ആഭ്യന്തര വിപണിയുടെ പ്രധാന ഓഹരി സൂചികകളായ എൻഎസ്ഇയുടെ നിഫ്റ്റിയിലും ബിഎസ്ഇയുടെ സെൻസെക്സിലും ഇക്കഴിഞ്ഞ ഒക്ടോബർ മാസത്തിനിടെ ഏഴ് ശതമാനത്തിലധികം നഷ്ടമാണ് രേഖപ്പെടുത്തിയത്.
സമാന കാലയളവിൽ ബിഎസ്ഇയുടെ മിഡ് ക്യാപ് സൂചികയിൽ ആറ് ശതമാനത്തിലധികവും സ്മോൾ ക്യാപ് സൂചികയിൽ മൂന്ന് ശതമാനത്തിലധികവും വീതം തിരിച്ചടി രേഖപ്പെടുത്തി. വിദേശ നിക്ഷേപകരുടെ കനത്ത വിൽപ്പനയും കോർപറേറ്റ് കമ്പനികളുടെ സെപ്റ്റംബർ പാദഫലം പ്രതീക്ഷിച്ചതിലും താഴെയായതും ഒക്കെ ഓഹരി വിപണിയിൽ തിരിച്ചടിക്കുള്ള കളമൊരുക്കി.
എന്നിരുന്നാലും ആഭ്യന്തര നിക്ഷേപക സ്ഥാപനങ്ങളായ മ്യൂച്ചൽ ഫണ്ടുകൾ തെല്ലും ഭയക്കാതെ സഹസ്രകോടികളാണ്, ഇക്കഴിഞ്ഞ ഒക്ടോബർ മാസത്തിനിടെ നേരിട്ട തിരിച്ചടിക്കിടയിലും ഇന്ത്യൻ വിപണിയിലേക്ക് ഒഴുക്കിയത്. പ്രധാനമായും ബ്ലൂചിപ് ഓഹരികളെയാണ് ആഭ്യന്തര മ്യൂച്ചൽ ഫണ്ടുകൾ നിക്ഷേപത്തിനായി പരിഗണിച്ചത്.
ഗണ്യമായൊരു ഭാഗം പ്രാരംഭ പൊതു ഓഹരി വിൽപന അഥവാ ഐപിഒയിലേക്കും മ്യൂച്ചൽ ഫണ്ടുകൾ നിക്ഷേപിച്ചിട്ടുണ്ട്. ഈയൊരു പശ്ചാത്തലത്തിൽ മ്യൂച്ചൽ ഫണ്ടുകൾ വാങ്ങിയ ബ്ലൂചിപ് ഓഹരികളുടെ വിശദാംശങ്ങളും ഇതിൽ നിന്നും ലഭിക്കുന്ന സൂചനകളും നോക്കാം.
മ്യൂച്ചൽ ഫണ്ട് നിക്ഷേപിച്ച ഓഹരികൾ
ഒക്ടോബർ മാസക്കാലയളവിനിടെ, മ്യൂച്ചൽ ഫണ്ടുകൾ എല്ലാം ചേർന്ന്, ആഭ്യന്തര വിപണിയിൽ നിന്നും 92,000 കോടിയിലധികം രൂപയുടെ ഓഹരികളാണ് വാങ്ങിക്കൂട്ടിയത് എന്ന് രാജ്യത്തെ കേന്ദ്രീകൃത സെക്യൂരിറ്റിീസ് ഡെപ്പോസിറ്ററികളിലൊന്നായ എൻഎസ്ഡിഎൽ പങ്കുവെച്ച കണക്കുകൾ വ്യക്തമാക്കുന്നു. ഇതിൽ ഏകദേശം 45,000 കോടി രൂപയും നിഫ്റ്റി സൂചികയുടെ ഭാഗമായ 15 മുൻനിര ഓഹരികളിലായാണ് മ്യൂച്ചൽ ഫണ്ടുകൾ നിക്ഷേപിച്ചിരിക്കുന്നത് എന്നതും ശ്രദ്ധേയം.
പ്രമുഖ വാഹന നിർമാതാക്കളായ മഹീന്ദ്ര ആൻഡ് മഹീന്ദ്രയുടെ ഓഹരിയാണ്, ഒക്ടോബർ മാസത്തിനിടെ മ്യൂച്ചൽ ഫണ്ടുകൾ ഏറ്റവുമധികം വാങ്ങിയിരിക്കുന്നത്.
