ന്യൂഡൽഹി: നാളികേര മേഖലയുടെ സാധ്യതകൾ എടുത്തുപറഞ്ഞുകൊണ്ട്, ഒരു വർഷത്തിനിടെ ഇന്ത്യയുടെ നാളികേര കയറ്റുമതി 4,349 കോടി രൂപയിൽ നിന്ന് 7,038 കോടി രൂപയായി വർദ്ധിച്ചതായും 62 ശതമാനം വളർച്ച രേഖപ്പെടുത്തിയതായും കേന്ദ്ര കൃഷി മന്ത്രി ശിവരാജ് സിംഗ് ചൗഹാൻ പറഞ്ഞു. നാളികേര കൃഷിയെ പ്രോത്സാഹിപ്പിക്കുന്നതിനായി ബജറ്റിൽ ഒരു പുതിയ പദ്ധതി പ്രഖ്യാപിച്ചിട്ടുണ്ടെന്നും ഉടൻ തന്നെ അത് പ്രവർത്തനക്ഷമമാകുമെന്നും അദ്ദേഹം വ്യക്തമാക്കി. രാജ്യത്ത് നാളികേര ഉൽപ്പാദനത്തിൽ ദക്ഷിണേന്ത്യൻ സംസ്ഥാനങ്ങളാണ് മുൻപന്തിയിൽ നിൽക്കുന്നത് എന്നതിനാൽ, ഈ പുതിയ പദ്ധതി പൂർണ്ണമായി പ്രയോജനപ്പെടുത്താൻ അവർ തയ്യാറെടുപ്പുകൾ ആരംഭിക്കണം. പഴയ തെങ്ങിൻതോപ്പുകൾ പുനരുജ്ജീവിപ്പിക്കുന്നതിനായി ഒരു കർമ്മപദ്ധതി ആവിഷ്കരിക്കാനും അദ്ദേഹം ആഹ്വാനം ചെയ്തു. 60-70 വർഷം പഴക്കമുള്ള തെങ്ങുകൾ പലപ്പോഴും കുറഞ്ഞ അളവിലാണ് കായ്ഫലം തരുന്നതെന്നും അവയിൽ നിന്ന് പ്രതീക്ഷിക്കുന്ന ഗുണനിലവാരം ലഭിച്ചേക്കില്ലെന്നും അദ്ദേഹം ചൂണ്ടിക്കാട്ടി. അതിനാൽ, പഴയ തെങ്ങുകൾക്ക് പകരം പുതിയ തൈകൾ വച്ചുപിടിപ്പിക്കാനും ഘട്ടംഘട്ടമായി തെങ്ങിൻ തോപ്പുകൾ വളർത്തിയെടുക്കാനും സംസ്ഥാനങ്ങൾ മുൻകൈയെടുക്കണം. കശുവണ്ടി, കൊക്കോ എന്നിവയുടെ പ്രോത്സാഹന പദ്ധതികൾക്കായി സംസ്ഥാനങ്ങൾ മുൻകൂട്ടി തയ്യാറെടുക്കണമെന്നും, അതിലൂടെ ഈ മേഖലകളിലെ കർഷകർക്ക് പരമാവധി പ്രയോജനം ലഭിക്കുന്ന തരത്തിൽ നടപടികൾ സ്വീകരിക്കണമെന്നും ശ്രീ ചൗഹാൻ ആവശ്യപ്പെട്ടു.
