ന്യൂഡൽഹി: നടപ്പ് സാമ്പത്തിക വർഷത്തിലെ ഓഗസ്റ്റ് വരെയുള്ള ആദ്യ അഞ്ച് മാസങ്ങളിൽ ഇന്ത്യയുടെ ധനകമ്മി 7.10 ലക്ഷം കോടി രൂപയായി വർധിച്ചതായി ഇന്നലെ പുറത്തുവിട്ട സർക്കാർ കണക്കുകൾ വ്യക്തമാക്കുന്നു.
ഇത് സർക്കാരിന്‍റെ മുഴുവൻ വർഷത്തേക്കുള്ള ബജറ്റ് കണക്കിന്‍റെ 41.9% വരും. കഴിഞ്ഞ വർഷം ഇതേ കാലയളവിൽ (ഏപ്രിൽ-ഓഗസ്റ്റ്) ധനകമ്മി വാർഷിക ലക്ഷ്യത്തിന്‍റെ 38.1% ആയിരുന്നു.
2026-27 സാമ്പത്തിക വർഷത്തിൽ കേന്ദ്ര സർക്കാർ 16.96 ലക്ഷം കോടി രൂപയുടെ ധനകമ്മിയാണ് ബജറ്റിൽ ലക്ഷ്യമിട്ടിരിക്കുന്നത്.
ഏപ്രിൽ-ഓഗസ്റ്റ് കാലയളവിൽ സർക്കാരിന്‍റെ ആകെ വരുമാനം 13.68 ലക്ഷം കോടി രൂപയാണ്. ഇത് മുഴുവൻ വർഷത്തെ ബജറ്റ് ലക്ഷ്യമായ 36.52 ലക്ഷം കോടി രൂപയുടെ 37.5% ആണ്. കഴിഞ്ഞ വർഷം ഇതേ കാലയളവിൽ വരുമാനം വാർഷിക ലക്ഷ്യത്തിന്‍റെ 36.7% ആയിരുന്നു.
അതേസമയം, ആകെ ചെലവ് 20.78 ലക്ഷം കോടി രൂപയിലെത്തി. ഇത് ഈ സാമ്പത്തിക വർഷത്തേക്ക് ബജറ്റ് വകയിരുത്തിയ 53.47 ലക്ഷം കോടി രൂപയുടെ 38.9% ആണ്. കഴിഞ്ഞ വർഷം ഇതേ കാലയളവിൽ ചെലവ് വാർഷിക ലക്ഷ്യത്തിന്‍റെ 37.1% ആയിരുന്നു.
റവന്യു വരുമാനം 12.92 ലക്ഷം കോടി രൂപയാണ് (ബജറ്റ് ലക്ഷ്യത്തിന്‍റെ 36.6%). ഇതിൽ അറ്റ നികുതി വരുമാനം 8.38 ലക്ഷം കോടി രൂപയും നികുതിയേതര വരുമാനം 4.55 ലക്ഷം കോടി രൂപയുമാണ്.
2026-27 സാമ്പത്തിക വർഷത്തിൽ ജിഡിപിയുടെ 4.3 ശതമാനം ധനക്കമ്മി ലക്ഷ്യം കേന്ദ്ര സർക്കാർ നിശ്ചയിച്ചിട്ടുണ്ട്.
