ഇത്തവണത്തെ ജൂൺ പാദഫലങ്ങൾ റിലയൻസ് ഇൻഡസ്ട്രീസിനെ സംബന്ധിച്ച് മികച്ചതായിരുന്നു. തൊട്ടു മുമ്പത്തെ വർഷത്തെ ജൂൺ പാദവുമായി താരതമ്യപ്പെടുത്തുമ്പോൾ 78.31% വർധനയാണ് ലാഭത്തിലുണ്ടായത്.
15,138 കോടി രൂപയിൽ നിന്ന് 26,994 കോടിയിലേക്കാണ് ലാഭം ഉയർന്നത്. തൊട്ടു മുമ്പത്തെ മാർച്ച് പാദവുമായി താരതമ്യപ്പെടുത്തുമ്പോൾ അറ്റാദായത്തിൽ 39% വർധനയുമുണ്ടായി. എന്നാൽ ഇതിനിടയിലും മുകേഷ് അംബാനി നേതൃത്ത്വം നൽകുന്ന കമ്പനിയുടെ കടബാധ്യതകൾ ഉയർന്നു നിൽക്കുന്നുണ്ട്.
റിലയൻസ് ഇൻഡസ്ട്രീസ് – കടബാധ്യത
സമീപ കാലത്തായി അഗ്രസീവായ ബിസിനസ് വികസനമാണ് റിലയൻസ് നടത്തുന്നത്. ഇതിനിടയിലാണ് കടവും ഉയരങ്ങളിൽ നിൽക്കുന്നത്. റിലയൻസ് ഇൻഡസ്ട്രീസ് പുറത്തിറക്കിയ 2024-25 സാമ്പത്തിക വർഷത്തിലെ വാർഷിക റിപ്പോർട്ടിൽ, കമ്പനിയുടെ ആകെ കടബാധ്യത ഏകദേശം 3.47 ലക്ഷം കോടി രൂപയാണെന്ന് പറയുന്നു.
അതേ സമയം, അറ്റ കടബാധ്യത 1.17 ലക്ഷം കോടി രൂപയാണ്. തൊട്ടു മുമ്പത്തെ 2024 സാമ്പത്തിക വർഷത്തിൽ റിലയൻസിന്റെ കടം 3.24 ലക്ഷം കോടി രൂപയായിരുന്നു.
ലാഭക്ഷമതയുണ്ടെങ്കിലും കമ്പനിയുടെ കടത്തിന്റെ ഭാരം വലുതാണെന്നാണ് ഈ കണക്കുകൾ നൽകുന്ന സൂചന. ബിസിനസുകൾ നടത്താനും, വികസിപ്പിക്കാനുമായി വലിയ കടമാണ് റിലയൻസ് എടുക്കുന്നത്.
അതേ സമയം ബിസിനസ് വളർച്ചയ്ക്കായി വലിയ നിക്ഷേപങ്ങൾ കമ്പനി നടത്തുന്നതായും, സാമ്പത്തികമായി ശക്തമായ നിലയാണുള്ളതെന്നും വാർഷിക റിപ്പോർട്ടിൽ പറയുന്നുമുണ്ട്.
റിലയൻസ് ഇൻഡസ്ട്രീസിന്റെ ചിലവുകൾ
2025 സാമ്പത്തിക വർഷത്തിൽ റിലയൻസിന്റെ മൂലധനച്ചിലവ് 1,31,107 കോടി രൂപയാണ്. 2023-24 സാമ്പത്തിക വർഷത്തിൽ ഇത് 1,31,769 കോടി രൂപയായിരുന്നു.
2025 സാമ്പത്തിക വർഷത്തിൽ കമ്പനിയുടെ കൂടുതൽ നിക്ഷേപങ്ങളും O2C (Oil-to-Chemical) പ്രൊജക്ടുകളുമായി ബന്ധപ്പെട്ടതാണ്. പുതിയ റീടെയിൽ സ്റ്റോറുകളുടെ ഓപ്പണിങ്, ഡിജിറ്റൽ സർവീസുകളുടെ വ്യാപനം, പുതിയ എനർജി സംരംഭങ്ങൾ, ക്രൂഡ് ഓയിൽ കെമിക്കൽ കൺവേർഷൻ തുടങ്ങിയവയുമായി ബന്ധപ്പെട്ടും കൂടുതൽ നിക്ഷേപങ്ങൾ നടത്തിയിരിക്കുന്നു
റിലയൻസ് ഇൻഡസ്ട്രീസ്
വലിയ കമ്പനികളെ സംബന്ധിച്ച് ഭീമമായ നിക്ഷേപങ്ങൾ നടത്തുമ്പോൾ ലോൺ എടുക്കുന്നതും സ്വാഭാവികമാണ്. കമ്പനിക്ക് ഇത്തരം വായ്പകൾ തിരിച്ചടയ്ക്കാനുള്ള ശേഷിയുണ്ടോ എന്നതാണ് പ്രധാനം.
ഇവിടെ, റിലയൻസ് ഇൻഡസ്ട്രീസ്, ഇന്ത്യയിലെ ഏറ്റവും വിപണി മൂല്യമുള്ള കമ്പനിയാണ്. കടബാധ്യതകൾ മാനേജ് ചെയ്യാവുന്ന നിലയിലാണ് കമ്പനി മുന്നോട്ടു കൊണ്ടു പോകാറുള്ളതെന്ന് വിദഗ്ധർ ചൂണ്ടിക്കാട്ടുന്നു.
അതിനാൽ മുകേഷ് അംബാനിയെ സംബന്ധിച്ച് ലക്ഷം കോടിയുടെ കടമൊന്നും ഒരു തലവേദനയാകാൻ ഇടയില്ലെന്നാണ് വിലയിരുത്തൽ.
