മുംബൈ ആസ്ഥാനമായി പ്രവര്ത്തിക്കുന്ന പവര് സൊല്യൂഷന്സ് പ്രൊവൈഡര് ആയ പവറിക ലിമിറ്റഡിന്റെ ഇനീഷ്യല് പബ്ലിക് ഓഫര് (ഐപിഒ) മാര്ച്ച് 24ന് തുടങ്ങും. മാര്ച്ച് 27 വരെയാണ് ഈ ഐപിഒ സബ്സ്ക്രൈബ് ചെയ്യാവുന്നത്. 375-395 രൂപയാണ് ഇഷ്യു വില. മാര്ച്ച് 30ന് ഓഹരികളുടെ അലോട്ട്മെന്റ് നടക്കും. ഏപ്രില് 2ന് ഓഹരികള് എന്എസ്ഇയിലും ബിഎസ്ഇയിലും ലിസ്റ്റ് ചെയ്യും.
പവറിക 1100 കോടി രൂപയാണ് ഐപിഒ വഴി സമാഹരിക്കുന്നത്. 700 കോടി രൂപയുടെ പുതിയ ഓഹരികളുടെ വില്പ്പനയും 400 കോടി രൂപയുടെ ഓഫര് ഫോര് സെയിലും (ഒഎഫ്എസ്) ഉള്പ്പെട്ടതാണ് ഐപിഒ. ഐപിഒയുടെ 50 ശതമാനം നിക്ഷേപക സ്ഥാപനങ്ങള്ക്കും 15 ശതമാനം ഉയര്ന്ന ആസ്തിയുള്ള വ്യക്തികള്ക്കും 35 ശതമാനം ചില്ലറ നിക്ഷേപകര്ക്കും മാറ്റിവെച്ചിരിക്കുന്നു. ഉയര്ന്ന ഇഷ്യു വിലയുടെ അടിസ്ഥാനത്തില് 5000 കോടി രൂപയായിരിക്കും കമ്പനിയുടെ വിപണിമൂല്യം.
ഐപിഒ വഴി സമാഹരിക്കുന്ന തുകയില് 525 കോടി രൂപ കടം തിരിച്ചടക്കുന്നതിനും ബാക്കി തുക പൊതുവായ കോര്പ്പറേറ്റ് ആവശ്യങ്ങള്ക്കുമായി വിനിയോഗിക്കും. 2025 ഡിസംബറില് സെബി പവറിക ലിമിറ്റഡിന് ഐപിഒ നടത്തുന്നതിനുള്ള അനുമതി നല്കിയിരുന്നു.
പവറിക നടപ്പു സാമ്പത്തിക വര്ഷം ഏപ്രില് മുതല് സെപ്റ്റംബര് വരെയുള്ള കാലയളവില് 129 കോടി രൂപ ലാഭവും 1,447.44 കോടി രൂപ വരുമാനവുമാണ് കൈവരിച്ചത്.
