ന്യൂഡൽഹി: ചൈനീസ് മൊബൈൽഫോൺ നിർമ്മാതാക്കളായ വിവോ കമ്മ്യൂണിക്കേഷൻ ടെക്നോളജിയുടെ ഇന്ത്യാ വിഭാഗമായ വിവോ മൊബൈൽസ് ഇന്ത്യ 2,217 കോടി രൂപയുടെ ഇറക്കുമതി നികുതി വെട്ടിച്ചെന്ന് കണ്ടെത്തിയതായി ഡയറക്ടറേറ്റ് ഒഫ് റവന്യൂ ഇന്റലിജൻസ് (ഡി.ആർ.ഐ) വ്യക്തമാക്കി.
ഇന്ത്യയിൽ നിർമ്മാണം, അസംബ്ലിംഗ്, മൊത്തവില്പന, ചില്ലറവില്പന, ആക്സസറി വില്പന തുടങ്ങിയ പ്രവർത്തനങ്ങൾ വിവോ നടത്തുന്നുണ്ട്. ചൈനയിൽ നിന്ന് നിർമ്മാണഘടകങ്ങൾ ഇറക്കുമതി ചെയ്യാൻ കമ്പനി തെറ്റായരേഖകൾ ചമച്ച്, അനധികൃതമായി നികുതിയിളവുകൾ നേടിയാണ് തട്ടിപ്പ് നടത്തിയതെന്ന് ഡി.ആർ.ഐ അധികൃതർ പറഞ്ഞു.
ഇക്കാര്യങ്ങൾ ചൂണ്ടിക്കാട്ടി കമ്പനിക്ക് കാരണം കാണിക്കൽ നോട്ടീസും ഡി.ആർ.ഐ നൽകി. സമാനരീതിയിൽ 4,403.88 കോടി രൂപയുടെ നികുതിവെട്ടിപ്പ് കണ്ടെത്തിയതിനെ തുടർന്ന് അടുത്തിടെ ഒപ്പോയ്ക്കും ഡി.ആർ.ഐ കാരണം കാണിക്കൽ നോട്ടീസ് നൽകിയിരുന്നു.
