മുംബൈ: ഇന്ത്യൻ ഓഹരി വിപണിയിലേക്ക് വിദേശ നിക്ഷേപകരെ (FIIs/FPIs) വീണ്ടും ആകർഷിക്കുന്നതിനും വിപണിയിലെ മന്ദഗതി ഒഴിവാക്കുന്നതിനുമായി സുപ്രധാന നികുതി ഇളവുകൾ നിർദേശിച്ച് മാർക്കറ്റ് റെഗുലേറ്ററായ സെബി (SEBI).
വിദേശ നിക്ഷേപകർക്കുമേൽ ചുമത്തുന്ന ദീർഘകാല മൂലധന നേട്ട നികുതി (LTCG Tax) പൂർണ്ണമായും ഒഴിവാക്കണമെന്ന് സെബി കേന്ദ്ര സർക്കാരിനോട് ശുപാർശ ചെയ്തു. ഫെബ്രുവരിയിൽ അവതരിപ്പിക്കുന്ന കേന്ദ്ര ബജറ്റിന് മുന്നോടിയായി നൽകിയ പ്രീ-ബജറ്റ് ശുപാർശകളിലാണ് ഈ നിർദേശമുള്ളത്.
എന്നാൽ ഈ ശുപാർശകളിൽ അന്തിമ തീരുമാനമെടുക്കേണ്ടത് കേന്ദ്ര ധനകാര്യ മന്ത്രാലയമാണ്.
വിദേശ നിക്ഷേപകരെ ആകർഷിക്കാൻ നടപടി
കഴിഞ്ഞ രണ്ട് വർഷമായി മറ്റ് ഉയർന്നുവരുന്ന വിപണികളുമായി (Emerging Markets) താരതമ്യം ചെയ്യുമ്പോൾ ഇന്ത്യൻ ഓഹരി വിപണിയിൽ തിരിച്ചടിയാണ് നേരിടുന്നത്. നിഫ്റ്റി 50 സൂചിക സൂചിപ്പിക്കുന്നത് പ്രകാരം വിപണിയിൽ പ്രകടമായ തളർച്ച അനുഭവപ്പെട്ടിട്ടുണ്ട്. ഇതിനുപുറമെ, ഈ വർഷം മാത്രം വിദേശ നിക്ഷേപകർ ഏകദേശം 3,100 കോടി ഡോളറിന്റെ (31 Billion USD) ഓഹരികളാണ് ഇന്ത്യൻ വിപണിയിൽ നിന്ന് വിറ്റഴിച്ചത്.
ഇന്ത്യയിൽ ഓഹരി നിക്ഷേപം നടത്തുന്നതിനുള്ള ട്രാൻസാക്ഷൻ ചെലവുകൾ ലോകത്തിലെ തന്നെ ഏറ്റവും ഉയർന്ന നിരക്കുകളില ഒന്നാണെന്ന് സെബി ചൂണ്ടിക്കാണിക്കുന്നു. നിലവിൽ ഒരു വർഷത്തിലധികം കൈവശം വെക്കുന്ന ഓഹരികൾക്ക് 12.5 ശതമാനം ദീർഘകാല മൂലധന നേട്ട നികുതിയും, ഒരു വർഷത്തിൽ താഴെയുള്ളവയ്ക്ക് 20 ശതമാനം ഹ്രസ്വകാല മൂലധന നേട്ട നികുതിയും (STT) വിദേശ നിക്ഷേപകർ നൽകേണ്ടതുണ്ട്.
ഈ മുൻകൂർ നികുതി ഭാരം കുറയ്ക്കുന്നത് വിദേശ പണം വീണ്ടും ഇന്ത്യൻ വിപണിയിലേക്ക് എത്തുന്നതിന് സഹായിക്കുമെന്നാണ് വിലയിരുത്തൽ.
മ്യൂച്വൽ ഫണ്ട് നിക്ഷേപകർക്കും ആശ്വാസ നിർദേശം
വിദേശ നിക്ഷേപകർക്ക് പുറമെ ആഭ്യന്തര മ്യൂച്വൽ ഫണ്ട് (Mutual Fund) നിക്ഷേപകർക്കും ആശ്വാസകരമായ മാറ്റങ്ങൾ സെബി നിർദേശിച്ചിട്ടുണ്ട്.
നിലവിലുള്ള ഒരു മ്യൂച്വൽ ഫണ്ട് സ്കീമിൽ നിന്ന് പണം പിൻവലിച്ച് മറ്റൊരു സ്കീമിലേക്ക് നിക്ഷേപിക്കുമ്പോൾ (Switching), അത് ഒരു വർഷത്തിനു ശേഷമാണെങ്കിൽ അതിനെ നികുതി ബാധ്യതയുള്ള വിൽപനയായി കണക്കാക്കരുത് എന്നാണ് സെബിയുടെ ശുപാർശ.
റീറ്റെയ്ല്‍ നിക്ഷേപകർക്ക് പോർട്ട്ഫോളിയോ പുനഃക്രമീകരിക്കുമ്പോൾ (Rebalancing) ഉണ്ടാകുന്ന അധിക നികുതി ഭാരം ഒഴിവാക്കാനും മ്യൂച്വൽ ഫണ്ടുകളിൽ കൂടുതൽ കാലം നിക്ഷേപം നിലനിർത്താനും ഇത് പ്രോത്സാഹനമാകും.