സെപ്റ്റംബർ പാദഫലം നിരാശപ്പെടുത്തിയതിനെ തുടർന്ന്, 13 ശതമാനം ഇടിവ് നേരിടുന്ന ഘട്ടത്തിലും 6,841 കോടി രൂപയുടെ മഹീന്ദ്ര ആൻഡ് മഹീന്ദ്ര ഓഹരികൾ മ്യൂച്ചൽ ഫണ്ടുകൾ വാങ്ങിക്കൂട്ടി.
സമാനമായി വൻകിട സ്വകാര്യ ബാങ്കുകളായ എച്ച്ഡിഎഫ്സി ബാങ്കിന്റെ ഓഹരിയിൽ 5,757 കോടിയും ആക്സിസ് ബാങ്ക് ഓഹരിയിൽ 4,116 കോടിയും ഐസിഐസിഐ ബാങ്ക് ഓഹരിയിൽ 3,897 കോടി രൂപയും വീതവും ഒക്ടോബർ മാസക്കാലയളവിൽ നിക്ഷേപിച്ചു.
അതുപോലെ 3,105 കോടി രൂപയുടെ എസ്ബിഐ ഓഹരിയും 2,924 കോടിയുടെ ബജാജ് ഓട്ടോ ഓഹരിയും 2,517 കോടി രൂപയുടെ ലാർസൺ ആൻഡ് ട്യൂബ്രോ ഓഹരിയും 2,511 കോടിയുടെ സൊമാറ്റോ ഓഹരിയും 2,409 കോടി രൂപയുടെ ഇൻഡസിൻ‍ഡ് ബാങ്ക് ഓഹരിയും മ്യൂച്ചൽ ഫണ്ടുകൾ വാങ്ങിക്കൂട്ടിയിട്ടുണ്ട്.
കൂടാതെ ടാറ്റ കൺസൾട്ടൻസി സർവീസസ് ഓഹരിയിൽ 2,402 കോടിയും ഹിന്ദുസ്ഥാൻ യൂണിലിവർ ഓഹരിയിൽ 2,362 കോടി രൂപയും മാരുതി സുസൂക്കി ഇന്ത്യ ഓഹരിയിൽ 2,355 കോടി രൂപയും ഭാരതി എയർടെൽ ഓഹരിയിൽ 2,331 കോടിയും അംബുജ സിമന്റ്സ് ഓഹരിയിൽ 1,638 കോടി രൂപയും ഐഷർ മോട്ടോഴ്സ് ഓഹരിയിൽ 1,631 കോടി രൂപയും വീതം ഇക്കഴിഞ്ഞ ഒക്ടോബർ മാസത്തിനിടെ മ്യൂച്ചൽ ഫണ്ടുകൾ നിക്ഷേപമിറക്കി.
ഐപിഒയിലും നിക്ഷേപം
അടുത്തിടെ ആഭ്യന്തര വിപണിയിൽ നേരിടുന്ന തിരിച്ചടിക്കിടയിൽ, ബ്ലൂചിപ്പ് ഓഹരികളെ പരിഗണിക്കുന്നതിനൊപ്പം പ്രാരംഭ പൊതു ഓഹരി വിൽപന അഥവാ ഐപിഒ നടത്തുന്ന കമ്പനികളുടെ ഓഹരികൾക്കു വേണ്ടിയും ശതകോടിക്കണക്കിന് തുക മ്യൂച്ചൽ ഫണ്ടുകൾ മുടക്കിയുള്ളതായി കാണാം.
ഒക്ടോബർ മാസത്തിനിടെ പ്രാഥമിക വിപണിയിൽ അരങ്ങേറിയ ആറ് ഐപിഒകളിൽ അഞ്ച് എണ്ണത്തിലും മ്യൂച്ചൽ ഫണ്ടുകൾ നിക്ഷേപം നടത്തിയിട്ടുണ്ട്. ഇതിനായി ഏകദേശം 9,600 കോടി രൂപയാണ് ചെലവഴിച്ചിട്ടുള്ളത്.
