തിരുവനന്തപുരം: ‘ആരോഗ്യം ആനന്ദം – വൈബ് 4 വെല്നസ്സ്’എന്ന പേരില് ആരോഗ്യ വകുപ്പ് സംഘടിപ്പിക്കുന്ന ജനകീയ കാംപെയ്ന് ഇന്ന് രാവിലെ 11.30-ന് മുഖ്യമന്ത്രി പിണറായി വിജയന് ഉദ്ഘാടനം ചെയ്യും. കാംപെയ്നിന്റെ ഭാഗമായി കാസര്ഗോഡ് നിന്ന് ഡിസംബര് 26-ന് ആരംഭിച്ച് വിവിധ ജില്ലകളിലൂടെ സഞ്ചരിച്ച് തിരുവനന്തപുരത്ത് എത്തുന്ന വിളമ്പര ജാഥയുടെ സമാപനവും ഇതോടൊപ്പം നടക്കും. ആരോഗ്യ മന്ത്രി വീണാ ജോര്ജ് അധ്യക്ഷത വഹിക്കുന്ന ചടങ്ങില് മന്ത്രിമാര്, മറ്റ് ജന പ്രതിനിധികള്, ആരോഗ്യ പ്രവര്ത്തകര്, പൊതുജനങ്ങള്, സെലിബ്രിറ്റികള് എന്നിവര് പങ്കെടുക്കും.
എല്ലാ ജില്ലകളിലും പരിപാടികള് ഉണ്ടായിരിക്കും. 10 ലക്ഷത്തോളം പേര് പുതുതായി വ്യായാമത്തിലേക്കെത്തും. ആര്ദ്രം മിഷന് രണ്ടിന്റെ ഭാഗമായി 10 പ്രധാന പദ്ധതികളാണ് ആരോഗ്യ വകുപ്പ് നടപ്പിലാക്കി വരുന്നത്. അതില് പ്രധാനമാണ് ജീവിതശൈലീ രോഗ പ്രതിരോധം. ആര്ദ്രം ആരോഗ്യം ജനകീയ കാംപെയ്നിന്റെ ഭാഗമായി രണ്ട് ഘട്ടങ്ങളിലായി ആരോഗ്യ പ്രവര്ത്തകര് വീട്ടിലെത്തി 30 വയസ് കഴിഞ്ഞവരുടെ സ്ക്രീനിംഗ് നടത്തി. അതില് 34 % പേര്ക്ക് രക്താതിമര്ദവും 24% പേര്ക്ക് പ്രമേഹവും ഉണ്ടെന്നാണ് കണ്ടെത്തല്.
2025 ഫെബ്രുവരി 4-ന് ആരംഭിച്ച് രണ്ട് ഘട്ടങ്ങളിലായി നടപ്പാക്കിയ ‘ആരോഗ്യം ആനന്ദം- അകറ്റാം അര്ബുദം’ എന്ന ബൃഹത് കാന്സര് പ്രതിരോധ ജനകീയ കാംപെയ്നില് 20 ലക്ഷത്തിലധികം പേരെ ഇതിനോടകം സ്ക്രീന് ചെയ്ത് കഴിഞ്ഞു. കാംപെയ്നിന്റെ അടുത്ത ഘട്ടമായാണ് സുസ്ഥിതിക്ക് (വെല്നസ്) പ്രാധാന്യം നല്കിക്കൊണ്ട് ‘ആരോഗ്യം ആനന്ദം -വൈബ് 4 വെല്നസ്’ എന്ന പേരില് കാംപെയ്ന് നടത്തുന്നത്.
