡാറ്റ കാണിക്കുന്നു. നിലവിൽ കമ്പനിയുടെ ഓഹരികൾ 10 ശതമാനം ഉയർന്ന് 365 രൂപയിലാണ് വ്യാപാരം നടത്തുന്നത്.
ഗോകാൽദാസ് എക്‌സ്‌പോർട്ട്‌സിന്റെ പ്രധാന വിപണിയാണ് യുഎസ്. ഇത് കമ്പനിയുടെ മൊത്ത വരുമാനത്തിന്റെ 75-80 ശതമാനം സംഭാവന ചെയ്യുന്നു. അതേസമയം യൂറോപ്പ്യൻ വിപണിയുടെ സംഭാവന 4 ശതമാനത്തിൽ താഴെയാണ്. 2023-24 സാമ്പത്തിക വർഷത്തിനിടയിൽ 280 കോടി രൂപയുടെ നിക്ഷേപം നടത്താനാണ് കമ്പനി പദ്ധതിയിടുന്നത്.
