കൊച്ചി: കേരളത്തിൽ ഇലക്ട്രിക് വാഹനങ്ങൾക്ക് (EV) ഉയർന്ന ഡിമാൻഡ്. ഇലക്ട്രിക് കാറുകൾക്കാണ് സംസ്ഥാനത്ത് ആവശ്യക്കാരേറെ.
എന്നാൽ മഹാരാഷ്ട്രയാണ് ഇലക്ട്രിക് കാറുകൾ വാങ്ങുന്നതിൽ കേരളത്തിന് മുന്നിലുള്ള സംസ്ഥാനം. കർണാടകയും ഗുജറാത്തുമാണ് കേരളത്തിന് തൊട്ടുപിന്നിൽ.
2023-ൽ രാജ്യത്തെ 82,000-ഓളം ഇലക്ട്രിക് കാറുകളിൽ 35 ശതമാനവും വിറ്റഴിച്ചത് കേരളം, കർണാടക, ഗുജറാത്ത് എന്നീ സംസ്ഥാനങ്ങളിലാണ്.
മികച്ച ഉപഭോക്തൃ അവബോധം, കുറഞ്ഞ പ്രവർത്തനച്ചെലവ്, ചാർജിങ് ഇൻഫ്രാസ്ട്രക്ചർ എന്നിവയാണ് ഈ സംസ്ഥാനങ്ങളിലെ വിൽപ്പന ഉയരാൻ ഇടയാക്കിയതെന്നാണ് വിലയിരുത്തൽ. ഒരു ഇലക്ട്രിക് വാഹനം 1,000 കിലോമീറ്റർ സഞ്ചരിക്കുമ്പോൾ പ്രതിമാസം 7,000 രൂപ ലാഭിക്കാനാകും.
ഒരു ഇവി 1 കിലോമീറ്റർ ഓടിക്കാനുള്ള ചെലവ് 1 രൂപയാണ്. സാധാരണ വാഹനങ്ങളിൽ ഇത് 8 രൂപയാകും. 2023-ൽ കേരളത്തിൽ ഇവി ഫോർ വീലർ വിൽപ്പന 13.2 ശതമാനമായി ഉയർന്നു.
കേരളം, കർണാടക, ഗുജറാത്ത് എന്നീ സംസ്ഥാനങ്ങൾക്ക് പുറമെ, രാജസ്ഥാൻ, ഉത്തർപ്രദേശ്, തമിഴ്നാട് എന്നിവിടങ്ങളിലും ഇവി ഉപഭോഗം വർധിച്ചു.