പ്രമുഖ യാത്രാ വാഹന നിർമാതാക്കളായ ഹ്യുണ്ടായ് മോട്ടോർ ഇന്ത്യയുടെ ഐപിഒയിൽ മൊത്തം 6,999 കോടി രൂപ മ്യൂച്ചൽ ഫണ്ടുകൾ നിക്ഷേപിച്ചിട്ടുണ്ട്. അതുപോലെ വാരീ എനർജീസ് ഐപിഒയിൽ 1,423 കോടിയും അഫ്കോൺ ഇൻഫ്രാസ്ട്രക്ചർ ഐപിഒയിൽ 1,023 കോടി രൂപയും ഗോദാവരി ബയോറിഫൈനറീസ് ഐപിഒയിൽ 166 കോടിയും ഗരുഡ കൺസ്ട്രക്ഷൻ ആൻഡ് എൻജിനീയറിങ് ഐപിഒയിൽ 10 കോടി രൂപയും വീതം മ്യൂച്ചൽ ഫണ്ടുകൾ നിക്ഷേപമിറക്കിയിട്ടുണ്ട്.
മ്യൂച്ചൽ ഫണ്ടുകൾ നൽകുന്ന സൂചനയെന്ത്?
ശക്തമായ ബിസിനസ് മോഡലും മികച്ച വരുമാനം ആ‌ർജിക്കാനുള്ള ശേഷിയും ഉയർന്ന ലിക്വിഡിറ്റിയും ഉള്ളതാണ് ബ്ലൂചിപ്പ് കമ്പനികളുടെ ഓഹരികളെ, വിപണിയിൽ അനിശ്ചിതത്വം തലപൊക്കുന്ന വേളയിൽ നിക്ഷേപത്തിനായി മ്യൂച്ചൽ ഫണ്ടുകൾ തെരഞ്ഞെടുക്കുന്നതിനുള്ള കാരണം.
ഹ്രസ്വകാലയളവിൽ വരുമാനത്തിൽ സമ്മർദമൊക്കെ പ്രകടമാകാമെങ്കിലും ദീർഘകാല വരുമാനവും പണമൊഴുക്കും ശക്തമായി തുടരുമെന്ന് പ്രതീക്ഷിക്കാം എന്നതാണ് ദീർഘമായ കാലയളവിലേക്ക് ബ്ലൂചിപ് ഓഹരികളെ പരിഗണിക്കുന്നതിനുള്ള ഘടകങ്ങളെന്ന് ബ്രോക്കറേജ് സ്ഥാപനമായ വെൽത്ത്മിൽസ് സെക്യൂരിറ്റീസിന്റെ ഇക്വിറ്റി സ്ട്രാറ്റജി ഡയറക്ടർ ക്രാന്തി ബഥിനി ചൂണ്ടിക്കാട്ടി.
സമീപകാലത്ത് വിപണിയിൽ നേരിട്ട തിരുത്തൽ കാരണം, ഗുണമേന്മയുള്ള ഓഹരികളെ മൂല്യമതിപ്പിൽ അഥവാ വാല്യൂവേഷനിൽ ആകർഷകമായ നിലവാരത്തിലേക്ക് എത്തിച്ചിട്ടുണ്ട്. ഇതുകാരണം പുതിയ സ്കീമുകളുടെ നിക്ഷേപത്തിനായി മ്യൂച്ചൽ ഫണ്ടുകൾ ബ്ലൂചിപ് ഓഹരികളെ പരിഗണിക്കാമെന്ന് ഡിആർചോക്സി ഫിൻസേർവിന്റെ എംഡി ആയ ദേവൻ ചോക്സി അഭിപ്രായപ്പെട്ടു.
കോർപറേറ്റ് കമ്പനികളുടെ സെപ്റ്റംബർ പാദഫലം നിരാശപ്പെടുത്തിയെങ്കിലും നടപ്പ് സാമ്പത്തിക വർഷത്തിന്റെ രണ്ടാം പകുതിയിൽ സർക്കാർ തലത്തിലുള്ള മൂലധന ചെലവിടൽ വർധിക്കാനുള്ള സാധ്യതയും മികച്ച മൺസൂണും രാജ്യത്തെ ഉത്സവ സീസൺ കാരണവും കമ്പനികളുടെ മൂന്ന്, നാല് പാദങ്ങളിലെ പ്രവർത്തനഫലം മെച്ചപ്പെടാനും കളമൊരുങ്ങുമ്പോൾ സമീപ ഭാവിയിൽ വിപണി ഉണർവ് കൈവരിക്കാമെന്നും ദേവൻ ചോക്സി സൂചിപ്പിച്ചു.
