മുംബൈ: ഇന്ത്യ ഫസ്റ്റ്‌ ലൈഫ്‌ ഇന്‍ഷുറന്‍സ്‌, സ്‌നാപ്‌ഡീല്‍, ടാറ്റ ടെക്‌നോളജീസ്‌, ഗോ ഡിജിറ്റ്‌ ഇന്‍ഷുറന്‍സ്‌ എന്നിവ ഉള്‍പ്പെടെ എണ്‍പതോളം കമ്പനികള്‍ ഇനീഷ്യല്‍ പബ്ലിക്‌ ഓഫര്‍ (ഐപിഒ) വഴി ഓഹരി വില്‍പ്പന നടത്താന്‍ ഒരുങ്ങുന്നു.
മാസങ്ങളോളം ദുര്‍ബലമായി കിടന്ന ഐപിഒ വിപണി സജീവമായത്‌ മാന്‍കൈന്റ്‌ ഫാര്‍മയുടെ ലിസ്റ്റിംഗോടെയാണ്‌. 4326 കോടി രൂപ ഐപിഒ വഴി സമാഹരിച്ച മാന്‍കൈന്റ്‌ ഫാര്‍മ മികച്ച ലിസ്റ്റിംഗ്‌ നേട്ടമാണ്‌ നല്‍കിയത്‌.
അതിനു ശേഷം അഞ്ച്‌ ഐപിഒകളാണ്‌ വിപണിയിലെത്തിയത്‌. അടുത്ത രണ്ട്‌ മാസങ്ങള്‍ക്കുള്ളില്‍ ഒരു പിടി ഐപിഒകള്‍ എത്തുമെന്നാണ്‌ പ്രതീക്ഷിക്കുന്നത്‌. എണ്‍പതോളം കമ്പനികളാണ്‌ ഐപിഒ നടത്താനായി സെബിക്ക്‌ അപേക്ഷ നല്‍കിയിരിക്കുന്നത്‌.
ധനകാര്യ സേവനം, ആരോഗ്യ പരിരക്ഷ, ഉല്‍പ്പാദനം തുടങ്ങിയ വിവിധ മേഖലകളില്‍ നിന്നുള്ള പബ്ലിക്‌ ഇഷ്യുകളാണ്‌ എത്തുന്നത്‌.
ഈയിടെ ലിസ്റ്റ്‌ ചെയ്‌ത സയന്റ്‌ ഡിഎല്‍എം, ഐഡിയാഫോര്‍ജ്‌, ഐകിയോ ലൈറ്റിംഗ്‌ തുടങ്ങിയ ഓഹരികള്‍ മികച്ച ലിസ്റ്റിംഗ്‌ നേട്ടമാണ്‌ നല്‍കിയത്‌.
