ന്യൂഡൽഹി: മിഡിൽ ഈസ്റ്റിലെ ഇറാൻ യുദ്ധസാഹചര്യങ്ങളും വിതരണ തടസ്സങ്ങളും നിലനിൽക്കെ ഇന്ത്യയുടെ വ്യാപാര കമ്മിയിൽ അപ്രതീക്ഷിത കുറവ് രേഖപ്പെടുത്തി. മാർച്ചിലെ കണക്കുകൾ പ്രകാരം കമ്മി ഒമ്പത് മാസത്തെ ഏറ്റവും താഴ്ന്ന നിലയായ 20.67 ബില്യൺ ഡോളറിലെത്തി.
അമേരിക്ക വിപണിയിലേക്കുള്ള കയറ്റുമതിയിൽ ഉണ്ടായ 17.4 ശതമാനം വർധനയാണ് ഈ നേട്ടത്തിന് പ്രധാനമായും തുണയായത്. അമേരിക്കൻ സുപ്രീം കോടതി വിധിയെത്തുടർന്ന് തീരുവ 10 ശതമാനമായി കുറഞ്ഞത് തുണിത്തരങ്ങൾ, എഞ്ചിനീയറിംഗ് വസ്തുക്കൾ എന്നിവയുടെ കയറ്റുമതി വർദ്ധിപ്പിക്കാൻ സഹായിച്ചു.
ഹോർമുസ് കടലിടുക്കിലെ സംഘർഷാവസ്ഥ കാരണം മിഡിൽ ഈസ്റ്റിലേക്കുള്ള ഇന്ത്യയുടെ കയറ്റുമതിയിൽ 3.5 ബില്യൺ ഡോളറിന്റെ കുറവുണ്ടായതായി വ്യാപാര സെക്രട്ടറി രാജേഷ് അഗർവാൾ വ്യക്തമാക്കി.
കപ്പൽ ഗതാഗത തടസ്സങ്ങളും ഇൻഷുറൻസ് ചെലവ് വർദ്ധിച്ചതും വെല്ലുവിളിയായെങ്കിലും ക്രൂഡ് ഓയിൽ (36%), സ്വർണ്ണം (31.6%) എന്നിവയുടെ ഇറക്കുമതിയിൽ ഉണ്ടായ ഗണ്യമായ കുറവ് മൊത്തം വ്യാപാര കമ്മി നിയന്ത്രിക്കാൻ സഹായിച്ചു. സേവന മേഖലയിൽ 18.24 ബില്യൺ ഡോളറിന്റെ മിച്ചം രേഖപ്പെടുത്തിയത് ഇന്ത്യയുടെ സാമ്പത്തിക നിലയ്ക്ക് കരുത്തേകി.
അമേരിക്കയുമായുള്ള ഇടക്കാല വ്യാപാര കരാർ അന്തിമമാക്കാനുള്ള നടപടികളുമായി ഇന്ത്യ മുന്നോട്ട് പോകുകയാണ്. ഇതിന്റെ ഭാഗമായി ഏപ്രിൽ 20-ന് ഇന്ത്യൻ സംഘം നേരിട്ടുള്ള ചർച്ചകൾക്കായി അമേരിക്ക സന്ദർശിക്കും. ഇന്ത്യൻ ഉൽപ്പന്നങ്ങളുടെ തീരുവ ഏകദേശം 18 ശതമാനമായി കുറയ്ക്കാനാണ് ഇന്ത്യ ലക്ഷ്യമിടുന്നത്.
കഴിഞ്ഞ സാമ്പത്തിക വർഷം ഇന്ത്യയുടെ മൊത്തം കയറ്റുമതി 860.09 ബില്യൺ ഡോളറിലെത്തി 4.22 ശതമാനം വളർച്ച രേഖപ്പെടുത്തിയിട്ടുണ്ട്. വരും മാസങ്ങളിൽ അമേരിക്കൻ ഡിമാൻഡ് വർദ്ധിക്കുന്നത് വിപണിയിൽ കൂടുതൽ അനുകൂല തരംഗമുണ്ടാക്കുമെന്നാണ് പ്രതീക്ഷ.
