ഇന്ത്യയുടെ ഡിജിറ്റല് കുതിപ്പിന് കരുത്തുപകരാന് റിലയന്സ് ഇന്ഡസ്ട്രീസും മെറ്റയും ഒന്നിക്കുന്നു. ഗുജറാത്തിലെ ജാംനഗറില് 168 മെഗാവാട്ട് ശേഷിയുള്ള അത്യാധുനിക എഐപവേര്ഡ് ഡാറ്റാ സെന്റര് സ്ഥാപിക്കാന് ഇരു കമ്പനികളും തമ്മില് ചരിത്രപരമായ കരാര് ഒപ്പുവെച്ചു. മെറ്റയുടെ ഇന്ത്യയിലെ ആദ്യത്തെ ‘ബില്റ്റ്-ടു-സ്യൂട്ട്’ ഡാറ്റാ സെന്റര് എന്ന പ്രത്യേകതയും ഈ പദ്ധതിക്കുണ്ട്.
രണ്ട് വര്ഷത്തിനുള്ളില് പ്രവര്ത്തനം ആരംഭിക്കാന് ലക്ഷ്യമിടുന്ന ഈ കേന്ദ്രം, മെറ്റയുടെ ആഗോള എഐ ആവശ്യങ്ങള് നിറവേറ്റുന്നതില് നിര്ണായക പങ്കുവഹിക്കും. റിലയന്സ് ഈ കേന്ദ്രം നിര്മ്മിച്ച് നല്കുകയും മെറ്റ അത് പാട്ടത്തിനെടുക്കുകയുമാണ് ചെയ്യുക. ഭാവിയില് സൗകര്യങ്ങള് വിപുലീകരിക്കാനുള്ള ഓപ്ഷനും കരാറിലുണ്ട്.
പുനരുപയോഗ ഊര്ജ്ജം ഉപയോഗിച്ചും കടല്വെള്ളം ശുദ്ധീകരിച്ച് തണുപ്പിക്കുന്നതിനായി ഉപയോഗിച്ചും തികച്ചും പരിസ്ഥിതി സൗഹൃദമായാണ് ഈ ഡാറ്റാ സെന്റര് ഒരുക്കുന്നത്.
ഈ പങ്കാളിത്തം ഇന്ത്യയുടെ ഡിജിറ്റല് അടിസ്ഥാന സൗകര്യ വികസനത്തിലെ ഒരു വലിയ നാഴികക്കല്ലാണെന്ന് റിലയന്സ് ഇന്ഡസ്ട്രീസ് ചെയര്മാന് മുകേഷ് അംബാനി അഭിപ്രായപ്പെട്ടു. ‘ആഗോള എഐ വിപ്ലവത്തില് ഇന്ത്യയുടെ മുന്നേറ്റം തെളിയിക്കുന്നതാണ് ഈ പദ്ധതി. ലോകത്തിന് തന്നെ മാതൃകയാകുന്ന അത്യാധുനിക ഡിജിറ്റല് ഇന്ഫ്രാസ്ട്രക്ചര് നിര്മ്മിക്കാന് ഞങ്ങള് പ്രതിജ്ഞാബദ്ധരാണ്,’ അദ്ദേഹം വ്യക്തമാക്കി.
മെറ്റയുടെ സ്ഥാപകനും സിഇഒയുമായ മാര്ക്ക് സക്കര്ബര്ഗും ഈ സംരംഭത്തില് അതീവ സന്തോഷം പ്രകടിപ്പിച്ചു. ജാംനഗറിലെ ഈ സൗകര്യം മെറ്റയുടെ എഐ പ്രവര്ത്തനങ്ങളെ ആഗോളതലത്തില് ശക്തിപ്പെടുത്തുമെന്നും, ഇന്ത്യയിലെ ഡിജിറ്റല് സമ്പദ് വ്യവസ്ഥയിലുള്ള മെറ്റയുടെ ദീര്ഘകാല നിക്ഷേപത്തിന്റെ ഭാഗമാണിതെന്നും അദ്ദേഹം പറഞ്ഞു.
കണക്റ്റിവിറ്റി, വാണിജ്യം തുടങ്ങിയ മേഖലകളില് ഇതിനകം തന്നെ സജീവമായ റിലയന്സ്-മെറ്റാ കൂട്ടുകെട്ടിന് കൂടുതല് കരുത്ത് പകരുന്നതാണ് ഈ പുതിയ കരാര്.
