ന്യൂഡൽഹി: വൻകിട നിക്ഷേപകർക്കായി രണ്ട് നാസ്ഡാക്ക് ഇടിഎഫുകൾ വീണ്ടും തുറക്കാൻ ഒരുങ്ങി അസറ്റ് മാനേജ്‌മെന്റ് കമ്പനിയായ മോത്തിലാൽ ഓസ്വാൾ എംഎഫ് (എഎംസി). രണ്ട് ഓവർസീസ് എക്‌സ്‌ചേഞ്ച്-ട്രേഡഡ് ഫണ്ടുകളായ (ഇടിഎഫ്) മോത്തിലാൽ ഓസ്വാൾ നാസ്ഡാക്ക് 100 ഇടിഎഫ്, മോത്തിലാൽ ഓസ്വാൾ നാസ്ഡാക്ക് ക്യു 50 ഇടിഎഫ് എന്നിവയാണ് വീണ്ടും തുറക്കുന്നത്.
2022 ഒക്ടോബർ 21 മുതൽ, വലിയ നിക്ഷേപകർക്ക് നേരിട്ട് എഎംസിയിൽ നിന്ന് ഈ രണ്ട് ഇടിഎഫുകളുടെയും യൂണിറ്റുകൾ സബ്‌സ്‌ക്രൈബ് ചെയ്യാനോ സൃഷ്ടിക്കാനോ കഴിയുമെന്ന് ഫണ്ട് ഹൗസ് അറിയിച്ചു.
ഫെബ്രുവരിയിൽ, സെക്യൂരിറ്റീസ് ആൻഡ് എക്‌സ്‌ചേഞ്ച് ബോർഡ് ഓഫ് ഇന്ത്യ (സെബി) വിദേശ സെക്യൂരിറ്റികളിൽ നിക്ഷേപിക്കുന്ന മ്യൂച്വൽ ഫണ്ടുകൾ വ്യവസായ വ്യാപകമായ വിദേശ പരിധികൾ ലംഘിക്കുന്നത് ഒഴിവാക്കാൻ വിദേശ ഓഹരികളിലെ നിക്ഷേപം നിർത്താൻ ഉപദേശിച്ചിരുന്നു. മ്യൂച്വൽ ഫണ്ടുകൾക്ക് വിദേശ സെക്യൂരിറ്റികളിലും ഫണ്ടുകളിലും നിക്ഷേപിക്കുന്നതിന് 7 ബില്യൺ ഡോളറിന്റെ പരിധി റെഗുലേറ്റർ നിശ്ചയിച്ചിട്ടുണ്ട്.
