ഡൽഹി: എയറോനോട്ടിക്കൽ, നോൺ എയറോനോട്ടിക്കൽ (ടെർമിനൽ) പ്രവർത്തനങ്ങൾക്ക് പുറമെ രാജ്യത്തെ വിമാനത്താവളങ്ങൾക്കൊപ്പം എയ്‌റോ സിറ്റികൾ വികസിപ്പിക്കാൻ അദാനി ഗ്രൂപ്പ് പദ്ധതിയിടുന്നതായി അടുത്ത വൃത്തങ്ങൾ പറഞ്ഞു. അദാനി ഗ്രൂപ്പ് കമ്പനിയായ അദാനി എയർപോർട്ട്സ് അതിന്റെ എല്ലാ വിമാനത്താവളങ്ങളിലുമായുള്ള 500 ഏക്കറിലധികം സ്ഥലത്ത് ഏകദേശം 70 ദശലക്ഷം ചതുരശ്ര അടി എയ്‌റോ സിറ്റി പ്രോജക്ടുകൾ വികസിപ്പിക്കാൻ പദ്ധതിയിടുന്നതായി അവർ കൂട്ടിച്ചേർത്തു. ഹോട്ടലുകൾ, കൺവെൻഷൻ സെന്ററുകൾ, റീട്ടെയിൽ, വിനോദ, ആരോഗ്യ സംരക്ഷണ ഓപ്ഷനുകൾ, ലോജിസ്റ്റിക്‌സ്, വാണിജ്യ ഓഫീസുകൾ, മറ്റ് അനുബന്ധ റിയൽ എസ്റ്റേറ്റ് സെഗ്‌മെന്റുകൾ എന്നിവയുടെ മിശ്രിതമായിരിക്കും ഈ എയ്‌റോ സിറ്റികൾ.
ഈ പദ്ധതി പ്രകാരം ഹോട്ടലുകൾ വികസിപ്പിക്കുന്നതിനായി മാരിയറ്റ് ഇന്റർനാഷണൽ, ഇന്റർകോണ്ടിനെന്റൽ ഹോട്ടൽസ് ഗ്രൂപ്പ് (ഐഎച്ച്ജി), ഹിൽട്ടൺ തുടങ്ങിയ ഹോസ്പിറ്റാലിറ്റി ശൃംഖലകളുമായി കമ്പനി പ്രാഥമിക ചർച്ചകൾ നടത്തിവരികയാണെന്ന് വൃത്തങ്ങൾ അറിയിച്ചു. മുംബൈ, ജയ്പൂർ, അഹമ്മദാബാദ്, ലഖ്‌നൗ, മംഗളൂരു, ഗുവാഹത്തി, തിരുവനന്തപുരം എന്നിവിടങ്ങളിലെ വിമാനത്താവളങ്ങൾ അദാനി എയർപോർട്ടിന്റെ പോർട്ട്‌ഫോളിയോയിൽ ഉൾപ്പെടുന്നു. എയർപോർട്ടിനകത്തും പുറത്തും ഉപഭോക്താക്കൾക്കായി ‘ലൈഫ്സ്റ്റൈൽ ഡെസ്റ്റിനേഷനുകൾ’ സൃഷ്ടിക്കാൻ തങ്ങൾ നോക്കുന്നതായി കമ്പനിയുടെ വെബ്‌സൈറ്റ് പറയുന്നു.
അദാനി എയർപോർട്ട് ഹോൾഡിംഗ്സ് ലിമിറ്റഡിന്റെ (AAHL) എയർപോർട്ടുകൾ മൊത്തം ഇന്ത്യൻ എയർ ട്രാഫിക്കിന്റെ 23 ശതമാനവും, ഇന്ത്യയുടെ എയർ കാർഗോയുടെ 30 ശതമാനവും നിയന്ത്രിക്കുന്നു. ഏകദേശം 200 ദശലക്ഷം ഉപഭോക്താക്കളെയാണ് ഈ വിമാനത്താവളങ്ങൾ കൈകാര്യം ചെയ്യുന്നത്.
