മുംബൈ: 2022 ജൂൺ 30 ന് അവസാനിച്ച പാദത്തിൽ 47 ശതമാനം വർദ്ധനവോടെ 14.30 കോടി രൂപയുടെ ഏകികൃത അറ്റാദായം രേഖപ്പെടുത്തി ഇൻഡ് മോട്ടോർ പാർട്സ്. കഴിഞ്ഞ വർഷം ഇതേ കാലയളവിൽ കമ്പനിയുടെ അറ്റാദായം 9.73 കോടി രൂപയായിരുന്നു. തിങ്കളാഴ്ച കമ്പനിയുടെ ഓഹരികൾ 0.34 ശതമാനത്തിന്റെ നേട്ടത്തിൽ 737.40 രൂപയിലാണ് വ്യാപാരം അവസാനിപ്പിച്ചത്.
അതേപോലെ 2022 ജൂൺ പാദത്തിലെ കമ്പനിയുടെ അറ്റ വിൽപ്പന മുൻ വർഷത്തെ 115.71 കോടി രൂപയിൽ നിന്ന് 59.14 ശതമാനം വർധിച്ച് 184.14 കോടി രൂപയായി ഉയർന്നു. കൂടാതെ പ്രസ്തുത പാദത്തിലെ സ്ഥാപനത്തിന്റെ പലിശ, നികുതികൾ, മൂല്യത്തകർച്ച എന്നിവയ്ക്ക് മുമ്പുള്ള വരുമാനം 16.81 കോടി രൂപയാണ്. 2021 ജൂണിൽ ഇത് 11.08 കോടി രൂപയായിരുന്നു.
ഒന്നാം പാദത്തിൽ കമ്പനിയുടെ ഇപിഎസ് 11.46 രൂപയായി വർധിച്ചു. ഓട്ടോമൊബൈൽ സ്പെയർ പാർട്സുകളുടെയും ആക്സസറികളുടെയും വിതരണത്തിൽ ഏർപ്പെട്ടിരിക്കുന്ന കമ്പനിയാണ് ഇൻഡ് മോട്ടോർ പാർട്സ് ആൻഡ് ആക്സസറീസ് ലിമിറ്റഡ്. എഞ്ചിൻ ഗ്രൂപ്പ് ഘടകങ്ങൾ, ബ്രേക്ക് സിസ്റ്റങ്ങൾ, ഫാസ്റ്റനറുകൾ, റേഡിയറുകൾ, സസ്പെൻഷനുകൾ, ആക്സിലുകൾ, ഓട്ടോ ഇലക്ട്രിക്കൽസ്, വീലുകൾ തുടങ്ങിയവയാണ് കമ്പനിയുടെ ഉത്പന്നങ്ങൾ.
