രാജ്യമൊട്ടാകെ അതിവേഗ ഡാറ്റ ലഭ്യമാക്കാൻ ലക്ഷ്യമിട്ട് ബിഎസ്എൻഎൽ

ബെംഗളൂരു: രാജ്യത്തുടനീളം 15,000ൽ അധികം 4ജി സൈറ്റുകൾ വിന്യസിച്ചിരിക്കുകയാണ് ബിഎസ്എൻഎൽ(BSNL). അധികം വൈകാതെ തന്നെ അതിവേഗ ഇൻ്റർനെറ്റ്(High Speed Internet) രാജ്യമെങ്ങും ലഭ്യമാക്കാൻ ഒരുങ്ങുകയാണ് കമ്പനി.

ബിഎസ്എൻഎൽ രാജ്യവ്യാപകമായി 4ജി സേവനങ്ങൾ അവതരിപ്പിക്കും. സ്വകാര്യ കമ്പനികളുമായി മത്സരിക്കുന്നതിന് 5ജി സാങ്കേതികവിദ്യയിലെ പരീക്ഷണങ്ങൾ തുടങ്ങി.

ആത്മ നിർഭർ ഭാരത് പദ്ധതിക്ക് കീഴിൽ ആണ് രാജ്യത്ത് 4ജി സൈറ്റുകൾ വികസിപ്പിച്ചതെന്ന് കമ്പനി വ്യക്തമാക്കി. ബിഎസ്എൻഎലിൻ്റെ 4ജി സേവനങ്ങൾ പൂർണ്ണമായും തദ്ദേശീയമായ സാങ്കേതികവിദ്യയെ ആശ്രയിച്ചാണ്.

ഒക്ടോബർ അവസാനത്തോടെ 80,000 ടവറുകൾ സ്ഥാപിക്കുമെന്നും ബാക്കി 21,000 ടവറുകൾ അടുത്ത വർഷം മാർച്ചോടെ സ്ഥാപിക്കുമെന്നും അടുത്തിടെ കേന്ദ്ര വാർത്താവിനിമയ മന്ത്രിജ്യോതിരാദിത്യ സിന്ധ്യ വ്യക്തമാക്കിയിരുന്നു. 2025 മാർച്ചിൽ ഒരു ലക്ഷം 4ജി ടവറുകൾ സ്ഥാപിക്കുകയാണ് ലക്ഷ്യം.

പരീക്ഷണം പുരോഗമിക്കുന്നു
ബിഎസ്എൻഎല്ലിൻ്റെ തദ്ദേശീയ സാങ്കേതികവിദ്യയെ അടിസ്ഥാനമാക്കിയുള്ള 5ജി നെറ്റ്‌വർക്ക് ഉപയോഗിച്ച് കേന്ദ്ര മന്ത്രി ജ്യോതിരാദിത്യ സിന്ധ്യ അടുത്തിടെ വീഡിയോ കോൾ ചെയതിരുന്നു. 5ജി പരീക്ഷണങ്ങൾ നടക്കുകയാണ്. വരും ആഴ്‌ചകളിൽ ഒന്നിലധികം നഗരങ്ങളിൽ പരീക്ഷണം നടക്കും.

ബിഎസ്എൻഎല്ലിൻ്റെ നെറ്റ്‌വർക്ക് മെച്ചപ്പെടുത്തുന്നതിനായി ഈ വർഷത്തെ ബജറ്റിൽ കേന്ദ്ര സർക്കാർ 83,000 കോടി രൂപ വകയിരുത്തിയിരുന്നു. 4ജി വിന്യാസം വേഗത്തിൽ നടപ്പാക്കുകയാണ്.

കുറഞ്ഞ നിരക്കിലെ റീചാർജ് പ്ലാനുകൾ
ജിയോയും എയ‍ർടെല്ലും വിയും ഉൾപ്പെടെ അടുത്തിടെ ടെലികോം നിരക്കുകൾ ഉയർത്തിയിട്ടും ബിഎസ്എൻഎൽ കുറഞ്ഞ നിരക്കിലെ പ്ലാനുകൾ തുടരുന്നു. ഡൽഹി, മുംബൈ, കൊൽക്കത്ത, ചെന്നൈ എന്നീ മെട്രോ നഗരങ്ങളിൽ ഉൾപ്പെടെ 4ജി സൈറ്റുകൾ വിന്യസിച്ചിട്ടുണ്ട്.

28 ദിവസത്തെ അൺലിമിറ്റഡ് വോയിസ് കോളുകൾക്കും 1.5 ജിബി ഡാറ്റക്കും 100 എസ്എംഎസുകൾക്കുമായി 139 രൂപയുടെ പ്ലാൻ ലഭ്യമാണ്.

10 ജിബി ഡാറ്റയും അൺലിമിറ്റഡ് കോളുകളും 30 ദിവസത്തേക്ക് ലഭ്യമാക്കുന്നതിന് 147 രൂപയുടെ പ്ലാൻ ലഭിക്കും.

പ്രതിദിനം 1 ജിബി ഡാറ്റ, അൺലിമിറ്റഡ് കോളുകൾ എന്നിവക്ക് 185 രൂപയാണ് നിരക്ക്. 28 ദിവസമാണ് കാലാവധി.

പ്രതിദിനം 2ജിബി ഡാറ്റ, അൺലിമിറ്റഡ് കോളുകൾ എന്നിവ 28 ദിവസത്തേക്ക് 187 രൂപക്ക് ലഭ്യമാണ്.

228 രൂപക്ക് അൺലിമിറ്റഡ് വോയ്‌സ് കോളുകളുകൾക്കൊപ്പം ദിവസേന 2ജിബി ഡാറ്റയും 100എസ്എംഎസുകളും ഒരു മാസത്തേക്ക് ലഭിക്കും.

187 രൂപയുടെ പ്ലാനിൽ പ്രതിദിനം 2ജിബി ഡാറ്റ അൺലിമിറ്റഡ് കോളുകൾ എന്നിവ 28 ദിവസത്തേക്ക് ലഭിക്കും.