റിലയൻസ് റീടെയിലിന്റെ ബിസിനസിന് ഇപ്പോൾ നേതൃത്ത്വം നൽകുന്നത് മുകേഷ് അംബാനിയുടെ മകൾ ഇഷ അംബാനിയാണ്. 1985000 കോടി രൂപ വിപണി മൂല്യമുള്ള, രാജ്യത്തെ ഏറ്റവും വലിയ കമ്പനിയായ റിലയൻസ് ഇൻഡസ്ട്രീസിന്റെ പ്രധാനപ്പെട്ട സബ്സിഡിയറി കമ്പനിയാണിത്.
നിലവിൽ ആഭ്യന്തരമായി, ഇലക്ട്രോണിക്സ് ഉല്പന്നങ്ങൾ നിർമിച്ച്, വില കുറച്ച് വിപണിയിൽ എത്തിക്കാനാണ് റിലയൻസ് റീടെയിൽ, പുതിയ ബ്രാൻഡായ Wyzr വഴി ശ്രമിക്കുന്നത്. എസി. ടെലിവിഷൻ എന്നിവയെല്ലാം ഇത്തരത്തിൽ ലഭ്യമാക്കാനാണ് ശ്രമം.
ഇത്തരത്തിൽ ടെലികോം മേഖലയിൽ ജിയോ സൃഷ്ടിച്ച കൊടുങ്കാറ്റിന് സമാനമായി റീടെയിൽ മേഖലയിലും വിപ്ലവം സൃഷ്ടിക്കുക എന്നതും കമ്പനി ലക്ഷ്യമിടുന്നു.
മുകേഷ് അംബാനി, റിലയൻസ് റീടെയിലിന്റെ ചുമതല ഇഷ അംബാനിക്ക് കൈമാറുന്നത് 2022 ആഗസ്റ്റിലാണ്. അതിനു ശേഷവും ഈ ബ്രാൻഡ് സ്ഥിരതയോടെയുള്ള വളർച്ച പ്രകടമാക്കുന്നു.
നിലവിൽ ഏകദേശം 820000 കോടി രൂപയാണ് കമ്പനിയുടെ വിപണി മൂല്യം. ആക്രമണോത്സുകമായ വികസനമാണ് കമ്പനിയുടെ രീതി. ഇത്തരത്തിലുള്ള വളർച്ചയുടെ മൊമന്റം നിലനിർത്താനും കമ്പനിക്ക് സാധിക്കുന്നു.
അടുത്തിടെ റിലയൻസ് റീടെയിൽ, Wyzr എന്ന പേരിൽ പുതിയ ഒരു ബ്രാൻഡ് പുറത്തിറക്കിയിരുന്നു. ഈ ബ്രാൻഡിന് കീഴിൽ എയർ കൂളർ വിപണിയിലെത്തിച്ചു കൊണ്ടായിരുന്നു തുടക്കം.
ആഭ്യന്തര കമ്പനികളായ ഡിക്സൺ ടെക്നോളജീസ്, ഒനീഡയുടെ മാതൃകമ്പനിയായ Mirc Electronics എന്നിവയുമായി റിലയൻസ് ചർച്ചകൾ തുടരുകയാണ്. ഇലക്ട്രോണിക്സ് ഉപകരണങ്ങൾ പുതിയ ബ്രാൻഡിന് കീഴിൽ ആഭ്യന്തരമായി നിർമിക്കുന്നതുമായി ബന്ധപ്പെട്ടാണിത്.
ഇത്തരത്തിൽ എയർ കണ്ടീഷണറുകൾ, ടെലിവിഷൻ തുടങ്ങിയവയെല്ലാം ആഭ്യന്തരമായി നിർമിച്ച് വിലക്കുറവിൽ ലഭ്യമാക്കുക എന്നതാണ് ലക്ഷ്യം.
ഇലക്ട്രോണിക്സ് മേഖലയിൽ വലിയ വിപണി പങ്കാളിത്തം ലഭിച്ചതിനു ശേഷം സ്വന്തം നിർമാണ യൂണിറ്റ് സജ്ജമാക്കാനാണ് റിലയൻസ് ഉദ്ദേശിക്കുന്നത്.
എസി, ടിവി എന്നിവ കൂടാതെ വാഷിങ് മെഷീൻ, റഫ്രിജറേറ്റർ, ചെറിയ അപ്ലയൻസുകൾ, എൽഇഡി ബൾബ് എന്നിവയെല്ലാം വിലക്കുറവിൽ നൽകി വിപണിയിൽ ഇടിമുഴക്കം സൃഷ്ടിക്കാനാണ് റിലയൻസ് റീടെയിൽ ഒരുങ്ങുന്നതെന്നാണ് വിലയിരുത്തപ്പെടുന്നത്.
ഇത്തരം ഉല്പന്നങ്ങൾ ആഭ്യന്തരമായി ഡിസൈൻ ചെയ്ത് വികസിപ്പിച്ചതിനു ശേഷം, റിലയൻസ് ഡിജിറ്റൽ സ്റ്റോറുകൾ, ആഭ്യന്തര റീടെയിൽ ചെയിനുകൾ, ഡീലർമാർ, ആമസോൺ-ഫ്ലിപ്കാർട്ട് അടക്കമുള്ള ഇ-കൊമേഴ്സ് പ്ലാറ്റ്ഫോമുകൾ തുടങ്ങിയവയിലൂടെ ലഭ്യമാക്കും.
എൽജി, സാംസങ്, വേൾപൂൾ തുടങ്ങിയ എസ്റ്റാബ്ലിഷ്ഡ് ആയ ബ്രാൻഡുകളുടേതിനേക്കാൾ കുറഞ്ഞ വിലയിൽ ഉല്പന്നങ്ങൾ പുറത്തിറക്കാനാണ് Wyzr എന്ന ബ്രാൻഡിലൂടെ റിലയൻസ് ശ്രമിക്കുക എന്നാണ് റിപ്പോർട്ടുകൾ.
